10. Ānandasuttaṃ
419. Atha
T4.486 kho vacchagotto paribbājako yena bhagavā tenupasaṅkami ;upasaṅkamitvā bhagavatā saddhiṃ sammodi .
Sammodanīyaṃ kathaṃ sāraṇīyaṃ vītisāretvā ekamantaṃ nisīdi .
Ekamantaṃ nisinno kho vacchagotto paribbājako bhagavantaṃ etadavoca –
‘‘ kiṃ nu kho , bho gotama , atthattā ’’ ti ?
Evaṃ vutte , bhagavā tuṇhī ahosi .
‘‘ Kiṃ pana , bho gotama , natthattā ’’ ti ?
Dutiyampi kho bhagavā tuṇhī ahosi .
Atha kho vacchagotto paribbājako uṭṭhāyāsanā pakkāmi .
Atha kho āyasmā ānando acirapakkante vacchagotte paribbājake bhagavantaṃ etadavoca –
‘‘ kiṃ nu kho , bhante , bhagavā vacchagottassa paribbājakassa pañhaṃ puṭṭho na byākāsī ’’ ti ?
‘‘ Ahañcānanda , vacchagottassa paribbājakassa ‘ atthattā ’ ti puṭṭho samāno ‘ atthattā ’ ti byākareyyaṃ , ye te , ānanda , samaṇabrāhmaṇā sassatavādā tesametaṃ saddhiṃ [ tesametaṃ laddhi ( sī .)] abhavissa .
Ahañcānanda , vacchagottassa paribbājakassa ‘ natthattā ’ ti puṭṭho samāno ‘ natthattā ’ ti byākareyyaṃ , ye te , ānanda , samaṇabrāhmaṇā
P4.401 ucchedavādā tesametaṃ saddhiṃ abhavissa .Ahañcānanda , vacchagottassa paribbājakassa ‘ atthattā ’ ti puṭṭho samāno ‘ atthattā ’ ti byākareyyaṃ , api
V2.366 nu me taṃ , ānanda , anulomaṃ abhavissa ñāṇassa uppādāya –‘ sabbe dhammā anattā ’’’ ti ?
‘‘ No hetaṃ , bhante ’’.
‘‘ Ahañcānanda , vacchagottassa paribbājakassa
M2.566 ‘ natthattā ’ ti puṭṭho samāno ‘ natthattā ’ ti byākareyyaṃT4.487 , sammūḷhassa , ānanda , vacchagottassa paribbājakassa bhiyyo sammohāya abhavissa –‘ ahuvā me nūna pubbe attā , so etarahi natthī ’’’ ti .
Dasamaṃ .