Vehāsaṭṭhakathāvaṇṇanā
97. Chedanamocanādi uparibhāgaṃ sandhāya vuttaṃ .
97. Vehāsaṭṭhakathāyaṃ chinnamatte muttamatteti yathā chinnaṃ muttañca pakatiṭṭhāne na tiṭṭhati , tathā chedanaṃ mocanañca sandhāya vuttaṃ .
97. Vehāsaṭṭhakathāyaṃ pana cīvaravaṃse ṭhapitassa cīvarassa ākaḍḍhane yathāvuttappadesātikkamo ekadvaṅgulamattākaḍḍhanena siyāti adhippāyena vuttaṃ ‘‘ ekadvaṅgulamattākaḍḍhaneneva pārājikan ’’ ti .
Idañca tādisaṃ nātimahantaṃ cīvaravaṃsadaṇḍakaṃ sandhāya vuttaṃ , mahante pana tato adhikamattākaḍḍhaneneva
M2.140 siyā .
Avassaṃ ṭhānato ākāsagataṃ karoti .
Ettha ‘‘ ekakoṭiṃ nīharitvā ṭhapite vaṃse ṭhitassa ākāsakaraṇaṃ sandhāyā ’’ ti keci vadanti .
Te pana atha ‘‘ mūlaṃ acchetvā valayaṃ ito cito ca sāreti , rakkhati .
Sace pana mūlato anīharitvāpi hatthena gahetvā ākāsagataṃ karoti , pārājikan ’’ ti aṭṭhakathāvacanaṃ dassetvā paṭisedhetabbā .Rajjukena bandhitvāti ekāya rajjukoṭiyā cīvaraṃ bandhitvā
V2.124 aparāya koṭiyā cīvaravaṃsaṃ bandhitvā ṭhapitacīvaraṃ .
Muttamatte aṭṭhatvā patanakasabhāvattā ‘‘ mutte pārājikan ’’ ti vuttaṃ .Bhittinissitan ti bhittiyā upatthambhitaṃ sandhāya vuttanti eke .
Ekamekassa phuṭṭhokāsamatte atikkante pārājikan ti bhittiṃ aphusāpetvā ṭhapitattā vuttaṃ .
Bhittiṃ nissāya ṭhapitan ti paṭipāṭiyā ṭhapitesu nāgadantādīsuyeva āropetvā bhittiṃ phusāpetvā ṭhapitaṃ .
Bhittiṃ nissāya ṭhapitan ti nāgadantādīsu ṭhitaṃ sandhāya vuttaṃ .
Chinnamatteti upari uggantvā ṭhitaṃ sandhāya vuttaṃ .
Paṇṇantaraṃ āropetvā ṭhapitāti aññehi ṭhapitaṃ sandhāya vuttaṃ .
Vehāsaṭṭhakathāvaṇṇanā niṭṭhitā .