135. Liṅgādidassanaṃ
229. Idha
V0.233 pana , bhikkhave , āgantukā bhikkhū passanti āvāsikānaṃ bhikkhūnaṃ āvāsikākāraṃ , āvāsikaliṅgaṃ , āvāsikanimittaṃ , āvāsikuddesaṃ , suppaññattaṃ mañcapīṭhaṃ bhisibibbohanaṃ , pānīyaṃ paribhojanīyaṃ sapaṭṭhitaṃ , pariveṇaṃ susammaṭṭhaṃ ;passitvā vematikā honti –
‘‘ atthi nu kho āvāsikā bhikkhū , natthi nu kho ’’ ti .
Te vematikā na vicinanti , avicinitvā pavārenti .
Āpatti dukkaṭassa … pe … te vematikā vicinanti , vicinitvā na passanti , apassitvā pavārenti .
Anāpatti .
Te vematikā vicinanti , vicinitvā passanti , passitvā ekato pavārenti .
Anāpatti .
Te vematikā vicinanti , vicinitvā passanti , passitvā pāṭekkaṃ pavārenti .
Āpatti dukkaṭassa .
Te vematikā vicinanti , vicinitvā passanti , passitvā –
‘‘ nassantete , vinassantete , ko tehi attho ’’ ti – bhedapurekkhārā pavārenti .
Āpatti thullaccayassa .
Idha pana , bhikkhave , āgantukā bhikkhū suṇanti āvāsikānaṃ bhikkhūnaṃ āvāsikākāraṃ , āvāsikaliṅgaṃ , āvāsikanimittaṃ , āvāsikuddesaṃ , caṅkamantānaṃ padasaddaṃ , sajjhāyasaddaṃ , ukkāsitasaddaṃ , khipitasaddaṃ ;
sutvā vematikā honti –
‘‘ atthi nu kho āvāsikā bhikkhū , natthi nu kho ’’ ti .
Te vematikā na vicinanti , avicinitvā pavārenti .
Āpatti dukkaṭassa .
Te vematikā vicinanti , vicinitvā na passanti , apassitvā pavārenti .
Anāpatti .
Te vematikā vicinanti , vicinitvā passanti , passitvā ekato pavārenti .
Anāpatti .
Te vematikā vicinanti , vicinitvā passanti , passitvā
M0.246 pāṭekkaṃ pavārenti .Āpatti dukkaṭassa .
Te
T1.337 vematikā vicinanti , vicinitvā passanti , passitvā ‘‘ nassantete , vinassantete , ko tehi attho ’’ ti bhedapurekkhārā pavārenti .Āpatti thullaccayassa .
Idha pana , bhikkhave , āvāsikā bhikkhū passanti āgantukānaṃ bhikkhūnaṃ āgantukākāraṃ , āgantukaliṅgaṃ , āgantukanimittaṃ , āgantukuddesaṃ , aññātakaṃ pattaṃ , aññātakaṃ cīvaraṃ , aññātakaṃ nisīdanaṃ , pādānaṃ dhotaṃ , udakanissekaṃ ;
passitvā vematikā honti –
‘‘ atthi nu kho āgantukā bhikkhū , natthi nu kho ’’ ti .
Te vematikā na vicinanti , avicinitvā pavārenti .
Āpatti dukkaṭassa .
Te vematikā
T1.338 vicinanti , vicinitvā na passanti , apassitvā pavārenti .Anāpatti .
Te vematikā vicinanti , vicinitvā
V0.234 passanti , passitvā ekato pavārenti .Anāpatti .
Te vematikā vicinanti , vicinitvā passanti , passitvā pāṭekkaṃ pavārenti .
Āpatti dukkaṭassa .
Te vematikā vicinanti , vicinitvā passanti , passitvā – nassantete , vinassantete , ko tehi atthoti – bhedapurekkhārā pavārenti .
Āpatti thullaccayassa .
Idha pana , bhikkhave , āvāsikā bhikkhū suṇanti āgantukānaṃ bhikkhūnaṃ āgantukākāraṃ ,
Āgantukaliṅgaṃ , āgantukanimittaṃ , āgantukuddesaṃ , āgacchantānaṃ padasaddaṃ , upāhanapapphoṭanasaddaṃ , ukkāsitasaddaṃ , khipitasaddaṃ ;
sutvā vematikā honti –
‘‘ atthi nu kho āgantukā bhikkhū , natthi nu kho ’’ ti .
Te vematikā na vicinanti , avicinitvā pavārenti .
Āpatti dukkaṭassa .
Te vematikā vicinanti , vicinitvā na passanti , apassitvā pavārenti .
Anāpatti .
Te vematikā vicinanti , vicinitvā passanti , passitvā ekato pavārenti .
Anāpatti .
Te vematikā vicinanti , vicinitvā passanti , passitvā pāṭekkaṃ pavārenti .
Āpatti dukkaṭassa .
Te vematikā vicinanti , vicinitvā passanti , passitvā – nassantete , vinassantete , ko tehi atthoti – bhedapurekkhārā pavārenti .
Āpatti thullaccayassa .
Liṅgādidassanaṃ niṭṭhitaṃ .