11. Sabhiyakaccānasuttaṃ

Author： _System_Pali_VRI_ @ Administrator

11. Sabhiyakaccānasuttaṃ

420. Ekaṃ samayaṃ āyasmā sabhiyo kaccāno ñātike viharati giñjakāvasathe .

Atha kho vacchagotto paribbājako yenāyasmā sabhiyo kaccāno tenupasaṅkami ;

upasaṅkamitvā āyasmatā sabhiyena kaccānena saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinno kho vacchagotto paribbājako āyasmantaṃ sabhiyaṃ kaccānaṃ etadavoca –

‘‘ kiṃ nu kho bho , kaccāna , hoti tathāgato paraṃ maraṇā ’’ ti ?

‘‘ Abyākataṃ kho etaṃ , vaccha , bhagavatā –

‘ hoti tathāgato paraṃ maraṇā ’’’ ti .

‘‘ Kiṃ pana , bho kaccāna , na hoti tathāgato paraṃ maraṇā ’’ ti ?

‘‘ Etampi kho , vaccha , abyākataṃ bhagavatā –

‘ na hoti tathāgato paraṃ maraṇā ’’’ ti .

‘‘ Kiṃ nu kho , bho kaccāna , hoti ca na ca hoti tathāgato paraṃ maraṇā ’’ ti ?

‘‘ Abyākataṃ kho etaṃ , vaccha , bhagavatā –

‘ hoti ca na ca hoti tathāgato paraṃ maraṇā ’’’ ti .

‘‘ KiṃP4.402 pana , bho kaccāna , neva hoti na na hoti tathāgato paraṃ maraṇā ’’ ti ?

‘‘ Etampi kho , vaccha , abyākataṃ bhagavatā –

‘ neva hoti na na hoti tathāgato paraṃ maraṇā ’’’ ti .

‘‘‘ Kiṃ nu kho , bho kaccāna , hoti tathāgato paraṃ maraṇā ’ ti , iti puṭṭho samāno –

‘ abyākataṃ kho etaṃ , vaccha , bhagavatā – hoti tathāgato paraṃ maraṇā ’ ti vadesiT4.488 .

‘ Kiṃ pana , bho kaccāna , na hoti tathāgato paraṃ maraṇā ’ ti , iti puṭṭho samāno –

‘ abyākataṃ kho etaṃ , vaccha , bhagavatā – na hoti tathāgato paraṃ maraṇā ’ ti vadesi .

‘ Kiṃ nu kho , bho kaccāna , hoti ca na ca hoti tathāgato paraṃ maraṇā ’ ti , iti puṭṭho samāno –

‘ abyākataṃ kho etaṃ , vacchaV2.367 , bhagavatā – hoti ca na ca hoti tathāgato paraṃ maraṇā ’ ti vadesi .

‘ Kiṃ pana , bho kaccāna , neva hoti na na hoti tathāgato paraṃ maraṇā ’ ti , iti puṭṭho samāno –

‘ etampi kho , vaccha , abyākataṃ bhagavatā – neva hoti naM2.567 na hoti tathāgato paraṃ maraṇā ’ ti vadesi .

Ko nu kho , bho kaccāna , hetu , ko paccayo , yenetaṃ abyākataṃ samaṇena gotamenā ’’ ti ?

‘‘ Yo ca , vaccha , hetu , yo ca paccayo paññāpanāya rūpīti vā arūpīti vā saññīti vā asaññīti vā nevasaññīnāsaññīti vā , so ca hetu , so ca paccayo sabbena sabbaṃ sabbathā sabbaṃ aparisesaṃ nirujjheyya .

Kena naṃ paññāpayamāno paññāpeyya rūpīti vā arūpīti vā saññīti vā asaññīti vā nevasaññīnāsaññīti vā ’’ ti .

‘‘ Kīvaciraṃ pabbajitosi , bho kaccānā ’’ ti ?

‘‘ Naciraṃ , āvuso , tīṇi vassānī ’’ ti .

‘‘ Yassapa ’ ssa , āvuso , etamettakena ettakameva taṃpa ’ ssa bahu , ko pana vādo evaṃ [ ko pana vādo eva ( sī . pī .)] abhikkante ’’ ti !

Ekādasamaṃ .

AbyākatasaṃyuttaṃP4.403 samattaṃ .

Tassuddānaṃ –

KhemātherīT4.489 anurādho , sāriputtoti koṭṭhiko ;

Moggallāno ca vaccho ca , kutūhalasālānando ;

Sabhiyo ekādasamanti ;

Saḷāyatanavaggo catuttho .

Tassuddānaṃ –

Saḷāyatanavedanā , mātugāmo jambukhādako ;

Sāmaṇḍako moggallāno , citto gāmaṇi saṅkhataṃ ;

Abyākatanti dasadhāti .

Saḷāyatanavaggasaṃyuttapāḷi niṭṭhitā .

Issues

Select Version

Saḷāyatanavaggo

Saḷāyatanavaggo