Ocarakakathāvaṇṇanā
118. Tassuddhāre sabbesaṃ pārājikan ti yadi yo āṇatto avassaṃ taṃ bhaṇḍaṃ harati , āṇattikkhaṇe eva pārājikaṃ .
118. Ocarakakathāyaṃ pariyāyena hi adinnādānato muccatīti idaṃ āṇattikapayogaṃ sandhāya vuttaṃ , sayameva pana abhiyuñjanādīsu pariyāyenapi mokkho natthi .
‘‘ Idha tiṇṇaṃ kasmā pārājikaṃ , nanu ‘ tumhe , bhante , tayo harathā ’ ti vuttattā thullaccayaṃ , itaresañca paṭipāṭiyā ekekassāṇattattā ekekena ca dukkaṭena bhavitabbaṃ .
Kathaṃ , eko kira māsagghanakaṃ parissāvanaṃ thenetvā desetvā nirussāho eva vā hutvā puna māsagghanakaṃ sūciṃ tatheva katvā puna māsagghanakanti evaṃ siyāti ?
Na evaṃ , taṃ yathā uppalathenako yena vatthu pūrati tāva saussāhattā pārājiko āsi , evamime saussāhāva na desayiṃsu vā ’’ ti likhitaṃ , pāḷiyaṃ , aṭṭhakathāyañca saṃvidahitvā gatesu ekassuddhāre sabbesaṃ pārājikaṃ vinā viya āṇattiyā kiñcāpi vuttaṃ , atha kho ‘‘ tassāyaṃ attho ’’ ti vatvā pacchā vuttavinicchayesu ca ekabhaṇḍaekaṭṭhānādīsu ca sambahulā ekaṃ āṇāpentīti āṇattimeva niyametvā vuttaṃ , tasmā āṇatti icchitabbā viya , vīmaṃsitabbaṃ .
‘‘‘ Ekabhaṇḍaṃ ekaṭṭhānan ’ ti ca pāṭho ‘ ekakulassa bhaṇḍan ’ ti vacanato ’’ ti vadanti .