78. Saṃkhittena pātimokkhuddesādi
150. Atha kho bhikkhūnaṃ etadahosi –
‘‘ kati nu kho pātimokkhuddesā ’’ ti ?
Bhagavato etamatthaṃ ārocesuṃ .
Pañcime , bhikkhave , pātimokkhuddesā – nidānaṃ uddisitvā avasesaṃ sutena sāvetabbaṃ .
Ayaṃ
T1.221 paṭhamo pātimokkhuddeso .Nidānaṃ uddisitvā cattāri pārājikāni uddisitvā avasesaṃ sutena sāvetabbaṃ .
Ayaṃ dutiyo pātimokkhuddeso .
Nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ .
Ayaṃ tatiyo pātimokkhuddeso .
Nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ .
Ayaṃ catuttho pātimokkhuddeso .
Vitthāreneva pañcamo .
Ime kho , bhikkhave , pañca pātimokkhuddesāti .
Tena
V0.141 kho pana samayena bhikkhū – bhagavatā saṃkhittena pātimokkhuddeso anuññātoti – sabbakālaṃ saṃkhittena pātimokkhaṃ uddisanti .Bhagavato etamatthaṃ ārocesuṃ .
Na , bhikkhave , saṃkhittena pātimokkhaṃ uddisitabbaṃ .
Yo uddiseyya , āpatti dukkaṭassāti .
Tena
M0.152 kho pana samayena kosalesu janapade aññatarasmiṃ āvāse tadahuposathe savarabhayaṃ [ saṃcarabhayaṃ ( syā .)] ahosi .Bhikkhū nāsakkhiṃsu vitthārena pātimokkhaṃ uddisituṃ .
Bhagavato etamatthaṃ ārocesuṃ .
Anujānāmi , bhikkhave , sati antarāye saṃkhittena pātimokkhaṃ uddisitunti .
Tena kho pana samayena chabbaggiyā bhikkhū
T1.222 asatipi antarāye saṃkhittena pātimokkhaṃ uddisanti .Bhagavato etamatthaṃ ārocesuṃ .
Na , bhikkhave , asati antarāye saṃkhittena pātimokkhaṃ uddisitabbaṃ .
Yo uddiseyya , āpatti dukkaṭassa .
Anujānāmi , bhikkhave , sati antarāye saṃkhittena pātimokkhaṃ uddisituṃ .
Tatrime antarāyā – rājantarāyo , corantarāyo , agyantarāyo , udakantarāyo , manussantarāyo , amanussantarāyo
P1.113 , vāḷantarāyo , sarīsapantarāyo , jīvitantarāyo , brahmacariyantarāyoti .Anujānāmi , bhikkhave , evarūpesu antarāyesu saṃkhittena pātimokkhaṃ uddisituṃ , asati antarāye vitthārenāti .
Tena kho pana samayena chabbaggiyā bhikkhū saṅghamajjhe anajjhiṭṭhā dhammaṃ bhāsanti .
Bhagavato etamatthaṃ ārocesuṃ .
Na , bhikkhave , saṅghamajjhe anajjhiṭṭhena dhammo bhāsitabbo .
Yo bhāseyya , āpatti dukkaṭassa .
Anujānāmi , bhikkhave , therena bhikkhunā sāmaṃ vā dhammaṃ bhāsituṃ paraṃ vā ajjhesitunti .