108. Vassāne cārikāpaṭikkhepādi
185. Tena
P1.138V0.182 kho pana samayena chabbaggiyā bhikkhū vassaṃ upagantvā antarāvassaṃ cārikaṃ caranti .Manussā tatheva ujjhāyanti khiyyanti vipācenti –
‘‘ kathañhi
M0.193 nāma samaṇā sakyaputtiyā hemantampi gimhampi vassampi cārikaṃ carissanti , haritāni tiṇāni sammaddantā , ekindriyaṃ jīvaṃ viheṭhentā , bahū khuddake pāṇe saṅghātaṃ āpādentā .Ime hi nāma aññatitthiyā durakkhātadhammā vassāvāsaṃ allīyissanti saṅkasāyissanti .
Ime hi nāma sakuntakā rukkhaggesu kulāvakāni karitvā vassāvāsaṃ allīyissanti saṅkasāyissanti .
Ime pana samaṇā sakyaputtiyā hemantampi gimhampi vassampi cārikaṃ caranti , haritāni tiṇāni sammaddantā , ekindriyaṃ jīvaṃ viheṭhentā , bahū khuddake pāṇe saṅghātaṃ āpādentā ’’ ti .
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ .
Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū
T1.273 vassaṃ upagantvā antarāvassaṃ cārikaṃ carissantī ’’ ti ?Atha kho te bhikkhū bhagavato etamatthaṃ ārocesuṃ .
Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi –
‘‘ na , bhikkhave , vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā .
Yo pakkameyya , āpatti dukkaṭassā ’’ ti .
186. Tena kho pana samayena chabbaggiyā bhikkhū na icchanti vassaṃ upagantuṃ .
Bhagavato etamatthaṃ ārocesuṃ .
Na , bhikkhave , vassaṃ na upagantabbaṃ .
Yo na upagaccheyya , āpatti dukkaṭassāti .
Tena kho pana samayena chabbaggiyā bhikkhū tadahu vassūpanāyikāya vassaṃ anupagantukāmā sañcicca āvāsaṃ atikkamanti .
Bhagavato etamatthaṃ ārocesuṃ .
Na , bhikkhave , tadahu vassūpanāyikāya vassaṃ anupagantukāmena sañcicca āvāso atikkamitabbo .
Yo atikkameyya , āpatti dukkaṭassāti .
Tena kho pana samayena rājā māgadho seniyo bimbisāro vassaṃ ukkaḍḍhitukāmo
Bhikkhūnaṃ santike dūtaṃ pāhesi – yadi panāyyā āgame juṇhe vassaṃ upagaccheyyunti .
Bhagavato etamatthaṃ ārocesuṃ .
Anujānāmi , bhikkhave , rājūnaṃ anuvattitunti .
Vassāne cārikāpaṭikkhepādi niṭṭhitā .