227. Kusacīrādipaṭikkhepakathā
371. Tena kho pana samayena aññataro bhikkhu kusacīraṃ nivāsetvā … pe … vākacīraṃ
V0.398 nivāsetvā … pe … phalakacīraṃ nivāsetvā … pe … kesakambalaṃ nivāsetvā … pe … vāḷakambalaṃ nivāsetvā … pe … ulūkapakkhaṃ nivāsetvā … pe … ajinakkhipaṃ nivāsetvā yena bhagavā tenupasaṅkami ;upasaṅkamitvā bhagavantaṃ etadavoca –
‘‘ bhagavā , bhante , anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī .
Idaṃ , bhante , ajinakkhipaṃ anekapariyāyena appicchatāya santuṭṭhitāya sallekhāya dhutatāya pāsādikatāya apacayāya vīriyārambhāya saṃvattati .
Sādhu , bhante
P1.306 , bhagavā bhikkhūnaṃ ajinakkhipaṃ anujānātū ’’ ti .Vigarahi buddho bhagavā –
‘‘ ananucchavikaṃ , moghapurisa , ananulomikaṃ appatirūpaṃ assāmaṇakaṃ
M0.422 akappiyaṃ akaraṇīyaṃ .Kathañhi nāma tvaṃ , moghapurisa , ajinakkhipaṃ titthiyadhajaṃ dhāressasi .
Netaṃ , moghapurisa , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –
‘‘ na , bhikkhave , ajinakkhipaṃ titthiyadhajaṃ dhāretabbaṃ .
Yo dhāreyya , āpatti thullaccayassā ’’ ti .
Tena kho pana samayena aññataro bhikkhu akkanāḷaṃ nivāsetvā … pe … potthakaṃ nivāsetvā yena bhagavā tenupasaṅkami , upasaṅkamitvā bhagavantaṃ etadavoca –
‘‘ bhagavā , bhante , anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa , vaṇṇavādī .
Ayaṃ , bhante , potthako anekapariyāyena appicchatāya
T2.234 santuṭṭhitāya sallekhāya dhutatāya pāsādikatāya apacayāya vīriyārambhāya saṃvattati .Sādhu , bhante , bhagavā bhikkhūnaṃ potthakaṃ anujānātū ’’ ti .
Vigarahi buddho bhagavā –
‘‘ ananucchavikaṃ , moghapurisa , ananulomikaṃ appatirūpaṃ assāmaṇakaṃ akappiyaṃ akaraṇīyaṃ .
Kathañhi nāma tvaṃ , moghapurisa , potthakaṃ nivāsessasi .
Netaṃ , moghapurisa , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –
‘‘ na , bhikkhave , potthako nivāsetabbo .
Yo nivāseyya , āpatti dukkaṭassā ’’ ti .
Kusacīrādipaṭikkhepakathā niṭṭhitā .