60. Ghabrahmā
Ghaitisaññā ghasaññā tāsaṃ , kaññāsaññātiādīsu ghasaññānaṃ bahuttā bahuvacanena niddeso , gharūpassāti ghassāti ghasaddarūpassa , tathā bho brahmāti ettha tathāti iminā brahmātirūpassa niruttiyaṃ niddiṭṭhattāva ettha saṅgahitabhāvaṃ dasseti .
Evaṃ vivarantīti tasmā sa sakhato gassa akāraākārā ’’ tiādinā evaṃ vivaranti , te hi aca āca ica īca ecāti dvande pubbasarānaṃ lopaṃ katvā ettupasilesaniddesaṃ vaṇṇenti , sāmaññavidhānanti ‘ brahmakattuisi sakhato ’ ccevamavisesetvā sāmaññena kathanaṃ , kimatthanti kiṃ attho payojanaṃ yassa taṃ kimatthaṃ .
Sāmaññavidhānaṃ kimatthampanevaṃ payojanāsaṅkāyaṃ payojanāsaṅkāvicāraṇaṃ manasi nidhāya ‘ āgati gaṇoyan ’ ti vuttattā āha– ‘ atthato ’ ccādi , atthatoti sā matthiyato , anenāti ‘ āgatigaṇoyan ’ ti iminā vacanena , idaṃ vuttaṃ hoti ‘ āgatigaṇoyanti iminā tadākārasaṅkhātajātippadhānagaṇattappakāsanena yadi sambodhane ekārantākārantalābhīnaṃ kattu isi sakha muni bhadantādīnaṃ gahaṇaṃ payojanaṃ na siyā , aññathā anupapajjanaṃ siyāti evamaññathānupapattilakkhaṇasāmatthiyato sāmaññavidhāne payojanamāhe ’’ ti , soyanti iminā vuttiyaṃ ‘ āgati gaṇoyan ’ ti vuttaṃ vacanaṃ nidasseti .