277. Osāraṇānujānanā
474. Atha
M0.506V0.480 kho tassa ukkhittakassa bhikkhuno dhammañca vinayañca paccavekkhantassa etadahosi –‘‘ āpatti esā , nesā anāpatti .
Āpannomhi , namhi anāpanno .
Ukkhittomhi , namhi anukkhitto .
Dhammikenamhi kammena ukkhitto akuppena ṭhānārahenā ’’ ti .
Atha kho so ukkhittako bhikkhu yena ukkhittānuvattakā bhikkhū tenupasaṅkami , upasaṅkamitvā ukkhittānuvattake bhikkhū etadavoca –
‘‘ āpatti esā , āvuso ;
nesā anāpatti .
Āpannomhi , namhi anāpanno .
Ukkhittomhi , namhi anukkhitto .
Dhammikenamhi kammena ukkhitto akuppena ṭhānārahena .
Etha maṃ āyasmanto osārethā ’’ ti .
Atha kho te ukkhittānuvattakā bhikkhū taṃ ukkhittakaṃ bhikkhuṃ ādāya yena bhagavā tenupasaṅkamiṃsu , upasaṅkamitvā bhagavantaṃ abhivādetvā ekamantaṃ nisīdiṃsu .
Ekamantaṃ nisinnā kho te bhikkhū bhagavantaṃ etadavocuṃ –
‘‘ ayaṃ , bhante , ukkhittako bhikkhu evamāha –
‘ āpatti esā
T2.350 , āvuso ;nesā anāpatti .
Āpannomhi , namhi anāpanno .
Ukkhittomhi , namhi anukkhitto .
Dhammikenamhi kammena ukkhitto akuppena ṭhānārahena .
Etha maṃ āyasmanto osārethā ’ ti .
Kathaṃ nu kho , bhante , paṭipajjitabban ’’ ti ?
‘‘ Āpatti esā , bhikkhave ;
nesā anāpatti .
Āpanno eso bhikkhu , neso bhikkhu anāpanno .
Ukkhitto eso bhikkhu , neso bhikkhu anukkhitto
P1.357 .Dhammikena kammena ukkhitto akuppena ṭhānārahena .
Yato ca kho so , bhikkhave , bhikkhu āpanno ca ukkhitto ca passati ca , tena hi , bhikkhave , taṃ bhikkhuṃ osārethā ’’ ti .
Osāraṇānujānanā niṭṭhitā .