4. Ānandasuttaṃ

Author： _System_Pali_VRI_ @ Administrator

174. Atha kho āyasmā ānando yenāyasmā mahākoṭṭhiko tenupasaṅkami ;

upasaṅkamitvā āyasmatā mahākoṭṭhikena saddhiṃM1.481 sammodi .

Sammodanīyaṃ kathaṃ sāraṇīyaṃ vītisāretvāV1.188 ekamantaṃ nisīdi .

Ekamantaṃ nisinno kho āyasmā ānando āyasmantaṃ mahākoṭṭhikaṃ etadavoca –

‘‘ Channaṃ , āvuso , phassāyatanānaṃ asesavirāganirodhā atthaññaṃ kiñcī ’’ ti ?

‘‘ Mā hevaṃ , āvuso ’’.

‘‘ Channaṃ , āvuso , phassāyatanānaṃ asesavirāganirodhā natthaññaṃ kiñcī ’’ ti ?

‘‘ Mā hevaṃ , āvuso ’’.

‘‘ Channaṃ , āvuso , phassāyatanānaṃ asesavirāganirodhā atthi ca natthi ca aññaṃ kiñcī ’’ ti ?

‘‘ Mā hevaṃ , āvuso ’’.

‘‘ Channaṃ , āvuso , phassāyatanānaṃ asesavirāganirodhā nevatthi no natthaññaṃ kiñcī ’’ ti ?

‘‘ Mā hevaṃ , āvuso ’’.

‘‘‘ Channaṃ , āvuso , phassāyatanānaṃ asesavirāganirodhā atthaññaṃ kiñcī ’ ti , iti puṭṭho samāno –

‘ mā hevaṃ , āvuso ’ ti vadesi .

‘ Channaṃ , āvuso , phassāyatanānaṃ asesavirāganirodhā natthaññaṃ kiñcī ’ ti , iti puṭṭho samāno –

‘ mā hevaṃ , āvuso ’ ti vadesi .

‘ Channaṃ , āvuso , phassāyatanānaṃ asesavirāganirodhā atthi ca natthi ca aññaṃ kiñcī ’ ti , iti puṭṭho samāno –

‘ mā hevaṃ , āvuso ’ ti vadesi .

‘ Channaṃ , āvuso , phassāyatanānaṃ asesavirāganirodhā nevatthi no natthaññaṃ kiñcī ’ ti , iti puṭṭho samāno –

‘ mā hevaṃ , āvuso ’ ti vadesiT2.220 .

Yathā kathaṃ panāvuso , imassa bhāsitassa attho daṭṭhabbo ’’ ti ?

‘‘‘ Channaṃ , āvuso , phassāyatanānaṃ asesavirāganirodhā atthaññaṃ kiñcī ’ ti , iti vadaṃ appapañcaṃ papañceti .

‘ Channaṃ , āvuso , phassāyatanānaṃ asesavirāganirodhā natthaññaṃ kiñcī ’ ti , iti vadaṃ appapañcaṃ papañceti .

‘ Channaṃ , āvuso , phassāyatanānaṃ asesavirāganirodhā atthi ca natthi ca aññaṃ kiñcī ’ ti , iti vadaṃ appapañcaṃ papañceti .

‘ Channaṃ , āvuso , phassāyatanānaṃ asesavirāganirodhā nevatthi no natthaññaṃ kiñcī ’ ti , iti vadaṃ appapañcaṃ papañceti .

Yāvatā , āvuso , channaṃ phassāyatanānaṃ gati tāvatā papañcassa gatiV1.189 .

Yāvatā papañcassa gati tāvatā channaṃ phassāyatanānaṃP2.163 gati .

Channaṃ , āvuso , phassāyatanānaṃ asesavirāganirodhā papañcanirodho papañcavūpasamo ’’ ti .

Catutthaṃ .