182. Keṇiyajaṭilavatthu

Author： _System_Pali_VRI_ @ Administrator

No version selected — showing the Pali original by default.

182. Keṇiyajaṭilavatthu

300.[ ma . ni .2.396 ādayo ; su . ni . selasuttampi passitabbaṃ ] Atha kho bhagavā anupubbena cārikaṃ caramāno yena āpaṇaṃ tadavasari .

Assosi kho keṇiyo jaṭilo –

‘‘ samaṇo khalu bho gotamo sakyaputto sakyakulā pabbajito āpaṇaṃ anuppatto , taṃ kho pana bhavantaṃ gotamaṃ evaṃ kalyāṇo kittisaddo abbhuggato … pe … sādhu kho pana tathārūpānaṃ arahataṃ dassanaṃ hotī ’’ ti .

Atha kho keṇiyassaM0.343V0.322 jaṭilassa etadahosi –

‘‘ kiṃ nu kho ahaṃ samaṇassa gotamassa harāpeyyan ’’ ti .

Atha kho keṇiyassa jaṭilassa etadahosi –

‘‘ yepi kho teT2.122 brāhmaṇānaṃ [ ayaṃ pāṭho dī . ni .1.285,526,536; ma . ni .2.427; a . ni .5.191-192 ādayo ] pubbakā isayo mantānaṃ kattāro mantānaṃ pavattāro , yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ , tadanugāyanti tadanubhāsanti , bhāsitamanubhāsanti , vācitamanuvācenti , seyyathidaṃ – aṭṭhako vāmako vāmadevo vessāmitto yamataggi [ yamadaggi ( ka .)] aṅgīraso bhāradvājo vāseṭṭho kassapo bhagu [ ayaṃ pāṭho dī . ni .1.285,526,536; ma . ni .2.427; a . ni .5.191-192 ādayo ], rattūparatā viratā vikālabhojanā , te evarūpāni pānāni sādiyiṃsu .

Samaṇopi gotamo rattūparato virato vikālabhojanā , arahati samaṇopi gotamo evarūpāni pānāni sādiyitun ’’ ti pahūtaṃ pānaṃ paṭiyādāpetvā kājehi gāhāpetvā yena bhagavā tenupasaṅkami ;

upasaṅkamitvā bhagavatā saddhiṃ sammodi ;

sammodanīyaṃ kathaṃ sāraṇīyaṃ vītisāretvā ekamantaṃ aṭṭhāsi .

Ekamantaṃ ṭhito kho keṇiyo jaṭilo bhagavantaṃ etadavoca –

‘‘ paṭiggaṇhātu me bhavaṃ gotamo pānan ’’ ti .

Tena hi , keṇiya , bhikkhūnaṃ dehīti .

Atha kho keṇiyo jaṭilo bhikkhūnaṃ deti .

Bhikkhū kukkuccāyantā na paṭiggaṇhanti .

Paṭiggaṇhatha , bhikkhave , paribhuñjathāti .

Atha kho keṇiyo jaṭilo buddhappamukhaṃ bhikkhusaṅghaṃ pahūtehi pānehi sahatthā santappetvā sampavāretvā bhagavantaṃ dhotahatthaṃ onītapattapāṇiṃ ekamantaṃ nisīdi .

Ekamantaṃ nisinnaṃ kho keṇiyaṃ jaṭilaṃ bhagavā dhammiyā kathāya sandassesi samādapesi samuttejesi sampahaṃsesi .

Atha khoP1.246 keṇiyo jaṭilo bhagavatā dhammiyā kathāya sandassito samādapito samuttejito sampahaṃsito bhagavantaṃ etadavoca –

‘‘ adhivāsetu meT2.123 bhavaṃ gotamo svātanāya bhattaṃ saddhiṃ bhikkhusaṅghenā ’’ ti .

Mahā kho , keṇiya , bhikkhusaṅgho aḍḍhatelasāni bhikkhusatāni , tvañca brāhmaṇesu abhippasannoti .

Dutiyampi kho keṇiyo jaṭilo bhagavantaṃ etadavoca –

‘‘ kiñcāpi kho , bho gotama , mahā bhikkhusaṅgho aḍḍhatelasāni bhikkhusatāni , ahañca brāhmaṇesu abhippasanno , adhivāsetu me bhavaṃ gotamo svātanāya bhattaṃ saddhiṃ bhikkhusaṅghenā ’’ ti .

Mahā kho , keṇiya , bhikkhusaṅgho aḍḍhatelasāni bhikkhusatāni , tvañca brāhmaṇesu abhippasannotiM0.344 .

Tatiyampi kho keṇiyo jaṭilo bhagavantaṃ etadavoca –

‘‘ kiñcāpi kho , bho gotama , mahā bhikkhusaṅgho aḍḍhatelasāni bhikkhusatāni , ahañca brāhmaṇesu abhippasanno , adhivāsetu bhavaṃ gotamo svātanāya bhattaṃ saddhiṃ bhikkhusaṅghenā ’’ ti .

Adhivāsesi bhagavā tuṇhībhāvena .

Atha kho keṇiyo jaṭilo bhagavato adhivāsanaṃ viditvā uṭṭhāyāsanā pakkāmi .

Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi –

‘‘ anujānāmi , bhikkhave , aṭṭha pānāni – ambapānaṃ jambupānaṃ cocapānaṃ mocapānaṃ madhūkapānaṃ [ madhupānaṃ ( sī . syā .)] muddikapānaṃ sālūkapānaṃ phārusakapānaṃ .

Anujānāmi , bhikkhave , sabbaṃ phalarasaṃ ṭhapetvā dhaññaphalarasaṃ .

Anujānāmi , bhikkhave , sabbaṃ pattarasaṃ ṭhapetvāV0.323 ḍākarasaṃ .

Anujānāmi , bhikkhave , sabbaṃ puppharasaṃ ṭhapetvā madhūkapuppharasaṃ .

Anujānāmi , bhikkhave , ucchurasan ’’ ti .

Atha kho keṇiyo jaṭilo tassā rattiyāT2.124 accayena sake assame paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi –

‘‘ kālo , bho gotama , niṭṭhitaṃ bhattan ’’ ti .

Atha kho bhagavā pubbaṇhasamayaṃ nivāsetvā pattacīvaramādāya yena keṇiyassa jaṭilassa assamo tenupasaṅkami ;

upasaṅkamitvā paññatte āsane nisīdi saddhiṃ bhikkhusaṅghena .

Atha kho keṇiyo jaṭilo buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ekamantaṃ nisīdi .

Ekamantaṃ nisinnaṃ kho keṇiyaṃ jaṭilaṃ bhagavā imāhi gāthāhi anumodi –

‘‘ Aggihuttamukhā yaññā , sāvittī chandaso mukhaṃ ;

Rājā mukhaṃ manussānaṃ , nadīnaṃ sāgaro mukhaṃ .

‘‘ Nakkhattānaṃ mukhaṃ cando , ādicco tapataṃ mukhaṃ ;

Puññaṃ ākaṅkhamānānaṃ saṅgho , ve yajataṃ mukhan ’’ ti .

Atha kho bhagavā keṇiyaṃ jaṭilaṃ imāhi gāthāhi anumoditvā uṭṭhāyāsanā pakkāmi .

Keṇiyajaṭilavatthu niṭṭhitaṃ .

Issues

Select Version

Mahāvaggapāḷi

Mahāvaggapāḷi