1. Samādhibhāvanāsuttaṃ

Author： _System_Pali_VRI_ @ Administrator

41.‘‘ CatassoT2.57V1.51 imā , bhikkhave , samādhibhāvanā .

Katamā catasso ?

Atthi , bhikkhave , samādhibhāvanā bhāvitā bahulīkatā diṭṭhadhammasukhavihārāya saṃvattati ;

atthi , bhikkhave , samādhibhāvanā bhāvitā bahulīkatā ñāṇadassanappaṭilābhāya saṃvattati ;

atthi , bhikkhave , samādhibhāvanā bhāvitā bahulīkatā satisampajaññāya saṃvattati ;

atthi , bhikkhave , samādhibhāvanā bhāvitā bahulīkatā āsavānaṃ khayāya saṃvattati .

‘‘ KatamāP2.45 ca , bhikkhave , samādhibhāvanā bhāvitā bahulīkatā diṭṭhadhammasukhavihārāya saṃvattati ?

Idha , bhikkhave , bhikkhu vivicceva kāmehi … catutthaṃ jhānaṃ upasampajja viharati .

Ayaṃ , bhikkhave , samādhibhāvanā bhāvitā bahulīkatā diṭṭhadhammasukhavihārāya saṃvattati .

‘‘ KatamāM1.354 ca , bhikkhave , samādhibhāvanā bhāvitā bahulīkatā ñāṇadassanappaṭilābhāya saṃvattati ?

Idha , bhikkhave , bhikkhu ālokasaññaṃ manasi karoti , divāsaññaṃ adhiṭṭhāti – yathā divā tathā rattiṃ , yathāT2.58 rattiṃ tathā divā .

Iti vivaṭena cetasā apariyonaddhena sappabhāsaṃ cittaṃ bhāveti .

Ayaṃ , bhikkhave , samādhibhāvanā bhāvitā bahulīkatā ñāṇadassanappaṭilābhāya saṃvattati .

‘‘ Katamā ca , bhikkhave , samādhibhāvanā bhāvitā bahulīkatā satisampajaññāya saṃvattati ?

Idha , bhikkhave , bhikkhuno viditā vedanā uppajjanti , viditā upaṭṭhahanti , viditā abbhatthaṃV1.52 gacchanti ;

viditā saññā … pe … viditā vitakkā uppajjanti , viditā upaṭṭhahanti , viditā abbhatthaṃ gacchanti .

Ayaṃ , bhikkhave , samādhibhāvanā bhāvitā bahulīkatā satisampajaññāya saṃvattati .

‘‘ Katamā ca , bhikkhave , samādhibhāvanā bhāvitā bahulīkatā āsavānaṃ khayāya saṃvattati ?

Idha , bhikkhave , bhikkhu pañcasu upādānakkhandhesu udayabbayānupassī viharati –

‘ iti rūpaṃ , iti rūpassa samudayo , iti rūpassa atthaṅgamo [ atthagamo ( sī . pī .)];

iti vedanā , iti vedanāya samudayo , iti vedanāya atthaṅgamo ;

iti saññā , iti saññāya samudayo , iti saññāya atthaṅgamo ;

iti saṅkhārā , iti saṅkhārānaṃ samudayo , iti saṅkhārānaṃ atthaṅgamo ;

iti viññāṇaṃ , iti viññāṇassa samudayo , iti viññāṇassa atthaṅgamo ’ ti .

Ayaṃ , bhikkhave , samādhibhāvanā bhāvitā bahulīkatā āsavānaṃ khayāya saṃvattati .

Imā kho , bhikkhave , catasso samādhibhāvanā .

Idañca pana metaṃ , bhikkhave , sandhāya bhāsitaṃ pārāyane puṇṇakapañhe –

‘‘ Saṅkhāya lokasmiṃ paroparāni ,

Yassiñjitaṃ natthi kuhiñci loke ;

SantoP2.46 vidhūmo anīgho nirāso ,

AtāriT2.59 so jātijaranti brūmī ’’ ti [ su . ni .1054; cūḷani . puṇṇakamāṇavapucchā 73].

paṭhamaṃ ;