7. Upasenaāsīvisasuttaṃ

Author： _System_Pali_VRI_ @ Administrator

69. Ekaṃ samayaṃ āyasmā ca sāriputto āyasmā ca upaseno rājagahe viharanti sītavane sappasoṇḍikapabbhāre .

Tena kho pana samayena āyasmato upasenassa kāye āsīviso patitoT4.49 hoti .

Atha kho āyasmā upaseno bhikkhū āmantesi –

‘‘ etha me , āvuso , imaṃ kāyaṃ mañcakaṃ āropetvā bahiddhā nīharatha .

Purāyaṃ kāyo idheva vikirati ;

seyyathāpi bhusamuṭṭhī ’’ ti .

EvaṃV2.44 vutte , āyasmā sāriputto āyasmantaṃ upasenaṃ etadavoca –

‘‘ na kho pana mayaṃ passāma āyasmato upasenassa kāyassa vā aññathattaṃ indriyānaṃ vā vipariṇāmaṃ .

Atha ca panāyasmā upaseno evamāha –

‘ etha me , āvuso , imaṃ kāyaṃ mañcakaṃ āropetvā bahiddhā nīharatha .

Purāyaṃ kāyo idheva vikirati ;

seyyathāpi bhusamuṭṭhī ’’’ ti .

‘‘ Yassa nūna , āvuso sāriputta , evamassa –

‘ ahaṃ cakkhūti vā mama cakkhūti vā … pe … ahaṃ jivhāti vā mamaM2.268 jivhāti vā … ahaṃ manoti vā mama manoti vā ’.

Tassa , āvuso sāriputta , siyā kāyassa vā aññathattaṃ indriyānaṃ vā vipariṇāmo .

Mayhañca kho , āvuso sāriputta , na evaṃ hotiP4.41 –

‘ ahaṃ cakkhūti vā mama cakkhūti vā … pe … ahaṃ jivhāti vā mama jivhāti vā … pe … ahaṃ manoti vā mama manoti vā ’.

Tassa mayhañca kho , āvuso sāriputta , kiṃ kāyassa vā aññathattaṃ bhavissati , indriyānaṃ vā vipariṇāmo ’’ ti !

‘‘ Tathā hi panāyasmato upasenassa dīgharattaṃ ahaṅkāramamaṅkāramānānusayo susamūhato .

Tasmā āyasmato upasenassa na evaṃ hoti –

‘ ahaṃ cakkhūti vā mama cakkhūti vā … pe … ahaṃ jivhāti vā mama jivhāti vā … pe … ahaṃ manoti vā mama manoti vā ’’’ ti .

AthaT4.50 kho te bhikkhū āyasmato upasenassa kāyaṃ mañcakaṃ āropetvā bahiddhā nīhariṃsu .

Atha kho āyasmato upasenassa kāyo tattheva vikiri ;

seyyathāpi bhusamuṭṭhīti .

Sattamaṃ .