89. Ñātakādiggahaṇakathā
166. Tena kho pana samayena aññataraṃ bhikkhuṃ tadahuposathe ñātakā gaṇhiṃsuṃ .
Bhagavato etamatthaṃ ārocesuṃ .
Idha pana , bhikkhave , bhikkhuṃ tadahuposathe ñātakā gaṇhanti .
Te ñātakā bhikkhūhi evamassu vacanīyā –
‘‘ iṅgha , tumhe āyasmanto imaṃ bhikkhuṃ muhuttaṃ muñcatha , yāvāyaṃ bhikkhu uposathaṃ karotī ’’ ti .
Evañcetaṃ labhetha , iccetaṃ kusalaṃ .
No ce labhetha , te ñātakā bhikkhūhi evamassu vacanīyā –
‘‘ iṅgha , tumhe āyasmanto muhuttaṃ ekamantaṃ hotha , yāvāyaṃ bhikkhu pārisuddhiṃ detī ’’ ti .
Evañcetaṃ labhetha , iccetaṃ kusalaṃ .
No ce labhetha , te ñātakā bhikkhūhi evamassu vacanīyā –
‘‘ iṅgha , tumhe āyasmanto imaṃ bhikkhuṃ muhuttaṃ nissīmaṃ netha , yāva saṅgho uposathaṃ karotī ’’ ti .
Evañcetaṃ labhetha , iccetaṃ kusalaṃ .
No ce labhetha , na tveva vaggena saṅghena uposatho kātabbo .
Kareyya ce , āpatti dukkaṭassa .
Idha
M0.165 pana , bhikkhave , bhikkhuṃ tadahuposathe rājāno gaṇhanti ,… pe … corā gaṇhanti – dhuttāT1.240 gaṇhanti – bhikkhupaccatthikā gaṇhanti , te bhikkhupaccatthikā bhikkhūhi evamassu vacanīyā –‘‘ iṅgha , tumhe āyasmanto imaṃ bhikkhuṃ muhuttaṃ muñcatha , yāvāyaṃ bhikkhu uposathaṃ karotī ’’ ti .
Evañcetaṃ labhetha , iccetaṃ kusalaṃ .
No ce labhetha , te bhikkhupaccatthikā bhikkhūhi evamassu vacanīyā –
‘‘ iṅgha , tumhe āyasmanto muhuttaṃ ekamantaṃ hotha , yāvāyaṃ bhikkhu pārisuddhiṃ detī ’’ ti .
Evañcetaṃ labhetha , iccetaṃ kusalaṃ .
No ce labhetha , te bhikkhupaccatthikā
V0.154 bhikkhūhi evamassu vacanīyā –‘‘ iṅgha , tumhe āyasmanto imaṃ bhikkhuṃ muhuttaṃ nissīmaṃ netha , yāva saṅgho uposathaṃ karotī ’’ ti .
Evañcetaṃ labhetha , iccetaṃ kusalaṃ .
No ce labhetha , na tveva vaggena saṅghena uposatho kātabbo .
Kareyya ce , āpatti dukkaṭassāti .