2. Tālapuṭasuttaṃ

Author： _System_Pali_VRI_ @ Administrator

2. Tālapuṭasuttaṃ

354. Ekaṃ samayaṃ bhagavā rājagahe viharati veḷuvane kalandakanivāpe .

Atha kho tālapuṭo [ tālaputto ( sī . syā . kaṃ .)] naṭagāmaṇi yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinno kho tālapuṭo naṭagāmaṇi bhagavantaṃ etadavoca –

‘‘ sutaṃ metaṃ , bhante , pubbakānaṃ ācariyapācariyānaṃ naṭānaṃ bhāsamānānaṃ –

‘ yo so naṭo raṅgamajjhe samajjamajjhe saccālikena janaṃ hāseti rameti , soT4.378 kāyassa bhedā paraṃ maraṇā pahāsānaṃ devānaṃ sahabyataṃ upapajjatī ’ ti .

Idha bhagavā kimāhā ’’ ti ?

‘‘ Alaṃ , gāmaṇi , tiṭṭhatetaṃ .

Mā maṃ etaṃ pucchī ’’ ti .

Dutiyampi kho tālapuṭo naṭagāmaṇi bhagavantaṃ etadavoca –

‘‘ sutaṃ metaṃ , bhante , pubbakānaṃ ācariyapācariyānaṃ naṭānaṃ bhāsamānānaṃ –

‘ yo so naṭo raṅgamajjhe samajjamajjhe saccālikena janaṃ hāseti rameti , so kāyassa bhedā paraṃ maraṇā pahāsānaṃ devānaṃ sahabyataṃ upapajjatī ’ ti .

Idha bhagavā kimāhā ’’ ti ?

‘‘ Alaṃ , gāmaṇi , tiṭṭhatetaṃ .

Mā maṃ etaṃ pucchī ’’ ti .

Tatiyampi kho tālapuṭo naṭagāmaṇi bhagavantaṃ etadavoca –

‘‘ sutaṃ metaṃ , bhante , pubbakānaṃ ācariyapācariyānaṃ naṭānaṃ bhāsamānānaṃ –

‘ yo so naṭo raṅgamajjhe samajjamajjhe saccālikena janaṃ hāseti rameti , soP4.307 kāyassa bhedā paraṃ maraṇā pahāsānaṃ devānaṃ sahabyataṃ upapajjatī ’ ti .

Idha bhagavā kimāhā ’’ ti ?

‘‘ Addhā kho tyāhaṃ , gāmaṇi , na labhāmi [ nālatthaṃ ( syā . kaṃ . pī . ka .)]–

‘ alaṃ , gāmaṇi , tiṭṭhatetaṃ , mā maṃ etaṃ pucchī ’ ti .

Api ca tyāhaṃ byākarissāmi .

Pubbe kho , gāmaṇi , sattā avītarāgā rāgabandhanabaddhā .

Tesaṃ naṭo raṅgamajjhe samajjamajjhe ye dhammā rajanīyā te upasaṃharati bhiyyosomattāya .

Pubbe kho , gāmaṇi , sattā avītadosā dosabandhanabaddhā .

Tesaṃ naṭo raṅgamajjhe samajjamajjhe ye dhammāM2.495 dosanīyā teT4.379 upasaṃharati bhiyyosomattāya .

Pubbe kho , gāmaṇiV2.296 , sattā avītamohā mohabandhanabaddhā .

Tesaṃ naṭo raṅgamajjhe samajjamajjhe ye dhammā mohanīyā te upasaṃharati bhiyyosomattāya .

So attanā matto pamatto pare madetvā pamādetvā kāyassa bhedā paraṃ maraṇā pahāso nāma nirayo tattha upapajjati .

Sace kho panassa evaṃdiṭṭhi hoti –

‘ yo so naṭo raṅgamajjhe samajjamajjhe saccālikena janaṃ hāseti rameti , so kāyassa bhedā paraṃ maraṇā pahāsānaṃ devānaṃ sahabyataṃ upapajjatī ’ ti , sāssa hoti micchādiṭṭhi .

Micchādiṭṭhikassa kho panāhaṃ , gāmaṇi , purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā ’’ ti .

Evaṃ vutte , tālapuṭo naṭagāmaṇi , parodi , assūni pavattesi .

‘‘ Etaṃ kho tyāhaṃ , gāmaṇi , nālatthaṃ –

‘ alaṃ , gāmaṇi , tiṭṭhatetaṃ ;

mā maṃ etaṃ pucchī ’’’ ti .

‘‘ Nāhaṃ , bhante , etaṃ rodāmi yaṃ maṃ bhagavā evamāha ;

api cāhaṃ , bhante , pubbakehi ācariyapācariyehi naṭehi dīgharattaṃ nikato vañcito paluddho –

‘ yo so naṭo raṅgamajjheP4.308 samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatī ’’’ ti .

‘‘ Abhikkantaṃ , bhante , abhikkantaṃ , bhante !

Seyyathāpi , bhante , nikkujjitaṃ vā ukkujjeyya , paṭicchannaṃ vā vivareyya , mūḷhassa vāT4.380 maggaṃ ācikkheyya , andhakāre vā telapajjotaṃ dhāreyya – cakkhumanto rūpāni dakkhantīti ;

evamevaṃ bhagavatā anekapariyāyena dhammo pakāsito .

Esāhaṃ , bhante , bhagavantaṃ saraṇaṃ gacchāmi dhammañca bhikkhusaṅghañca .

Labheyyāhaṃ , bhante , bhagavato santike pabbajjaṃ , labheyyaṃ upasampadan ’’ ti .

Alattha kho tālapuṭo naṭagāmaṇi bhagavato santike pabbajjaṃ , alattha upasampadaṃ .

Acirūpasampanno ca panāyasmā tālapuṭo … pe … arahataṃ ahosīti .

Dutiyaṃ .

Issues

Select Version

Saḷāyatanavaggo

Saḷāyatanavaggo