5. Assārohasuttaṃ

Author： _System_Pali_VRI_ @ Administrator

5. Assārohasuttaṃ

357. Atha kho assāroho gāmaṇi yena bhagavā tenupasaṅkami ;

upasaṅkamitvā ekamantaṃ nisīdi .

Ekamantaṃ nisinno kho assāroho gāmaṇi bhagavantaṃ etadavoca –

‘‘ sutaṃ metaṃ , bhante , pubbakānaṃ ācariyapācariyānaṃ assārohānaṃ bhāsamānānaṃ –

‘ yo so assāroho saṅgāme ussahati vāyamati , tamenaṃ ussahantaṃ vāyamantaṃ pare hananti pariyāpādenti , so kāyassa bhedā paraṃ maraṇā parajitānaṃ devānaṃ sahabyataṃ upapajjatī ’ ti .

Idha bhagavā kimāhā ’’ ti ?

‘‘ Alaṃ , gāmaṇi , tiṭṭhatetaṃ ;

mā maṃ etaṃ pucchī ’’ ti .

Dutiyampi kho … pe … tatiyampi kho assāroho gāmaṇi bhagavantaṃ etadavoca –

‘‘ sutaṃ metaṃ , bhante , pubbakānaṃ ācariyapācariyānaṃ assārohānaṃ bhāsamānānaṃ –

‘ yo so assāroho saṅgāme ussahati vāyamati , tamenaṃ ussahantaṃ vāyamantaṃT4.383 pare hananti pariyāpādenti , so kāyassa bhedā paraṃ maraṇā parajitānaṃ devānaṃ sahabyataṃ upapajjatī ’ ti .

Idha bhagavā kimāhā ’’ ti ?

‘‘ Addhā kho tyāhaṃ , gāmaṇi , na labhāmi –

‘ alaṃ , gāmaṇi , tiṭṭhatetaṃ ;

mā maṃ etaṃ pucchī ’ ti .

Api ca kho tyāhaṃ byākarissāmi .

Yo so , gāmaṇi , assāroho saṅgāme ussahati vāyamati tassaP4.311 taṃ cittaṃ pubbe gahitaṃ dukkaṭaṃ duppaṇihitaṃ –

‘ ime sattā haññantu vā bajjhantu vā ucchijjantu vā vinassantu vā mā ahesuṃ iti vā ’ ti .

Tamenaṃ ussahantaṃ vāyamantaṃ pare hananti pariyāpādenti , so kāyassa bhedā paraṃ maraṇā parajito nāma nirayo tattha upapajjati .

Sace kho panassa evaṃ diṭṭhi hoti –

Micchādiṭṭhikassa kho panāhaṃ gāmaṇi , purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā ’’ ti .

EvaṃV2.299M2.498 vutte , assāroho gāmaṇi parodi , assūni pavattesi .

‘‘ Etaṃ kho tyāhaṃ , gāmaṇi , nālatthaṃ –

‘ alaṃ , gāmaṇi , tiṭṭhatetaṃ ;

mā maṃ etaṃ pucchī ’’’ ti .

‘‘ Nāhaṃ , bhante , etaṃ rodāmi yaṃ maṃ bhagavā evamāha .

Apicāhaṃ , bhante , pubbakehi ācariyapācariyehi assārohehi dīgharattaṃ nikato vañcito paluddho –

‘ yoT4.384 so assāroho saṅgāme ussahati vāyamati , tamenaṃ ussahantaṃ vāyamantaṃ pare hananti pariyāpādenti , so kāyassa bhedā paraṃ maraṇā parajitānaṃ devānaṃ sahabyataṃ upapajjatī ’’’ ti .

‘‘ Abhikkantaṃ , bhante … pe … ajjatagge pāṇupetaṃ saraṇaṃ gatan ’’ ti .

Pañcamaṃ .

Issues

Select Version

Saḷāyatanavaggo

Saḷāyatanavaggo