9. Paṭhamachaphassāyatanasuttaṃ
71.‘‘ Yo hi koci , bhikkhave , bhikkhu channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānāti .
Avusitaṃ
M2.270 tena brahmacariyaṃ , ārakā so imasmā dhammavinayā ’’ ti .Evaṃ vutte , aññataro bhikkhu bhagavantaṃ etadavoca –
‘‘ etthāhaṃ , bhante , anassasaṃ [ anassasiṃ ( sī .), anassāsaṃ ( syā . kaṃ .), anassāsiṃ ( pī .)].
Ahañhi , bhante , channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānāmī ’’ ti .
‘‘ Taṃ kiṃ maññasi , bhikkhu , cakkhuṃ ‘ etaṃ mama , esohamasmi
T4.53 , eso me attā ’ ti samanupassasī ’’ ti ?‘‘ No hetaṃ , bhante ’’.
‘‘ Sādhu , bhikkhu , ettha ca te , bhikkhu , cakkhu ‘ netaṃ mama , nesohamasmi , na meso attā ’ ti evametaṃ yathābhūtaṃ sammappaññāya sudiṭṭhaṃ bhavissati .
Esevanto dukkhassa … pe … jivhaṃ ‘ etaṃ mama , esohamasmi , eso me attā ’ ti samanupassasī ’’ ti ?
‘‘ No hetaṃ , bhante ’’.
‘‘ Sādhu , bhikkhu , ettha ca te , bhikkhu , jivhā ‘ netaṃ mama , nesohamasmi , na meso attā ’ ti evametaṃ yathābhūtaṃ sammappaññāya sudiṭṭhaṃ bhavissati .
Esevanto dukkhassa … pe … manaṃ ‘ etaṃ mama , esohamasmi , eso me attā ’ ti samanupassasī ’’ ti ?
‘‘ No hetaṃ , bhante ’’.
‘‘ Sādhu , bhikkhu , ettha ca te , bhikkhu , mano ‘ netaṃ mama , nesohamasmi , na meso attā ’ ti
V2.47 evametaṃ yathābhūtaṃ sammappaññāya sudiṭṭhaṃ bhavissati .Esevanto dukkhassā ’’ ti .
Navamaṃ .