5. Sakkapañhasuttaṃ
118. Ekaṃ
M2.321V2.108 samayaṃ bhagavā rājagahe viharati gijjhakūṭe pabbate .Atha kho sakko devānamindo yena bhagavā tenupasaṅkami ;
upasaṅkamitvā bhagavantaṃ abhivādetvā ekamantaṃ aṭṭhāsi .
Ekamantaṃ ṭhito kho sakko devānamindo bhagavantaṃ etadavoca –
‘‘ ko nu kho , bhante
T4.128 , hetu , ko paccayo yenaP4.102 midhekacce sattā diṭṭheva dhamme no parinibbāyanti ?Ko pana , bhante , hetu , ko paccayo yena midhekacce sattā diṭṭheva dhamme parinibbāyantī ’’ ti ?
‘‘ Santi kho , devānaminda , cakkhuviññeyyā rūpā , iṭṭhā kantā manāpā piyarūpā kāmūpasaṃhitā rajanīyā .
Tañce bhikkhu abhinandati abhivadati ajjhosāya tiṭṭhati .
Tassa taṃ abhinandato abhivadato ajjhosāya tiṭṭhato tannissitaṃ viññāṇaṃ hoti tadupādānaṃ .
Saupādāno , devānaminda , bhikkhu no parinibbāyati … pe ….
‘‘ Santi kho , devānaminda , jivhāviññeyyā rasā … pe … santi kho , devānaminda , manoviññeyyā dhammā , iṭṭhā kantā manāpā piyarūpā kāmūpasaṃhitā rajanīyā .
Tañce bhikkhu abhinandati abhivadati ajjhosāya tiṭṭhati .
Tassa taṃ abhinandato abhivadato ajjhosāya tiṭṭhato tannissitaṃ viññāṇaṃ hoti tadupādānaṃ .
Saupādāno , devānaminda , bhikkhu no parinibbāyati .
Ayaṃ kho , devānaminda , hetu , ayaṃ paccayo yena midhekacce sattā diṭṭheva dhamme no parinibbāyanti .
‘‘ Santi ca kho , devānaminda , cakkhuviññeyyā rūpā , iṭṭhā kantā manāpā piyarūpā kāmūpasaṃhitā rajanīyā .
Tañce bhikkhu nābhinandati nābhivadati nājjhosāya tiṭṭhati .
Tassa taṃ anabhinandato anabhivadato anajjhosāya tiṭṭhato na tannissitaṃ viññāṇaṃ hoti , na tadupādānaṃ .
Anupādāno , devānaminda , bhikkhu parinibbāyati … pe …
T4.129 .‘‘ Santi kho , devānaminda , jivhāviññeyyā rasā … pe … santi kho , devānaminda , manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā .
Tañce bhikkhu nābhinandati nābhivadati nājjhosāya tiṭṭhati .
Tassa taṃ anabhinandato anabhivadato anajjhosāya tiṭṭhato
V2.109 na tannissitaṃ viññāṇaṃ hoti na tadupādānaṃ .Anupādāno , devānaminda , bhikkhu
M2.322 parinibbāyati .Ayaṃ kho , devānaminda , hetu , ayaṃ paccayo yena midhekacce sattā diṭṭheva dhamme parinibbāyantī ’’ ti .
Pañcamaṃ .