6. Moggallānasaṃyuttaṃ

1. Paṭhamajhānapañhāsuttaṃ

332. EkaṃT4.323V2.257M2.457 samayaṃ āyasmā mahāmoggallāno sāvatthiyaṃ viharati jetavane anāthapiṇḍikassa ārāme .

TatraP4.263 kho āyasmā mahāmoggallāno bhikkhū āmantesi –

‘‘ āvuso , bhikkhave ’’ ti .

‘‘ Āvuso ’’ ti kho te bhikkhū āyasmato mahāmoggallānassa paccassosuṃ .

Āyasmā mahāmoggallāno etadavoca –

‘‘ Idha mayhaṃ , āvuso , rahogatassa paṭisallīnassa evaṃ cetaso parivitakko udapādi –

‘ paṭhamaṃ jhānaṃ , paṭhamaṃ jhānan ’ ti vuccati .

Katamaṃ nu kho paṭhamaṃ jhānanti ?

Tassa mayhaṃ , āvuso , etadahosi –

‘ idha bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati .

Idaṃ vuccati paṭhamaṃ jhānan ’ ti .

So khvāhaṃ , āvuso , vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi .

Tassa mayhaṃ , āvuso , iminā vihārena viharato kāmasahagatā saññāmanasikārā samudācaranti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , paṭhamaṃ jhānaṃ pamādo , paṭhame jhāne cittaṃ saṇṭhapehi , paṭhame jhāne cittaṃ ekodiṃ karohi [ ekodikarohi ( pī .)], paṭhame jhāne cittaṃ samādahā ’ ti .

So khvāhaṃ , āvuso , aparena samayena vivicceva kāmehi vivicca akusalehi dhammehiT4.324 savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja vihāsiṃ .

Yañhi taṃ , āvuso , sammā vadamāno vadeyya –

‘ satthārānuggahito sāvako mahābhiññataṃ patto ’ ti , mamaṃ taṃ sammā vadamāno vadeyya –

‘ satthārānuggahito sāvako mahābhiññataṃ patto ’’’ ti .

Paṭhamaṃ .

2. Dutiyajhānapañhāsuttaṃ

333.‘‘‘ DutiyaṃV2.258M2.458 jhānaṃ , dutiyaṃ jhānan ’ ti vuccati .

Katamaṃ nu kho dutiyaṃ jhānanti ?

Tassa mayhaṃ , āvuso , etadahosi –

‘ idha bhikkhu vitakkavicārānaṃP4.264 vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati .

Idaṃ vuccati dutiyaṃ jhānan ’ ti .

So khvāhaṃ , āvuso , vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharāmi .

Tassa mayhaṃ , āvuso , iminā vihārena viharato vitakkasahagatā saññāmanasikārā samudācaranti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , dutiyaṃ jhānaṃ pamādo , dutiye jhāne cittaṃ saṇṭhapehi , dutiye jhāne cittaṃ ekodiṃ karohi , dutiye jhāne cittaṃ samādahā ’ ti .

So khvāhaṃ , āvuso , aparena samayena vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja vihāsiṃ .

Yañhi taṃ , āvuso , sammā vadamāno vadeyya –

‘ satthārānuggahito sāvako mahābhiññataṃ patto ’ ti , mamaṃ taṃT4.325 sammā vadamāno vadeyya –

‘ satthārānuggahito sāvako mahābhiññataṃ patto ’’’ ti .

Dutiyaṃ .

3. Tatiyajhānapañhāsuttaṃ

334.‘‘‘ Tatiyaṃ jhānaṃ , tatiyaṃ jhānan ’ ti vuccati .

Katamaṃ nu kho tatiyaṃ jhānanti ?

Tassa mayhaṃ , āvuso , etadahosi – idha bhikkhu pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti , yaṃ taṃ ariyā ācikkhanti –

‘ upekkhako satimā sukhavihārī ’ ti tatiyaṃ jhānaṃ upasampajja viharati .

Idaṃ vuccati tatiyaṃ jhānanti .

So khvāhaṃ , āvuso , pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi .

Yaṃ taṃ ariyā ācikkhanti –

‘ upekkhako satimā sukhavihārī ’ ti tatiyaṃ jhānaṃ upasampajja viharāmi .

Tassa mayhaṃ , āvuso , iminā vihārena viharato pītisahagatā saññāmanasikārā samudācaranti .

‘‘ AthaV2.259M2.459P4.265 kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , tatiyaṃ jhānaṃ pamādo , tatiye jhāne cittaṃ saṇṭhapehi , tatiye jhāne cittaṃ ekodiṃ karohi , tatiye jhāne cittaṃ samādahā ’ ti .

So khvāhaṃ , āvuso , aparena samayena pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi , yaṃ taṃ ariyā ācikkhanti –

‘ upekkhako satimā sukhavihārī ’ ti tatiyaṃ jhānaṃ upasampajja vihāsiṃ .

Yañhi taṃ āvuso sammā vadamāno vadeyya … pe … mahābhiññataṃ patto ’’ ti .

Tatiyaṃ .

4. Catutthajhānapañhāsuttaṃ

335.‘‘‘ Catutthaṃ jhānaṃT4.326 , catutthaṃ jhānan ’ ti vuccati .

Katamaṃ nu kho catutthaṃ jhānanti ?

Tassa mayhaṃ , āvuso , etadahosi –

‘ idha bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharati .

Idaṃ vuccati catutthaṃ jhānan ’ ti .

So khvāhaṃ , āvuso , sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharāmi .

Tassa mayhaṃ , āvuso , iminā vihārena viharato sukhasahagatā saññāmanasikārā samudācaranti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , catutthaṃ jhānaṃ pamādo , catutthe jhāne cittaṃ saṇṭhapehi , catutthe jhāne cittaṃ ekodiṃ karohi , catutthe jhāne cittaṃ samādahā ’ ti .

So khvāhaṃ , āvuso , aparena samayena sukhassa ca pahānā dukkhassa ca pahānā pubbeva somanassadomanassānaṃP4.266 atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja vihāsiṃ .

Yañhi taṃ , āvuso , sammā vadamāno vadeyya … pe … mahābhiññataṃ patto ’’ ti .

Catutthaṃ .

5. Ākāsānañcāyatanapañhāsuttaṃ

336.‘‘‘ Ākāsānañcāyatanaṃ , ākāsānañcāyatanan ’ ti vuccati .

Katamaṃ nu kho ākāsānañcāyatanantiV2.260 ?

Tassa mayhaṃ , āvuso , etadahosi –

‘ idhaM2.460 bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃT4.327 amanasikārā ananto ākāsoti ākāsānañcāyatanaṃ upasampajja viharati .

Idaṃ vuccati ākāsānañcāyatanan ’ ti .

So khvāhaṃ , āvuso , sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja viharāmi .

Tassa mayhaṃ , āvuso , iminā vihārena viharato rūpasahagatā saññāmanasikārā samudācaranti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , ākāsānañcāyatanaṃ pamādo , ākāsānañcāyatane cittaṃ saṇṭhapehi , ākāsānañcāyatane cittaṃ ekodiṃ karohi , ākāsānañcāyatane cittaṃ samādahā ’ ti .

So khvāhaṃ , āvuso , aparena samayena sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja vihāsiṃ .

Yañhi taṃ , āvuso , sammā vadamāno vadeyya … pe … mahābhiññataṃ patto ’’ ti .

Pañcamaṃ .

6. Viññāṇañcāyatanapañhāsuttaṃ

337.‘‘‘ Viññāṇañcāyatanaṃ , viññāṇañcāyatanan ’ ti vuccati .

Katamaṃ nu kho viññāṇañcāyatananti ?

TassaP4.267 mayhaṃ , āvuso , etadahosi –

‘ idha bhikkhu sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja viharati .

Idaṃ vuccati viññāṇañcāyatanan ’ ti .

So khvāhaṃ , āvuso , sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja viharāmiT4.328 .

Tassa mayhaṃ , āvuso , iminā vihārena viharato ākāsānañcāyatanasahagatā saññāmanasikārā samudācaranti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , viññāṇañcāyatanaṃ pamādo , viññāṇañcāyataneV2.261 cittaṃ saṇṭhapehi , viññāṇañcāyatane cittaṃ ekodiṃ karohi , viññāṇañcāyatane cittaṃ samādahā ’ ti .

So khvāhaṃ , āvuso , aparena samayena sabbaso ākāsānañcāyatanaṃ samatikkamma anantaṃ viññāṇantiM2.461 viññāṇañcāyatanaṃ upasampajja vihāsiṃ .

Yañhi taṃ , āvuso , sammā vadamāno vadeyya … pe … mahābhiññataṃ patto ’’ ti .

Chaṭṭhaṃ .

7. Ākiñcaññāyatanapañhāsuttaṃ

338.‘‘‘ Ākiñcaññāyatanaṃ , ākiñcaññāyatanan ’ ti vuccati .

Katamaṃ nu kho ākiñcaññāyatananti ?

Tassa mayhaṃ , āvuso , etadahosi –

‘ idha bhikkhu sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharati .

Idaṃ vuccati ākiñcaññāyatanan ’ ti .

So khvāhaṃ , āvuso , sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharāmi .

Tassa mayhaṃ , āvuso , iminā vihārena viharato viññāṇañcāyatanasahagatā saññāmanasikārā samudācaranti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , ākiñcaññāyatanaṃ pamādo , ākiñcaññāyatane cittaṃ saṇṭhapehi , ākiñcaññāyataneP4.268 cittaṃ ekodiṃ karohi , ākiñcaññāyataneT4.329 cittaṃ samādahā ’ ti .

So khvāhaṃ , āvuso , aparena samayena sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihāsiṃ .

Yañhi taṃ , āvuso , sammā vadamāno vadeyya … pe … mahābhiññataṃ patto ’’ ti .

Sattamaṃ .

8. Nevasaññānāsaññāyatanapañhāsuttaṃ

339.‘‘‘ Nevasaññānāsaññāyatanaṃ , nevasaññānāsaññāyatanan ’ ti vuccati .

Katamaṃ nu kho nevasaññānāsaññāyatananti ?

Tassa mayhaṃ , āvuso , etadahosi –

‘ idha bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati .

Idaṃ vuccati nevasaññānāsaññāyatanan ’ ti .

So khvāhaṃ , āvuso , sabbaso ākiñcaññāyatanaṃ samatikkamma nevasaññānāsaññāyatanaṃV2.262 upasampajja viharāmi .

Tassa mayhaṃ , āvuso , iminā vihārena viharato ākiñcaññāyatanasahagatā saññāmanasikārā samudācaranti .

‘‘ AthaM2.462 kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , nevasaññānāsaññāyatanaṃ pamādo , nevasaññānāsaññāyatane cittaṃ saṇṭhapehi , nevasaññānāsaññāyatane cittaṃ ekodiṃ karohi , nevasaññānāsaññāyatane cittaṃ samādahā ’ ti .

So khvāhaṃ , āvuso , aparena samayena sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihāsiṃ .

Yañhi taṃ , āvuso , sammā vadamāno vadeyya … pe … mahābhiññataṃ patto ’’ ti .

Aṭṭhamaṃ .

9. Animittapañhāsuttaṃ

340.‘‘‘ AnimittoT4.330 cetosamādhi , animitto cetosamādhī ’ ti vuccati .

Katamo nu kho animitto cetosamādhīti ?

Tassa mayhaṃ , āvuso , etadahosi –

‘ idha bhikkhu sabbanimittānaṃP4.269 amanasikārā animittaṃ cetosamādhiṃ upasampajja viharati .

Ayaṃ vuccati animitto cetosamādhī ’ ti .

So khvāhaṃ , āvuso , sabbanimittānaṃ amanasikārā animittaṃ cetosamādhiṃ upasampajja viharāmi .

Tassa mayhaṃ , āvuso , iminā vihārena viharato nimittānusāri viññāṇaṃ hoti .

‘‘ Atha kho maṃ , āvuso , bhagavā iddhiyā upasaṅkamitvā etadavoca –

‘ moggallāna , moggallāna !

Mā , brāhmaṇa , animittaṃ cetosamādhiṃ pamādo , animitte cetosamādhismiṃ cittaṃ saṇṭhapehi , animitte cetosamādhismiṃ cittaṃ ekodiṃ karohi , animitte cetosamādhismiṃ cittaṃ samādahā ’ ti .

So khvāhaṃ , āvuso , aparena samayena sabbanimittānaṃ amanasikārā animittaṃ cetosamādhiṃ upasampajja vihāsiṃ .

Yañhi taṃ , āvuso , sammā vadamāno vadeyya –

‘ satthārānuggahito sāvako mahābhiññataṃ patto ’ ti , mamaṃ taṃ sammā vadamāno vadeyya –

‘ satthārānuggahito sāvako mahābhiññataṃ patto ’’’ ti .

Navamaṃ .

10. Sakkasuttaṃ

341. AthaV2.263 kho āyasmā mahāmoggallāno – seyyathāpi nāma balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya ;

evameva – jetavane antarahito devesu tāvatiṃsesu pāturahosiM2.463 .

Atha kho sakko devānamindo pañcahi devatāsatehi saddhiṃT4.331 yenāyasmā mahāmoggallāno tenupasaṅkami ;

upasaṅkamitvāP4.270 āyasmantaṃ mahāmoggallānaṃ abhivādetvā ekamantaṃ aṭṭhāsi .

Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca –

‘‘ Sādhu kho , devānaminda , buddhasaraṇagamanaṃ [ buddhaṃ saraṇagamanaṃ ( sī .)] hoti .

Buddhasaraṇagamanahetu [ buddhaṃ saraṇagamanahetu ( sī .)] kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , devānaminda , dhammasaraṇagamanaṃ hoti .

Dhammasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , devānaminda , saṅghasaraṇagamanaṃ hoti .

Saṅghasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

‘‘ Sādhu kho , mārisa moggallāna , buddhasaraṇagamanaṃ hoti .

Buddhasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , mārisa moggallāna , dhammasaraṇagamanaṃ hoti .

Dhammasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , mārisa moggallāna , saṅgha … pe … sugatiṃ saggaṃ lokaṃ upapajjantī ’’ ti .

Atha kho sakko devānamindo chahi devatāsatehi saddhiṃ … pe … atha kho sakko devānamindo sattahi devatāsatehi saddhiṃ … pe … athaT4.332 kho sakko devānamindo aṭṭhahi devatāsatehi saddhiṃ … pe … atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami ;

upasaṅkamitvā āyasmantaṃ mahāmoggallānaṃ abhivādetvāV2.264 ekamantaṃ aṭṭhāsi .

Ekamantaṃ ṭhitaṃ kho sakkaṃ devānamindaṃ āyasmāP4.271 mahāmoggallāno etadavoca –

‘‘ Sādhu kho , devānaminda , buddhasaraṇagamanaṃ hoti .

Buddhasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , devānaminda , dhammasaraṇagamanaṃ hoti .

DhammasaraṇagamanahetuM2.464 kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , devānaminda , saṅghasaraṇagamanaṃ hoti .

Saṅghasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

‘‘ Sādhu kho , mārisa moggallāna , buddhasaraṇagamanaṃ hoti .

Buddhasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Sādhu kho , mārisa moggallāna , dhammasaraṇagamanaṃ hoti … pe … sādhu kho , mārisa moggallāna , saṅghasaraṇagamanaṃ hoti .

Saṅghasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

AthaT4.333 kho sakko devānamindo pañcahi devatāsatehi saddhiṃ yenāyasmā mahāmoggallāno tenupasaṅkami ;

upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi .

Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca –

‘‘ Sādhu kho , devānaminda , buddhe aveccappasādena samannāgamanaṃ hoti –

‘ itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , devānaminda , dhamme aveccappasādena samannāgamanaṃ hoti –

‘ svākkhātoP4.272 bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī ’ tiV2.265 .

Dhamme aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , devānaminda , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho , ujuppaṭipanno bhagavato sāvakasaṅghoM2.465 , ñāyappaṭipanno bhagavato sāvakasaṅgho , sāmīcippaṭipanno bhagavato sāvakasaṅgho , yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃT4.334 lokassā ’ ti .

Saṅghe aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , devānaminda , ariyakantehi sīlehi samannāgamanaṃ hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṃvattanikehi .

Ariyakantehi sīlehi samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

‘‘ Sādhu kho , mārisa moggallāna , buddhe aveccappasādena samannāgamanaṃ hoti –

‘ itipi so … pe … satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisa moggallāna , dhamme aveccappasādena samannāgamanaṃ hoti –

‘ svākkhāto bhagavatā dhammo … pe … paccattaṃ veditabbo viññūhī ’ ti .

Dhamme aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisa moggallāna , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho … pe … anuttaraṃ puññakkhettaṃP4.273 lokassā ’ ti .

Saṅghe aveccappasādenaV2.266 samannāgamanahetu kho , mārisa moggallāna , evamidhekacceT4.335 sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisa moggallāna , ariyakantehi sīlehi samannāgamanaṃ hoti akhaṇḍehi … pe … samādhisaṃvattanikehi .

Ariyakantehi sīlehi samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

AthaM2.466 kho sakko devānamindo chahi devatāsatehi saddhiṃ … pe ….

Atha kho sakko devānamindo sattahi devatāsatehi saddhiṃ … pe ….

Atha kho sakko devānamindo aṭṭhahi devatāsatehi saddhiṃ … pe ….

Atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami ;

upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi .

Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca –

‘‘ Sādhu kho , devānaminda , buddhe aveccappasādena samannāgamanaṃ hoti –

‘ itipi so bhagavā … pe … satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , devānaminda , dhamme aveccappasādena samannāgamanaṃ hoti –

‘ svākkhāto bhagavatā dhammo … pe … paccattaṃT4.336 veditabbo viññūhī ’ ti .

Dhamme aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , devānaminda , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho … pe … anuttaraṃ puññakkhettaṃ lokassā ’ ti .

Saṅghe aveccappasādena samannāgamanahetuV2.267 kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantiP4.274 .

‘‘ Sādhu kho , devānaminda , ariyakantehi sīlehi samannāgamanaṃ hoti akhaṇḍehi … pe … samādhisaṃvattanikehi .

Ariyakantehi sīlehi samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

‘‘ Sādhu kho , mārisa moggallāna , buddhe aveccappasādena samannāgamanaṃ hoti –

‘ itipi so bhagavā … pe … satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ SādhuM2.467 kho , mārisa moggallāna , dhamme aveccappasādena samannāgamanaṃ hoti –

‘ svākkhāto bhagavatā dhammo … pe … paccattaṃ veditabbo viññūhī ’ ti .

Dhamme aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisaT4.337 moggallāna , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho … pe … anuttaraṃ puññakkhettaṃ lokassā ’ ti .

Saṅghe aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisa moggallāna , ariyakantehi sīlehi samannāgamanaṃ hoti akhaṇḍehi … pe … samādhisaṃvattanikehi .

Ariyakantehi sīlehi samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī ’’ ti .

Atha kho sakko devānamindo pañcahi devatāsatehi saddhiṃ yenāyasmā mahāmoggallāno tenupasaṅkamiV2.268 … pe … ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca –

‘‘ Sādhu kho , devānaminda , buddhasaraṇagamanaṃ hoti .

Buddhasaraṇagamanahetu kho , devānaminda , evamidhekacce sattā kāyassa bhedāP4.275 paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā , dibbena vaṇṇena , dibbena sukhena , dibbena yasena , dibbena ādhipateyyena , dibbehi rūpehi , dibbehi saddehi , dibbehi gandhehi , dibbehi rasehi , dibbehi phoṭṭhabbehi .

‘‘ Sādhu kho , devānaminda , dhammasaraṇagamanaṃ hoti .

Dhammasaraṇagamanahetu kho , devānaminda , evamidhekacce sattā kāyassaT4.338 bhedā paraṃ maraṇā sugatiṃ saggaṃ lokaṃ upapajjanti .

‘‘ SādhuM2.468 kho , devānaminda , saṅghasaraṇagamanaṃ hoti .

Saṅghasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisa moggallāna , buddhasaraṇagamanaṃ hoti .

Buddhasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , mārisa moggallāna , dhammasaraṇagamanaṃ hoti … pe ….

‘‘ SādhuV2.269 kho , mārisa moggallāna , saṅghasaraṇagamanaṃ hoti .

Saṅghasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā , dibbena vaṇṇena , dibbena sukhena , dibbenaT4.339 yasena , dibbena ādhipateyyena , dibbehi rūpehi , dibbehi saddehi , dibbehi gandhehi , dibbehi rasehi , dibbehi phoṭṭhabbehī ’’ ti .

Atha kho sakko devānamindo chahi devatāsatehi saddhiṃ … pe … atha kho sakko devānamindo sattahi devatāsatehi saddhiṃ … pe … athaP4.276 kho sakko devānamindo aṭṭhahi devatāsatehi saddhiṃ … pe … atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami ;

upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi .

Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavoca –

‘‘ Sādhu kho , devānaminda , buddhasaraṇagamanaṃ hoti .

Buddhasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , devānaminda , dhammasaraṇagamanaṃ hoti … pe ….

‘‘ SādhuM2.469 kho , devānaminda , saṅghasaraṇagamanaṃ hoti .

Saṅghasaraṇagamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā , dibbena vaṇṇena , dibbena sukhena , dibbena yasena , dibbena ādhipateyyena , dibbehi rūpehi , dibbehi saddehiT4.340 , dibbehi gandhehi , dibbehi rasehi , dibbehi phoṭṭhabbehī ’’ ti .

‘‘ Sādhu kho , mārisa moggallāna , buddhasaraṇagamanaṃ hoti … pe … sādhu kho , mārisa moggallāna , dhammasaraṇagamanaṃ hoti … pe … sādhu kho mārisa moggallāna , saṅghasaraṇagamanaṃ hoti .

Saṅghasaraṇagamanahetu kho , mārisa moggallāna , evamidhekacce sattā kāyassa bhedā paraṃ maraṇāV2.270 sugatiṃ saggaṃ lokaṃ upapajjanti .

Atha kho sakko devānamindo pañcahi devatāsatehi saddhiṃ yenāyasmā mahāmoggallāno tenupasaṅkami ;

upasaṅkamitvā āyasmantaṃ mahāmoggallānaṃ abhivādetvā ekamantaṃ aṭṭhāsi .

EkamantaṃP4.277 ṭhitaṃ kho sakkaṃ devānamindaṃ āyasmā mahāmoggallāno etadavoca –

‘‘ Sādhu kho , devānaminda , buddhe aveccappasādena samannāgamanaṃ hoti –

‘ itipi so bhagavā … pe … satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , devānamindaT4.341 , dhamme aveccappasādena samannāgamanaṃ hoti –

‘ svākkhāto bhagavatā dhammo … pe … paccattaṃ veditabbo viññūhī ’ ti .

Dhamme aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti … pe ….

‘‘ Sādhu kho , devānaminda , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho … pe … lokassā ’ ti .

Saṅghe aveccappasādenaM2.470 samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti … pe ….

‘‘ Sādhu kho , devānaminda , ariyakantehi sīlehi samannāgamanaṃ hoti akhaṇḍehi … pe … samādhisaṃvattanikehi .

Ariyakantehi sīlehi samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehī ’’ ti .

‘‘ SādhuV2.271 kho , mārisa moggallāna , buddhe aveccappasādena samannāgamanaṃ hoti –

‘ itipi so bhagavā … pe … satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , mārisa moggallāna , dhamme aveccappasādena samannāgamanaṃ hoti –

‘ svākkhāto bhagavatā dhammo … pe … paccattaṃ veditabbo viññūhī ’ ti .

Dhamme aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , mārisa moggallāna , saṅgheT4.342 aveccappasādena samannāgamanaṃ hoti –

‘ suppaṭipanno bhagavato sāvakasaṅgho … pe … lokassā ’ ti .

Saṅghe aveccappasādena samannāgamanahetu kho , mārisa moggallānaP4.278 , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti … pe ….

‘‘ Sādhu kho , mārisa moggallāna , ariyakantehi sīlehi samannāgamanaṃ hoti akhaṇḍehi … pe … samādhisaṃvattanikehi .

Ariyakantehi sīlehi samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehī ’’ ti .

AthaM2.471 kho sakko devānamindo chahi devatāsatehi saddhiṃ … pe … atha kho sakko devānamindo sattahi devatāsatehi saddhiṃ … pe … atha kho sakko devānamindo aṭṭhahi devatāsatehi saddhiṃ … pe … atha kho sakko devānamindo asītiyā devatāsahassehi saddhiṃ yenāyasmā mahāmoggallāno tenupasaṅkami ;

upasaṅkamitvā āyasmantaṃ mahāmoggallānaṃ abhivādetvāV2.272 ekamantaṃ aṭṭhāsi .

Ekamantaṃ ṭhitaṃ kho sakkaṃ devānamindaṃ āyasmā mahāmoggallāno etadavocaT4.343 –

‘‘ Sādhu kho , devānaminda , buddhe aveccappasādena samannāgamanaṃ hoti –

‘ itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , devānaminda , dhamme aveccappasādena samannāgamanaṃ hoti –

‘ svākkhāto bhagavatāP4.279 dhammo sandiṭṭhiko akāliko ehipassiko opaneyyiko paccattaṃ veditabbo viññūhī ’ ti .

Dhamme aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , devānaminda , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho , ujuppaṭipanno bhagavato sāvakasaṅgho , ñāyappaṭipanno bhagavato sāvakasaṅgho , sāmīcippaṭipanno bhagavato sāvakasaṅgho , yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyoT4.344 añjalikaraṇīyo anuttaraṃ puññakkhettaṃ lokassā ’ ti .

Saṅghe aveccappasādena samannāgamanahetu kho , devānaminda , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

TeM2.472 aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

Ariyakantehi sīlehi samannāgamanahetu kho , devānaminda , evamidhekacce sattāV2.273 kāyassa bhedā paraṃ maraṇā sugatiṃ saggaṃ lokaṃ upapajjanti .

‘‘ Sādhu kho , mārisa moggallāna , buddhe aveccappasādena samannāgamanaṃ hoti –

‘ itipi so bhagavā … pe … satthā devamanussānaṃ buddho bhagavā ’ ti .

Buddhe aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , mārisa moggallāna , dhamme aveccappasādena samannāgamanaṃ hoti –

‘ svākkhātoT4.345 bhagavatā dhammo … pe … paccattaṃ veditabbo viññūhī ’ ti .

Dhamme aveccappasādena samannāgamanahetu kho , mārisa moggallāna , evamidhekacceP4.280 sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , mārisa moggallāna , saṅghe aveccappasādena samannāgamanaṃ hoti –

‘ suppaṭipanno bhagavato sāvakasaṅgho … pe … anuttaraṃ puññakkhettaṃ lokassā ’ ti .

Saṅghe aveccappasādena samannāgamanahetu kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā … pe … dibbehi phoṭṭhabbehi .

‘‘ Sādhu kho , mārisa moggallāna , ariyakantehi sīlehi samannāgamanaṃ hoti akhaṇḍehi … pe … samādhisaṃvattanikehi .

Ariyakantehi sīlehi samannāgamanahetuM2.473 kho , mārisa moggallāna , evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjanti .

Te aññe deve dasahi ṭhānehi adhigaṇhanti – dibbena āyunā , dibbena vaṇṇena , dibbena sukhenaV2.274 , dibbena yasena , dibbena ādhipateyyena , dibbehi rūpehi , dibbehi saddehi , dibbehi gandhehi , dibbehi rasehi , dibbehi phoṭṭhabbehī ’’ ti .

Dasamaṃ .

11. Candanasuttaṃ

342. Atha kho candano [ nandano ( sī .)] devaputto … pe ….

Atha kho suyāmo devaputto … pe …T4.346 .

Atha kho santusito devaputto … pe ….

Atha kho sunimmito devaputto … pe ….

Atha kho vasavatti devaputto … pe ….

( Yathā sakkasuttaṃ tathā ime pañca peyyālā vitthāretabbā ).

Ekādasamaṃ .

MoggallānasaṃyuttaṃP4.281 samattaṃ .

Tassuddānaṃ –

Savitakkāvitakkañca , sukhena ca upekkhako ;

Ākāsañceva viññāṇaṃ , ākiñcaṃ nevasaññinā ;

Animitto ca sakko ca , candanekādasena cāti .

Issues

Select Version

Saḷāyatanavaggo

Saḷāyatanavaggo