Pakiṇṇakakathā
Samuṭṭhānañca kiriyā , atho saññā sacittakaṃ ;
Lokavajjañca kammañca , kusalaṃ vedanāya cāti .
Imasmiṃ pana pakiṇṇake idaṃ sikkhāpadaṃ tisamuṭṭhānaṃ – sāhatthikaṃ kāyato ca cittato ca samuṭṭhāti , āṇattikaṃ vācato ca cittato ca samuṭṭhāti , sāhatthikāṇattikaṃ kāyato ca vācato ca cittato ca samuṭṭhāti .
Kiriyāsamuṭṭhānañca , karontoyeva hi etaṃ āpajjati na akaronto .
‘‘ Adinnaṃ ādiyāmī ’’ ti saññāya abhāvena muccanato saññāvimokkhaṃ , sacittakaṃ
V1.301 , lokavajjaṃ , kāyakammaṃ , vacīkammaṃ , akusalacittaṃ , tuṭṭho vā bhīto vā majjhatto vā taṃ āpajjatīti tivedananti sabbaṃ paṭhamasikkhāpade vuttanayeneva veditabbaṃ .Pakiṇṇakakathā niṭṭhitā .