64. Cattāro nissayā
128. Tāvadeva chāyā metabbā , utuppamāṇaṃ ācikkhitabbaṃ , divasabhāgo
T1.193 ācikkhitabbo , saṅgīti ācikkhitabbāP1.96 , cattāro nissayā ācikkhitabbā [ ācikkhitabbā , cattāri akaraṇīyāni ācikkhitabbāni .( ka .)]–‘‘ Piṇḍiyālopabhojanaṃ nissāya pabbajjā .
Tattha te yāvajīvaṃ ussāho karaṇīyo .
Atirekalābho – saṅghabhattaṃ , uddesabhattaṃ , nimantanaṃ , salākabhattaṃ , pakkhikaṃ , uposathikaṃ , pāṭipadikaṃ .
‘‘ Paṃsukūlacīvaraṃ nissāya pabbajjā .
Tattha te yāvajīvaṃ ussāho karaṇīyo .
Atirekalābho – khomaṃ , kappāsikaṃ , koseyyaṃ , kambalaṃ , sāṇaṃ , bhaṅgaṃ .
‘‘ Rukkhamūlasenāsanaṃ nissāya pabbajjā .
Tattha te yāvajīvaṃ ussāho karaṇīyo .
Atirekalābho – vihāro , aḍḍhayogo , pāsādo , hammiyaṃ , guhā .
‘‘ Pūtimuttabhesajjaṃ nissāya pabbajjā .
Tattha te yāvajīvaṃ ussāho karaṇīyo .
Atirekalābho – sappi , navanītaṃ , telaṃ , madhu , phāṇitan ’’ ti .
Cattāro nissayā niṭṭhitā .