30. Likhitakacoravatthu
93. Tena kho pana samayena aññataro puriso corikaṃ katvā palāyitvā bhikkhūsu pabbajito hoti .
So ca rañño antepure likhito hoti – yattha passati , tattha hantabboti .
Manussā passitvā evamāhaṃsu –
‘‘ ayaṃ so likhitako coro .
Handa , naṃ hanāmā ’’ ti .
Ekacce evamāhaṃsu –
‘‘ māyyo , evaṃ avacuttha .
Anuññātaṃ raññā māgadhena seniyena bimbisārena ‘‘ ye samaṇesu sakyaputtiyesu pabbajanti , na te labbhā kiñci kātuṃ , svākkhāto dhammo , carantu brahmacariyaṃ sammā dukkhassa antakiriyāyā ’’ ti .
Manussā ujjhāyanti khiyyanti vipācenti –
‘‘ abhayūvarā
M0.106 ime samaṇā sakyaputtiyā , nayime labbhā kiñci kātuṃ .Kathañhi nāma samaṇā sakyaputtiyā likhitakaṃ coraṃ pabbājessantī ’’ ti .
Bhagavato etamatthaṃ ārocesuṃ .
Na , bhikkhave , likhitako coro pabbājetabbo .
Yo pabbājeyya , āpatti dukkaṭassāti .
Likhitakacoravatthu niṭṭhitaṃ .