3. Lokasuttaṃ
23.‘‘ Loko
V1.28 , bhikkhave , tathāgatena abhisambuddho .Lokasmā tathāgato visaṃyutto .
Lokasamudayo , bhikkhave , tathāgatena abhisambuddho .
Lokasamudayo tathāgatassa pahīno .
Lokanirodho , bhikkhave , tathāgatena abhisambuddho .
Lokanirodho tathāgatassa
M1.332 sacchikato .Lokanirodhagāminī paṭipadā , bhikkhave , tathāgatena abhisambuddhā .
Lokanirodhagāminī paṭipadā tathāgatassa bhāvitā .
‘‘ Yaṃ , bhikkhave , sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ
P2.24 anuvicaritaṃ manasā , sabbaṃ taṃ tathāgatena abhisambuddhaṃ .Tasmā ‘ tathāgato ’ ti vuccati .
‘‘ Yañca , bhikkhave , rattiṃ tathāgato anuttaraṃ sammāsambodhiṃ abhisambujjhati yañca rattiṃ anupādisesāya nibbānadhātuyā parinibbāyati , yaṃ etasmiṃ antare bhāsati lapati niddisati sabbaṃ taṃ tatheva hoti , no aññathā .
Tasmā ‘ tathāgato ’ ti vuccati .
‘‘ Yathāvādī , bhikkhave , tathāgato tathākārī , yathākārī tathāvādī .
Iti yathāvādī tathākārī , yathākārī tathāvādī .
Tasmā ‘ tathāgato ’ ti vuccati .
‘‘ Sadevake , bhikkhave , loke samārake sabrahmake sassamaṇabrāhmaṇiyā pajāya sadevamanussāya
T2.31 tathāgato abhibhū anabhibhūto aññadatthu daso vasavattī .Tasmā ‘ tathāgato ’ ti vuccati ’’.
‘‘ Sabbaṃ lokaṃ abhiññāya , sabbaṃ loke yathātathaṃ ;
Sabbaṃ lokaṃ [ sabbaloka ( sī . syā . kaṃ . pī .)] visaṃyutto , sabbaloke anūpayo .
‘‘ Sa ve sabbābhibhū dhīro , sabbaganthappamocano ;
Phuṭṭha ’ ssa paramā santi , nibbānaṃ akutobhayaṃ .
‘‘ Esa
V1.29 khīṇāsavo buddho , anīgho chinnasaṃsayo ;Sabbakammakkhayaṃ patto , vimutto upadhisaṅkhaye .
‘‘ Esa so bhagavā buddho , esa sīho anuttaro ;
Sadevakassa lokassa , brahmacakkaṃ pavattayī .
‘‘ Iti devā manussā ca , ye buddhaṃ saraṇaṃ gatā ;
Saṅgamma taṃ namassanti , mahantaṃ vītasāradaṃ .
‘‘ Danto
M1.333 damayataṃ seṭṭho , santo samayataṃ isi ;Mutto mocayataṃ aggo , tiṇṇo tārayataṃ varo .
‘‘ Iti hetaṃ namassanti , mahantaṃ vītasāradaṃ ;
Sadevakasmiṃ lokasmiṃ , natthi te [ natthi te ( sī . syā . kaṃ . pī .)] paṭipuggalo ’’ ti .
tatiyaṃ ;