1. Bodhikathā
1.[ udā .1 ādayo ] Tena
P1.1M0.1V0.1T1.1 samayena buddho bhagavā uruvelāyaṃ viharati najjā nerañjarāya tīre bodhirukkhamūle paṭhamābhisambuddho .Atha kho bhagavā bodhirukkhamūle sattāhaṃ ekapallaṅkena nisīdi vimuttisukhapaṭisaṃvedī [ vimuttisukhaṃ paṭisaṃvedī ( ka .)].
Atha kho bhagavā rattiyā paṭhamaṃ yāmaṃ paṭiccasamuppādaṃ anulomapaṭilomaṃ manasākāsi –
‘‘ avijjāpaccayā saṅkhārā , saṅkhārapaccayā viññāṇaṃ , viññāṇapaccayā nāmarūpaṃ , nāmarūpapaccayā saḷāyatanaṃ , saḷāyatanapaccayā phasso , phassapaccayā vedanā , vedanāpaccayā taṇhā , taṇhāpaccayā upādānaṃ , upādānapaccayā bhavo , bhavapaccayā jāti , jātipaccayā jarāmaraṇaṃ sokaparidevadukkhadomanassupāyāsā sambhavanti – evametassa
V0.2 kevalassa dukkhakkhandhassa samudayo hoti .‘‘ Avijjāyatveva asesavirāganirodhā saṅkhāranirodho , saṅkhāranirodhā viññāṇanirodho , viññāṇanirodhā nāmarūpanirodho , nāmarūpanirodhā saḷāyatananirodho , saḷāyatananirodhā phassanirodho , phassanirodhā vedanānirodho , vedanānirodhā taṇhānirodho , taṇhānirodhā upādānanirodho
T1.2 , upādānanirodhā bhavanirodho , bhavanirodhā jātinirodho , jātinirodhā jarāmaraṇaṃ sokaparidevadukkhadomanassupāyāsā nirujjhanti – evametassa kevalassa dukkhakkhandhassa nirodhoP1.2 hotī ’’ ti .Atha
M0.2 kho bhagavā etamatthaṃ viditvā tāyaṃ velāyaṃ imaṃ udānaṃ udānesi –‘‘ Yadā have pātubhavanti dhammā ;
Ātāpino jhāyato brāhmaṇassa ;
Athassa kaṅkhā vapayanti sabbā ;
Yato pajānāti sahetudhamman ’’ ti .
2.[ udā .2] Atha kho bhagavā rattiyā majjhimaṃ yāmaṃ paṭiccasamuppādaṃ anulomapaṭilomaṃ manasākāsi –
‘‘ avijjāpaccayā saṅkhārā , saṅkhārapaccayā viññāṇaṃ , viññāṇapaccayā nāmarūpaṃ … pe …
T1.3 evametassa kevalassa dukkhakkhandhassa samudayo hotī … pe … nirodho hotī ’’ ti .Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘ Yadā have pātubhavanti dhammā ;
Ātāpino jhāyato brāhmaṇassa ;
Athassa kaṅkhā vapayanti sabbā ;
Yato khayaṃ paccayānaṃ avedī ’’ ti .
3.[ udā .3] Atha kho bhagavā rattiyā pacchimaṃ yāmaṃ paṭiccasamuppādaṃ anulomapaṭilomaṃ manasākāsi –
‘‘ avijjāpaccayā saṅkhārā , saṅkhārapaccayā viññāṇaṃ , viññāṇapaccayā nāmarūpaṃ … pe …
T1.4 evametassa kevalassa dukkhakkhandhassa samudayo hoti … pe … nirodho hotī ’’ ti .Atha
V0.3 kho bhagavā etamatthaṃ viditvā tāyaṃ velāyaṃ imaṃ udānaṃ udānesi –‘‘ Yadā have pātubhavanti dhammā ;
Ātāpino jhāyato brāhmaṇassa ;
Vidhūpayaṃ tiṭṭhati mārasenaṃ ;
Sūriyova [ suriyova ( sī . syā . kaṃ .)] obhāsayamantalikkhan ’’ ti .
Bodhikathā niṭṭhitā .