(11)1. Valāhakavaggo

1. Paṭhamavalāhakasuttaṃ

101. EvaṃV1.117M1.416P2.102 me sutaṃ – ekaṃT2.135 samayaṃ bhagavā sāvatthiyaṃ viharati jetavane anāthapiṇḍikassa ārāme .

Tatra kho bhagavā bhikkhū āmantesi –

‘‘ bhikkhavo ’’ ti .

‘‘ Bhadante ’’ ti te bhikkhū bhagavato paccassosuṃ .

Bhagavā etadavoca –

‘‘ Cattārome , bhikkhave , valāhakā .

Katame cattāro ?

Gajjitā no vassitā , vassitā no gajjitā , neva gajjitā no vassitā , gajjitā ca vassitā ca .

Ime kho , bhikkhave , cattāro valāhakā .

Evamevaṃ kho , bhikkhave , cattāro valāhakūpamā [ pu . pa .157] puggalā santo saṃvijjamānā lokasmiṃ .

Katame cattāro ?

Gajjitā no vassitā , vassitā no gajjitā , neva gajjitā no vassitā , gajjitā ca vassitā ca .

‘‘ Kathañca , bhikkhave , puggalo gajjitā hoti no vassitā ?

Idha , bhikkhave , ekacco puggalo bhāsitā hoti , no kattā .

Evaṃ kho , bhikkhave , puggalo gajjitā hoti , no vassitā .

Seyyathāpi so , bhikkhave , valāhako gajjitā , no vassitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo vassitā hoti , no gajjitā ?

Idha , bhikkhave , ekacco puggalo kattā hoti , no bhāsitā .

Evaṃ kho , bhikkhave , puggalo vassitā hoti , no gajjitā .

Seyyathāpi so , bhikkhave , valāhako vassitā , no gajjitā ;

tathūpamāhaṃ , bhikkhaveT2.136 , imaṃ puggalaṃ vadāmi .

‘‘ KathañcaV1.118 , bhikkhave , puggalo neva gajjitā hoti , no vassitā ?

Idha , bhikkhave , ekacco puggalo neva bhāsitā hoti , no kattā .

Evaṃ kho , bhikkhave , puggalo neva gajjitā hoti , no vassitā .

SeyyathāpiM1.417 so , bhikkhave , valāhako neva gajjitā [ neva gajjitā hoti ( ka .)], no vassitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo gajjitā ca hoti vassitā ca ?

Idha , bhikkhave , ekacco puggalo bhāsitā ca hoti kattā ca .

Evaṃ kho , bhikkhave , puggalo gajjitā ca hoti vassitā ca .

Seyyathāpi so , bhikkhave , valāhako gajjitā ca [ gajjitā ca hoti ( ka .)] vassitā ca ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro valāhakūpamā puggalā santo saṃvijjamānā lokasmin ’’ ti .

Paṭhamaṃ .

2. Dutiyavalāhakasuttaṃ

102.‘‘ CattāromeP2.103 , bhikkhave , valāhakā .

Katame cattāro ?

Gajjitā no vassitā , vassitā no gajjitā , neva gajjitā no vassitā gajjitā ca vassitā ca .

Ime kho , bhikkhave , cattāro valāhakā .

Evamevaṃ kho , bhikkhave , cattāro valāhakūpamā puggalā santo saṃvijjamānā lokasmiṃ .

Katame cattāro ?

Gajjitā no vassitā , vassitā no gajjitā , neva gajjitā no vassitā , gajjitā ca vassitā ca .

‘‘ Kathañca , bhikkhave , puggalo gajjitā hoti , no vassitā ?

Idha , bhikkhave , ekacco puggalo dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ nappajānāti ,‘ ayaṃ dukkhasamudayo ’ ti yathābhūtaṃ nappajānāti ,‘ ayaṃ dukkhanirodho ’ tiT2.137 yathābhūtaṃ nappajānāti ,‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo gajjitā hoti , no vassitā .

Seyyathāpi so , bhikkhave , valāhako gajjitā , no vassitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo vassitā hoti , no gajjitā ?

Idha , bhikkhave , ekacco puggaloV1.119 dhammaṃ na pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ tiM1.418 yathābhūtaṃ pajānāti .

Evaṃ kho , bhikkhave , puggalo vassitā hoti , no gajjitā .

Seyyathāpi so , bhikkhave , valāhako vassitā , no gajjitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo neva gajjitā hoti , no vassitā ?

Idha , bhikkhave , ekacco puggalo neva dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo neva gajjitā hoti , no vassitā .

Seyyathāpi so , bhikkhave , valāhako neva gajjitā , no vassitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo gajjitā ca hoti vassitā caT2.138 ?

Idha , bhikkhave , ekacco puggalo dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo gajjitā ca hoti vassitā ca .

Seyyathāpi so , bhikkhave , valāhako gajjitā ca vassitā ca ;

tathūpamāhaṃ , bhikkhave , imaṃ puggalaṃ vadāmi .

ImeP2.104 kho , bhikkhave , cattāro valāhakūpamā puggalā santo saṃvijjamānā lokasmin ’’ ti .

Dutiyaṃ .

3. Kumbhasuttaṃ

103.‘‘ Cattārome , bhikkhave , kumbhā .

Katame cattāro ?

Tuccho pihito , pūro vivaṭo , tuccho vivaṭo , pūro pihito – ime kho , bhikkhave , cattāro kumbhā .

Evamevaṃ kho , bhikkhaveV1.120 , cattāro kumbhūpamā [ pu . pa .160] puggalā santo saṃvijjamānā lokasmiṃ .

Katame cattāro ?

Tuccho pihito , pūro vivaṭo , tuccho vivaṭo , pūro pihito .

‘‘ Kathañca , bhikkhave , puggalo tuccho hoti pihito ?

Idha , bhikkhave , ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo tuccho hoti pihitoM1.419 .

Seyyathāpi so , bhikkhave , kumbho tuccho pihito ;

tathūpamāhaṃ , bhikkhave , imaṃ puggalaṃ vadāmi .

‘‘ KathañcaT2.139 , bhikkhave , puggalo pūro hoti vivaṭo ?

Idha , bhikkhave , ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo pūro hoti vivaṭo .

Seyyathāpi so , bhikkhave , kumbho pūro vivaṭo ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo tuccho hoti vivaṭo ?

Idha , bhikkhave , ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo tuccho hoti vivaṭo .

Seyyathāpi so , bhikkhave , kumbho tuccho vivaṭo ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo pūro hoti pihito ?

Idha , bhikkhave , ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkha ’ ntnttiP2.105 yathābhūtaṃ pajānāti … pe …V1.121 ‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo pūro hoti pihito .

SeyyathāpiT2.140 so , bhikkhave , kumbho pūro pihito ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro kumbhūpamā puggalā santo saṃvijjamānā lokasmin ’’ ti .

Tatiyaṃ .

4. Udakarahadasuttaṃ

104.‘‘ Cattārome , bhikkhave , udakarahadā .

Katame cattāro ?

Uttāno gambhīrobhāso , gambhīro uttānobhāso , uttāno uttānobhāso , gambhīro gambhīrobhāso – ime kho , bhikkhave , cattāro udakarahadā .

Evamevaṃ kho , bhikkhave , cattāro udakarahadūpamā [ pu . pa .161] puggalā santo saṃvijjamānā lokasmiṃ .

Katame cattāro ?

Uttāno gambhīrobhāsoM1.420 , gambhīro uttānobhāso , uttāno uttānobhāso , gambhīro gambhīrobhāso .

‘‘ Kathañca , bhikkhave , puggalo uttāno hoti gambhīrobhāso ?

Idha , bhikkhave , ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo uttāno hoti gambhīrobhāso .

Seyyathāpi so , bhikkhave , udakarahado uttāno gambhīrobhāso ;

tathūpamāhaṃ , bhikkhave , imaṃ puggalaṃ vadāmi .

‘‘ KathañcaP2.106 , bhikkhave , puggalo gambhīro hoti uttānobhāso ?

Idha , bhikkhave , ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃT2.141 pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo gambhīro hoti uttānobhāso .

Seyyathāpi so , bhikkhave , udakarahado gambhīro uttānobhāso ;

tathūpamāhaṃ , bhikkhave , imaṃ puggalaṃ vadāmi .

‘‘ KathañcaV1.122 , bhikkhave , puggalo uttāno hoti uttānobhāso ?

Idha , bhikkhave , ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo uttāno hoti uttānobhāso .

Seyyathāpi so , bhikkhave , udakarahado uttāno uttānobhāso ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo gambhīro hoti gambhīrobhāso ?

Idha , bhikkhave , ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo gambhīro hoti gambhīrobhāso .

Seyyathāpi so , bhikkhave , udakarahado gambhīro gambhīrobhāso ;

tathūpamāhaṃ , bhikkhave , imaṃ puggalaṃT2.142 vadāmi .

Ime khoM1.421 , bhikkhave , cattāro udakarahadūpamā puggalā santo saṃvijjamānā lokasmin ’’ ti .

Catutthaṃ .

5. Ambasuttaṃ

105.‘‘ Cattārimāni , bhikkhave , ambāni .

Katamāni cattāri ?

Āmaṃ pakkavaṇṇi [ pakkavaṇṇī ( pu . pa .159)], pakkaṃ āmavaṇṇi [ āmavaṇṇī ( sī . syā . kaṃ . pī .)], āmaṃ āmavaṇṇi , pakkaṃ pakkavaṇṇi – imāni kho , bhikkhave , cattāri ambāni .

Evamevaṃ kho , bhikkhave , cattāro ambūpamā [ pakkavaṇṇī ( pu . pa .159)] puggalā santo saṃvijjamānā lokasmiṃ .

Katame cattāro ?

Āmo pakkavaṇṇī , pakko āmavaṇṇī , āmo āmavaṇṇī , pakko pakkavaṇṇī .

‘‘ Kathañca , bhikkhave , puggalo āmo hoti pakkavaṇṇī ?

IdhaP2.107 , bhikkhave , ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo āmo hotiV1.123 pakkavaṇṇī .

Seyyathāpi taṃ , bhikkhave , ambaṃ āmaṃ pakkavaṇṇi ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo pakko hoti āmavaṇṇī ?

Idha , bhikkhave , ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃT2.143 pajānāti .

Evaṃ kho , bhikkhave , puggalo pakko hoti āmavaṇṇī .

Seyyathāpi taṃ , bhikkhave , ambaṃ pakkaṃ āmavaṇṇi ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo āmo hoti āmavaṇṇī ?

Idha , bhikkhave , ekaccassa puggalassa na pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo āmo hoti āmavaṇṇīM1.422 .

Seyyathāpi taṃ , bhikkhave , ambaṃ āmaṃ āmavaṇṇi ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo pakko hoti pakkavaṇṇī ?

Idha , bhikkhave , ekaccassa puggalassa pāsādikaṃ hoti abhikkantaṃ paṭikkantaṃ ālokitaṃ vilokitaṃ samiñjitaṃ pasāritaṃ saṅghāṭipattacīvaradhāraṇaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo pakko hoti pakkavaṇṇī .

Seyyathāpi taṃ , bhikkhave , ambaṃ pakkaṃ pakkavaṇṇi ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro ambūpamā puggalā santo saṃvijjamānāT2.144 lokasmin ’’ ti .

Pañcamaṃ .

6. Dutiyaambasuttaṃ

( Chaṭṭhaṃ uttānatthamevāti aṭṭhakathāyaṃ dassitaṃ , pāḷipotthakesu pana katthacipi na dissati .)[()‘‘ chaṭṭhaṃ ukkānatthamevā ’’ ti aṭṭhakathāyaṃ dassitaṃ , pāḷipotthakesu pana katthacipi na dissati .‘‘… āmaṃ pakkobhāsaṃ , pakkaṃ āmobhāsan ’’ tiādinā pāṭho bhaveyya ]

7. Mūsikasuttaṃ

107.‘‘ CatassoV1.124 imā , bhikkhave , mūsikā .

Katamā catasso ?

Gādhaṃ kattā no vasitā , vasitā no gādhaṃ kattā , neva gādhaṃ kattā no vasitā , gādhaṃ kattā ca vasitā ca – imā kho , bhikkhave , catasso mūsikā .

Evamevaṃ kho , bhikkhave , cattāro mūsikūpamā puggalā santo saṃvijjamānā lokasmiṃ .

Katame cattāro ?

Gādhaṃ kattā no vasitā , vasitā no gādhaṃ kattā , neva gādhaṃ kattā no vasitā , gādhaṃ kattā ca vasitā ca .

‘‘ KathañcaP2.108 , bhikkhave , puggalo gādhaṃ kattā hoti no vasitā ?

Idha , bhikkhave , ekacco puggalo dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhave , puggalo gādhaṃ kattā hoti , no vasitā .

Seyyathāpi sāT2.145 , bhikkhave , mūsikā gādhaṃ kattā , no vasitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo vasitā hoti , no gādhaṃ kattā ?

Idha , bhikkhave , ekacco puggalo dhammaṃ na pariyāpuṇāti – suttaṃ , geyyaṃ , veyyākaraṇaṃ , gāthaṃM1.423 , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo vasitā hoti , no gādhaṃ kattā .

Seyyathāpi sā , bhikkhave , mūsikā vasitā hoti , no gādhaṃ kattā ;

tathūpamāhaṃ , bhikkhave , imaṃ , puggalaṃ vadāmi .

‘‘ Kathañca , bhikkhave , puggalo neva gādhaṃ kattā hoti no vasitā ?

Idha , bhikkhave , ekacco puggalo dhammaṃ na pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ nappajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ nappajānāti .

Evaṃ kho , bhikkhaveV1.125 , puggalo neva gādhaṃ kattā hoti , no vasitā .

Seyyathāpi sā , bhikkhave , mūsikā neva gādhaṃ kattā hoti , no vasitā ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo gādhaṃ kattā ca hoti vasitā ca ?

Idha , bhikkhave , ekacco puggaloT2.146 dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

So ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .

Evaṃ kho , bhikkhave , puggalo gādhaṃ kattā ca hoti vasitā ca .

Seyyathāpi sā , bhikkhave , mūsikā gādhaṃ kattā ca hoti vasitā ca ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro mūsikūpamā puggalā santo saṃvijjamānā lokasmin ’’ ti .

Sattamaṃ .

8. Balībaddasuttaṃ

108.‘‘ Cattārome , bhikkhave , balībaddā [ balivaddā ( sī . syā . kaṃ . pī .), balibaddhā ( ka .) pu . pa .162].

Katame cattāro ?

SagavacaṇḍoP2.109 no paragavacaṇḍo , paragavacaṇḍo no sagavacaṇḍo , sagavacaṇḍo ca paragavacaṇḍo ca , neva sagavacaṇḍo no paragavacaṇḍo – ime kho , bhikkhave , cattāro balībaddā .

Evamevaṃ kho , bhikkhave , cattāro balībaddūpamā puggalā santo saṃvijjamānā lokasmiṃ .

Katame cattāro ?

Sagavacaṇḍo no paragavacaṇḍo , paragavacaṇḍo no sagavacaṇḍo , sagavacaṇḍo ca paragavacaṇḍo ca , neva sagavacaṇḍo no paragavacaṇḍo .

‘‘ KathañcaM1.424 , bhikkhave , puggalo sagavacaṇḍo hoti , no paragavacaṇḍo ?

Idha , bhikkhave , ekacco puggalo sakaparisaṃ ubbejetā hoti , no paraparisaṃ .

Evaṃ kho , bhikkhave , puggalo sagavacaṇḍo hoti , no paragavacaṇḍo .

Seyyathāpi so , bhikkhave , balībaddo sagavacaṇḍo , no paragavacaṇḍo ;

tathūpamāhaṃ , bhikkhave , imaṃ puggalaṃ vadāmi .

‘‘ KathañcaT2.147 , bhikkhave , puggalo paragavacaṇḍo hoti , no sagavacaṇḍo ?

Idha , bhikkhave , ekacco puggalo paraparisaṃ ubbejetā hoti , no sakaparisaṃ .

Evaṃ kho , bhikkhave , puggalo paragavacaṇḍoV1.126 hoti , no sagavacaṇḍo .

Seyyathāpi so , bhikkhave , balībaddo paragavacaṇḍo , no sagavacaṇḍo ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo sagavacaṇḍo ca hoti paragavacaṇḍo ca ?

Idha , bhikkhave , ekacco puggalo sakaparisaṃ ubbejetā hoti paraparisañca .

Evaṃ kho , bhikkhave , puggalo sagavacaṇḍo ca hoti paragavacaṇḍo ca .

Seyyathāpi so , bhikkhave , balībaddo sagavacaṇḍo ca paragavacaṇḍo ca ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo neva sagavacaṇḍo hoti no paragavacaṇḍo ?

Idha , bhikkhave , ekacco puggalo neva sakaparisaṃ ubbejetā hoti , no paraparisañca .

Evaṃ kho , bhikkhave , puggalo neva sagavacaṇḍo hoti , no paragavacaṇḍo .

Seyyathāpi so , bhikkhave , balībaddo neva sagavacaṇḍo , no paragavacaṇḍo ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro balībaddūpamā puggalā santo saṃvijjamānā lokasmin ’’ ti .

Aṭṭhamaṃ .

9. Rukkhasuttaṃ

109.‘‘ Cattārome , bhikkhave , rukkhā .

Katame cattāro ?

PhegguP2.110 phegguparivāro , pheggu sāraparivāro , sāro phegguparivāro , sāro sāraparivāro – ime kho , bhikkhave , cattāro rukkhā .

Evamevaṃ kho , bhikkhave , cattāro rukkhūpamā puggalā santo saṃvijjamānā lokasmiṃ .

KatameT2.148 cattāro ?

Pheggu phegguparivāro , pheggu sāraparivāro , sāro phegguparivāro , sāro sāraparivāro .

‘‘ KathañcaM1.425 , bhikkhave , puggalo pheggu hoti phegguparivāro ?

Idha , bhikkhave , ekacco puggalo dussīlo hoti pāpadhammo ;

parisāpissa hoti dussīlā pāpadhammā .

Evaṃ kho , bhikkhave , puggalo pheggu hoti phegguparivāro .

Seyyathāpi so , bhikkhave , rukkho pheggu phegguparivāro ;

tathūpamāhaṃ , bhikkhave , imaṃ puggalaṃ vadāmi .

‘‘ KathañcaV1.127 , bhikkhave , puggalo pheggu hoti sāraparivāro ?

Idha , bhikkhave , ekacco puggalo dussīlo hoti pāpadhammo ;

parisā ca khvassa hoti sīlavatī kalyāṇadhammā .

Evaṃ kho , bhikkhave , puggalo pheggu hoti sāraparivāro .

Seyyathāpi so , bhikkhave , rukkho pheggu sāraparivāro ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo sāro hoti phegguparivāro ?

Idha , bhikkhave , ekacco puggalo sīlavā hoti kalyāṇadhammo ;

parisā ca khvassa hoti dussīlā pāpadhammā .

Evaṃ kho , bhikkhave , puggalo sāro hoti phegguparivāro .

Seyyathāpi so , bhikkhave , rukkho sāro phegguparivāro ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo sāro hoti sāraparivāro ?

Idha bhikkhave , ekacco puggalo sīlavā hoti kalyāṇadhammo ;

parisāpissa hoti sīlavatī kalyāṇadhammā .

Evaṃ kho , bhikkhave , puggalo sāro hoti sāraparivāro .

Seyyathāpi so , bhikkhave , rukkho sāro sāraparivāro ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro rukkhūpamā puggalā santoT2.149 saṃvijjamānā lokasmin ’’ ti [ pu . pa .170].

Navamaṃ .

10. Āsīvisasuttaṃ

110.‘‘ Cattārome , bhikkhave , āsīvisā [ āsivisā ( ka .) pu . pa .163].

Katame cattāro ?

Āgataviso na ghoraviso , ghoraviso na āgataviso , āgataviso ca ghoraviso ca , nevāgataviso na ghoraviso – ime kho , bhikkhave , cattāro āsīvisā .

EvamevaṃP2.111 kho , bhikkhave , cattāro āsīvisūpamā puggalā santo saṃvijjamānā lokasmiṃ .

Katame cattāro ?

Āgataviso na ghoraviso , ghoraviso na āgatavisoM1.426 , āgataviso ca ghoraviso ca , nevāgataviso na ghoraviso .

‘‘ Kathañca , bhikkhave , puggalo āgataviso hoti , na ghoraviso ?

Idha , bhikkhave , ekacco puggalo abhiṇhaṃ kujjhati .

So ca khvassa kodho [ kopo ( ka .) pu . pa .163] na dīgharattaṃ anuseti .

Evaṃ khoV1.128 , bhikkhave , puggalo āgataviso hoti , na ghoraviso .

Seyyathāpi so , bhikkhave , āsīviso āgataviso , na ghoraviso ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo ghoraviso hoti , na āgataviso ?

Idha , bhikkhave , ekacco puggalo na heva kho abhiṇhaṃ kujjhati .

So ca khvassa kodho dīgharattaṃ anuseti .

Evaṃ kho , bhikkhave , puggalo ghoraviso hoti , na āgataviso .

Seyyathāpi so , bhikkhave , āsīviso ghoraviso , na āgataviso ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo āgataviso ca hoti ghoraviso ca ?

Idha , bhikkhave , ekacco puggalo abhiṇhaṃ kujjhati .

So ca khvassa kodho dīgharattaṃ anuseti .

Evaṃ kho , bhikkhave , puggalo āgataviso ca hoti ghoravisoT2.150 ca .

Seyyathāpi so , bhikkhave , āsīviso āgataviso ca ghoraviso ca ;

tathūpamāhaṃ , bhikkhave , imaṃ puggalaṃ vadāmi .

‘‘ Kathañca , bhikkhave , puggalo nevāgataviso hoti na ghoraviso ?

Idha , bhikkhave , ekacco puggalo na heva kho abhiṇhaṃ kujjhati .

So ca khvassa kodho na dīgharattaṃ anuseti .

Evaṃ kho , bhikkhave , puggalo nevāgataviso hoti , na ghoraviso .

Seyyathāpi so , bhikkhave , āsīviso nevāgataviso na ghoraviso ;

tathūpamāhaṃ , bhikkhave , imaṃ puggalaṃ vadāmi .

Ime kho , bhikkhave , cattāro āsīvisūpamā puggalā santo saṃvijjamānā lokasmin ’’ ti .

Dasamaṃ .

Valāhakavaggo paṭhamo .

Tassuddānaṃ –

Dve valāhā kumbha-udaka , rahadā dve honti ambāni ;

Mūsikā balībaddā rukkhā , āsīvisena te dasāti .

Issues

Select Version

Catukkanipātapāḷi

Catukkanipātapāḷi