Paridevo
545. Paridevo nāma ñātibyasanādīhi phuṭṭhassa vacīpalāpo .
So lālappanalakkhaṇo , guṇadosakittanaraso , sambhamapaccupaṭṭhāno .
Dukkho pana saṅkhāradukkhabhāvato dukkhavatthuto ca .
Tenetaṃ vuccati –
‘‘ Yaṃ sokasallavihato paridevamāno ,
Kaṇṭhoṭṭhatālutalasosajamappasayhaṃ ;
Bhiyyodhimattamadhigacchatiyeva dukkhaṃ ,
Dukkhoti tena bhagavā paridevamāhā ’’ ti .
Ayaṃ parideve vinicchayo .