Issues
Editor
Settings
Versions
Select Version
sāsanāre-သာသနာရေး
မြန်မာဘာသာ
Bhikkhu Bodhi
English
Catukkanipātapāḷi
Catukkanipātapāḷi

(24)4. Kammavaggo

Author： _System_Pali_VRI_ @ Administrator

(24)4. Kammavaggo

1. Saṃkhittasuttaṃ

232.‘‘ CattārimāniV1.265 , bhikkhave , kammāni mayā sayaṃ abhiññā sacchikatvā paveditāni .
Katamāni cattāri ?
Atthi , bhikkhave , kammaṃ kaṇhaṃ kaṇhavipākaṃ ;
atthi , bhikkhave , kammaṃ sukkaṃ sukkavipākaṃ ;
atthi , bhikkhave , kammaṃT2.314 kaṇhasukkaṃ kaṇhasukkavipākaṃ ;
atthi , bhikkhave , kammaṃ akaṇhaasukkaṃ [ akaṇhaṃ asukkaṃ ( sī . syā . pī .)( dī . ni .3.312; ma . ni .2.81)] akaṇhaasukkavipākaṃ kammakkhayāya saṃvattati .
Imāni kho , bhikkhave , cattāri kammāni mayā sayaṃ abhiññā sacchikatvā paveditānī ’’ ti .
Paṭhamaṃ .

2. Vitthārasuttaṃ

233.‘‘ Cattārimāni , bhikkhave , kammāni mayā sayaṃ abhiññā sacchikatvā paveditāni .
Katamāni cattāri ?
Atthi , bhikkhave , kammaṃ kaṇhaṃ kaṇhavipākaṃ ;
atthi , bhikkhave , kammaṃ sukkaṃ sukkavipākaṃ ;
atthi , bhikkhaveP2.231 , kammaṃ kaṇhasukkaṃ kaṇhasukkavipākaṃ ;
atthi , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
‘‘ Katamañca , bhikkhave , kammaṃ kaṇhaṃ kaṇhavipākaṃ ?
Idha , bhikkhave , ekacco sabyābajjhaṃ [ sabyāpajjhaṃ ( sabbattha )] kāyasaṅkhāraṃ abhisaṅkharoti , sabyābajjhaṃ vacīsaṅkhāraṃ abhisaṅkharoti , sabyābajjhaṃM1.554 manosaṅkhāraṃ abhisaṅkharoti .
So sabyābajjhaṃ kāyasaṅkhāraṃ abhisaṅkharitvā , sabyābajjhaṃ vacīsaṅkhāraṃ abhisaṅkharitvā , sabyābajjhaṃ manosaṅkhāraṃ abhisaṅkharitvā sabyābajjhaṃ lokaṃ upapajjati .
Tamenaṃ sabyābajjhaṃ lokaṃ upapannaṃ samānaṃ sabyābajjhā phassā phusanti .
So sabyābajjhehi phassehi phuṭṭho samāno sabyābajjhaṃ vedanaṃ vediyati [ vedayati ( ka .) a . ni .6.63] ekantadukkhaṃ , seyyathāpi sattā nerayikā .
Idaṃ vuccati , bhikkhave , kammaṃ kaṇhaṃ kaṇhavipākaṃ .
‘‘ KatamañcaV1.266 , bhikkhave , kammaṃ sukkaṃ sukkavipākaṃ ?
Idha , bhikkhave , ekacco abyābajjhaṃ kāyasaṅkhāraṃ abhisaṅkharoti , abyābajjhaṃ vacīsaṅkhāraṃ abhisaṅkharoti , abyābajjhaṃ manosaṅkhāraṃ abhisaṅkharoti .
So abyābajjhaṃ kāyasaṅkhāraṃ abhisaṅkharitvā , abyābajjhaṃ vacīsaṅkhāraṃ abhisaṅkharitvā , abyābajjhaṃ manosaṅkhāraṃ abhisaṅkharitvā abyābajjhaṃT2.315 lokaṃ upapajjati .
Tamenaṃ abyābajjhaṃ lokaṃ upapannaṃ samānaṃ abyābajjhā phassā phusanti .
So abyābajjhehi phassehi phuṭṭho samāno abyābajjhaṃ vedanaṃ vediyati ekantasukhaṃ , seyyathāpi devā subhakiṇhā .
Idaṃ vuccati , bhikkhave , kammaṃ sukkaṃ sukkavipākaṃ .
‘‘ Katamañca , bhikkhave , kammaṃ kaṇhasukkaṃ kaṇhasukkavipākaṃ ?
Idha , bhikkhave , ekacco sabyābajjhampi abyābajjhampi kāyasaṅkhāraṃ abhisaṅkharoti , sabyābajjhampi abyābajjhampi vacīsaṅkhāraṃ abhisaṅkharoti , sabyābajjhampi abyābajjhampi manosaṅkhāraṃ abhisaṅkharoti .
So sabyābajjhampi abyābajjhampi kāyasaṅkhāraṃ abhisaṅkharitvā , sabyābajjhampi abyābajjhampi vacīsaṅkhāraṃ abhisaṅkharitvā , sabyābajjhampi abyābajjhampi manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati .
Tamenaṃ sabyābajjhampi abyābajjhampiP2.232 lokaṃ upapannaṃ samānaṃ sabyābajjhāpi abyābajjhāpi phassā phusanti .
So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vediyati vokiṇṇasukhadukkhaṃ , seyyathāpi manussā ekacce ca devā ekacce ca vinipātikā .
Idaṃ vuccati , bhikkhave , kammaṃ kaṇhasukkaṃ kaṇhasukkavipākaṃ .
‘‘ Katamañca , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati ?
Tatra , bhikkhave , yamidaṃ kammaṃ kaṇhaṃ kaṇhavipākaṃ tassa pahānāya yā cetanā , yamidaṃ [ yampidaṃ ( sī . syā . kaṃ . pī .)] kammaṃ sukkaṃ sukkavipākaṃ tassa pahānāya yā cetanā , yamidaṃ [ yampidaṃ ( sī . syā . kaṃ . pī .)] kammaṃ kaṇhasukkaṃ kaṇhasukkavipākaṃ tassa pahānāyaM1.555 yā cetanā – idaṃ vuccati , bhikkhaveT2.316 , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Imāni kho , bhikkhave , cattāri kammāni mayā sayaṃ abhiññā sacchikatvā paveditānī ’’ ti .
Dutiyaṃ .

3. Soṇakāyanasuttaṃ

234. AthaV1.267 kho sikhāmoggallāno brāhmaṇo yena bhagavā tenupasaṅkami ;
upasaṅkamitvā bhagavatā saddhiṃ sammodi .
Sammodanīyaṃ kathaṃ sāraṇīyaṃ vītisāretvā ekamantaṃ nisīdi .
Ekamantaṃ nisinno kho sikhāmoggallāno brāhmaṇo bhagavantaṃ etadavoca –
‘‘ Purimāni , bho gotama , divasāni purimatarāni soṇakāyano māṇavo yenāhaṃ tenupasaṅkami ;
upasaṅkamitvā maṃ etadavoca –
‘ samaṇo gotamo sabbakammānaṃ akiriyaṃ paññapeti , sabbakammānaṃ kho pana akiriyaṃ paññapento ucchedaṃ āha lokassa – kammasaccāyaṃ [ kammasaccāyī ( ka .)], bho , loko kammasamārambhaṭṭhāyī ’’’ ti .
‘‘ Dassanampi kho ahaṃ , brāhmaṇa , soṇakāyanassa māṇavassa nābhijānāmi ;
kuto panevarūpo kathāsallāpo !
Cattārimāni , brāhmaṇa , kammāni mayā sayaṃ abhiññā sacchikatvā paveditāni .
Katamāni cattāri ?
Atthi , brāhmaṇa , kammaṃ kaṇhaṃ kaṇhavipākaṃ ;
atthi , brāhmaṇa , kammaṃ sukkaṃ sukkavipākaṃ ;
atthi , brāhmaṇa , kammaṃ kaṇhasukkaṃ kaṇhasukkavipākaṃ ;
atthiP2.233 , brāhmaṇa , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
‘‘ Katamañca , brāhmaṇa , kammaṃ kaṇhaṃ kaṇhavipākaṃ ?
Idha , brāhmaṇa , ekacco sabyābajjhaṃ kāyasaṅkhāraṃ abhisaṅkharoti , sabyābajjhaṃ vacīsaṅkhāraṃ abhisaṅkharoti , sabyābajjhaṃ manosaṅkhāraṃ abhisaṅkharoti .
So sabyābajjhaṃT2.317 kāyasaṅkhāraṃ abhisaṅkharitvā , sabyābajjhaṃ vacīsaṅkhāraṃ abhisaṅkharitvā , sabyābajjhaṃ manosaṅkhāraṃ abhisaṅkharitvā sabyābajjhaṃ lokaṃ upapajjati .
Tamenaṃ sabyābajjhaṃ lokaṃ upapannaṃ samānaṃ sabyābajjhā phassā phusanti .
So sabyābajjhehi phassehi phuṭṭho samāno sabyābajjhaṃ vedanaṃ vediyati ekantadukkhaṃ , seyyathāpi sattā nerayikā .
Idaṃ vuccati , brāhmaṇa , kammaṃ kaṇhaṃ kaṇhavipākaṃ .
‘‘ KatamañcaM1.556 , brāhmaṇa , kammaṃ sukkaṃ sukkavipākaṃ ?
Idha , brāhmaṇa , ekacco abyābajjhaṃ kāyasaṅkhāraṃ abhisaṅkharoti , abyābajjhaṃ vacīsaṅkhāraṃ abhisaṅkharoti , abyābajjhaṃ manosaṅkhāraṃ abhisaṅkharoti .
So abyābajjhaṃ kāyasaṅkhāraṃ abhisaṅkharitvā , abyābajjhaṃ vacīsaṅkhāraṃ abhisaṅkharitvāV1.268 , abyābajjhaṃ manosaṅkhāraṃ abhisaṅkharitvā abyābajjhaṃ lokaṃ upapajjati .
Tamenaṃ abyābajjhaṃ lokaṃ upapannaṃ samānaṃ abyābajjhā phassā phusanti .
So abyābajjhehi phassehi phuṭṭho samāno abyābajjhaṃ vedanaṃ vediyati ekantasukhaṃ , seyyathāpi devā subhakiṇhā .
Idaṃ vuccati , brāhmaṇa , kammaṃ sukkaṃ sukkavipākaṃ .
‘‘ Katamañca , brāhmaṇa , kammaṃ kaṇhasukkaṃ kaṇhasukkavipākaṃ ?
Idha , brāhmaṇa , ekacco sabyābajjhampi abyābajjhampi kāyasaṅkhāraṃ abhisaṅkharoti , sabyābajjhampi abyābajjhampi vacīsaṅkhāraṃ abhisaṅkharoti , sabyābajjhampi abyābajjhampi manosaṅkhāraṃ abhisaṅkharoti .
So sabyābajjhampi abyābajjhampi kāyasaṅkhāraṃ abhisaṅkharitvā , sabyābajjhampi abyābajjhampi vacīsaṅkhāraṃ abhisaṅkharitvā , sabyābajjhampi abyābajjhampi manosaṅkhāraṃ abhisaṅkharitvā sabyābajjhampi abyābajjhampi lokaṃT2.318 upapajjati .
Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti .
So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vediyati vokiṇṇasukhadukkhaṃ , seyyathāpi manussā ekacce ca devā ekacce ca vinipātikā .
Idaṃ vuccati , brāhmaṇa , kammaṃ kaṇhasukkaṃ kaṇhasukkavipākaṃ .
‘‘ Katamañca , brāhmaṇa , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati ?
Tatra , brāhmaṇa , yamidaṃ kammaṃ kaṇhaṃ kaṇhavipākaṃ tassa pahānāya yā cetanā , yamidaṃ kammaṃ sukkaṃ sukkavipākaṃ tassa pahānāya yā cetanā , yamidaṃ kammaṃ kaṇhasukkaṃ kaṇhasukkavipākaṃ tassa pahānāya yā cetanā – idaṃ vuccati , brāhmaṇa , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Imāni kho , brāhmaṇa , cattāri kammāni mayā sayaṃ abhiññā sacchikatvā paveditānī ’’ ti .
Tatiyaṃ .

4. Paṭhamasikkhāpadasuttaṃ

235.‘‘ Cattārimāni , bhikkhave , kammāni mayā sayaṃ abhiññā sacchikatvā paveditāni .
Katamāni cattāri ?
AtthiP2.234 , bhikkhave , kammaṃ kaṇhaṃ kaṇhavipākaṃ ;
atthi , bhikkhave , kammaṃ sukkaṃ sukkavipākaṃ ;
atthi , bhikkhave , kammaṃ kaṇhasukkaṃ kaṇhasukkavipākaṃM1.557V1.269 ;
atthi , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Katamañca , bhikkhave , kammaṃ kaṇhaṃ kaṇhavipākaṃ ?
Idha , bhikkhave , ekacco pāṇātipātī hoti , adinnādāyī hoti , kāmesumicchācārī hoti , musāvādī hoti , surāmerayamajjapamādaṭṭhāyīT2.319 hoti .
Idaṃ vuccati , bhikkhave , kammaṃ kaṇhaṃ kaṇhavipākaṃ .
‘‘ Katamañca , bhikkhave , kammaṃ sukkaṃ sukkavipākaṃ ?
Idha , bhikkhave , ekacco pāṇātipātā paṭivirato hoti , adinnādānā paṭivirato hoti , kāmesumicchācārā paṭivirato hoti , musāvādā paṭivirato hoti , surāmerayamajjapamādaṭṭhānā paṭivirato hoti .
Idaṃ vuccati , bhikkhave , kammaṃ sukkaṃ sukkavipākaṃ .
‘‘ Katamañca , bhikkhave , kammaṃ kaṇhasukkaṃ kaṇhasukkavipākaṃ ?
Idha , bhikkhave , ekacco sabyābajjhampi abyābajjhampi kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ kaṇhasukkaṃ kaṇhasukkavipākaṃ .
‘‘ Katamañca , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati ?
Tatra , bhikkhave , yamidaṃ kammaṃ kaṇhaṃ kaṇhavipākaṃ … pe … idaṃ vuccati , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Imāni kho , bhikkhave , cattāri kammāni mayā sayaṃ abhiññā sacchikatvā paveditānī ’’ ti .
Catutthaṃ .

5. Dutiyasikkhāpadasuttaṃ

236.‘‘ Cattārimāni , bhikkhave , kammāni mayā sayaṃ abhiññā sacchikatvā paveditāni .
Katamāni cattāri ?
Atthi , bhikkhave , kammaṃ kaṇhaṃ kaṇhavipākaṃ ;
atthi , bhikkhave , kammaṃ sukkaṃ sukkavipākaṃ ;
atthi , bhikkhave , kammaṃ kaṇhasukkaṃ kaṇhasukkavipākaṃ ;
atthi , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
‘‘ Katamañca , bhikkhave , kammaṃ kaṇhaṃ kaṇhavipākaṃ ?
Idha , bhikkhave , ekaccena mātā [ ekacco mātaraṃ ( ka .)] jīvitā voropitā hoti , pitā [ pitaraṃ ( ka .)] jīvitā voropito [ voropitā ( ka .)] hoti , arahaṃ [ arahantaṃ ( ka .)] jīvitā voropitoT2.320 [ voropitā ( ka .)] hotiV1.270 , tathāgatassa duṭṭhena cittena lohitaṃM1.558 uppāditaṃ [ uppāditā ( ka .)] hoti , saṅgho bhinno hoti .
IdaṃP2.235 vuccati , bhikkhave , kammaṃ kaṇhaṃ kaṇhavipākaṃ .
‘‘ Katamañca , bhikkhave , kammaṃ sukkaṃ sukkavipākaṃ ?
Idha , bhikkhave , ekacco pāṇātipātā paṭivirato hoti , adinnādānā paṭivirato hoti , kāmesumicchācārā paṭivirato hoti , musāvādā paṭivirato hoti , pisuṇāya vācāya paṭivirato hoti , pharusāya vācāya paṭivirato hoti , samphappalāpā paṭivirato hoti , anabhijjhālu hoti , abyāpannacitto hoti , sammādiṭṭhi [ sammādiṭṭhiko ( sī . syā . kaṃ .)] hoti .
Idaṃ vuccati , bhikkhave , kammaṃ sukkaṃ sukkavipākaṃ .
‘‘ Katamañca , bhikkhave , kammaṃ kaṇhasukkaṃ kaṇhasukkavipākaṃ ?
Idha , bhikkhave , ekacco sabyābajjhampi abyābajjhampi kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ kaṇhasukkaṃ kaṇhasukkavipākaṃ .
‘‘ Katamañca , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati ?
Tatra , bhikkhave , yamidaṃ kammaṃ kaṇhaṃ kaṇhavipākaṃ … pe … idaṃ vuccati , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Imāni kho , bhikkhave , cattāri kammāni mayā sayaṃ abhiññā sacchikatvā paveditānī ’’ ti .
Pañcamaṃ .

6. Ariyamaggasuttaṃ

237.‘‘ Cattārimāni , bhikkhave , kammāni mayā sayaṃ abhiññā sacchikatvā paveditāni .
Katamāni cattāri ?
Atthi , bhikkhave , kammaṃ kaṇhaṃ kaṇhavipākaṃ ;
atthi , bhikkhave , kammaṃ sukkaṃ sukkavipākaṃ ;
atthi , bhikkhave , kammaṃ kaṇhasukkaṃ kaṇhasukkavipākaṃ ;
atthi , bhikkhave , kammaṃ akaṇhaasukkaṃT2.321 akaṇhaasukkavipākaṃ kammakkhayāya saṃvattati .
‘‘ Katamañca , bhikkhave , kammaṃ kaṇhaṃ kaṇhavipākaṃ ?
Idha , bhikkhave , ekacco sabyābajjhaṃV1.271 kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ kaṇhaṃ kaṇhavipākaṃ .
‘‘ KatamañcaM1.559 , bhikkhave , kammaṃ sukkaṃ sukkavipākaṃ ?
IdhaP2.236 , bhikkhave , ekacco abyābajjhaṃ kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ sukkaṃ sukkavipākaṃ .
‘‘ Katamañca , bhikkhave , kammaṃ kaṇhasukkaṃ kaṇhasukkavipākaṃ ?
Idha , bhikkhave , ekacco sabyābajjhampi abyābajjhampi kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ kaṇhasukkaṃ kaṇhasukkavipākaṃ .
‘‘ Katamañca , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati ?
Sammādiṭṭhi … pe … sammāsamādhi .
Idaṃ vuccati , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Imāni kho , bhikkhave , cattāri kammāni mayā sayaṃ abhiññā sacchikatvā paveditānī ’’ ti .
Chaṭṭhaṃ .

7. Bojjhaṅgasuttaṃ

238.‘‘ Cattārimāni , bhikkhave , kammāni … pe … kaṇhaṃ kaṇhavipākaṃ … pe … idha , bhikkhave , ekacco sabyābajjhaṃ kāyasaṅkhāraṃT2.322 abhisaṅkharoti … pe … idaṃ vuccati , bhikkhave , kammaṃ kaṇhaṃ kaṇhavipākaṃ .
‘‘ Katamañca , bhikkhave , kammaṃ sukkaṃ sukkavipākaṃ ?
Idha , bhikkhave , ekacco abyābajjhaṃ kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ sukkaṃ sukkavipākaṃ .
‘‘ Katamañca , bhikkhave , kammaṃ kaṇhasukkaṃ kaṇhasukkavipākaṃ ?
IdhaP2.237 , bhikkhave , ekaccoV1.272 sabyābajjhampi abyābajjhampi kāyasaṅkhāraṃ abhisaṅkharoti … pe … idaṃ vuccati , bhikkhave , kammaṃ kaṇhasukkaṃ kaṇhasukkavipākaṃ .
‘‘ Katamañca , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati ?
Satisambojjhaṅgo , dhammavicayasambojjhaṅgo , vīriyasambojjhaṅgo , pītisambojjhaṅgo , passaddhisambojjhaṅgo , samādhisambojjhaṅgo , upekkhāsambojjhaṅgo – idaṃ vuccati , bhikkhave , kammaṃ akaṇhaasukkaṃ akaṇhaasukkavipākaṃ kammakkhayāya saṃvattati .
Imāni kho , bhikkhave , cattāri kammāni mayā sayaṃ abhiññā sacchikatvā paveditānī ’’ ti .
Sattamaṃ .

8. Sāvajjasuttaṃ

239.‘‘ CatūhiM1.560 , bhikkhave , dhammehi samannāgato yathābhataṃ nikkhitto evaṃ niraye .
Katamehi catūhi ?
Sāvajjena kāyakammena , sāvajjena vacīkammena , sāvajjena manokammena , sāvajjāya diṭṭhiyā – imehi kho , bhikkhave , catūhi dhammehi samannāgato yathābhataṃ nikkhitto evaṃ niraye .
‘‘ Catūhi , bhikkhave , dhammehi samannāgato yathābhataṃ nikkhitto evaṃ sagge .
Katamehi catūhi ?
Anavajjena kāyakammena , anavajjena vacīkammena , anavajjena manokammena , anavajjāya diṭṭhiyā – imehi kho , bhikkhave , catūhi dhammehi samannāgato yathābhataṃ nikkhitto evaṃ sagge ’’ ti .
Aṭṭhamaṃ .

9. Abyābajjhasuttaṃ

240.‘‘ CatūhiT2.323 , bhikkhave , dhammehi samannāgato yathābhataṃ nikkhitto evaṃ niraye .
Katamehi catūhi ?
Sabyābajjhena kāyakammena , sabyābajjhena vacīkammena , sabyābajjhena manokammena , sabyābajjhāya diṭṭhiyā – imehi kho , bhikkhave , catūhi dhammehi samannāgato yathābhataṃ nikkhitto evaṃ niraye .
‘‘ CatūhiV1.273P2.238 , bhikkhave , dhammehi samannāgato yathābhataṃ nikkhitto evaṃ sagge .
Katamehi catūhi ?
Abyābajjhena kāyakammena , abyābajjhena vacīkammena , abyābajjhena manokammena , abyābajjhāya diṭṭhiyā – imehi kho , bhikkhave , catūhi dhammehi samannāgato yathābhataṃ nikkhitto evaṃ sagge ’’ ti .
Navamaṃ .

10. Samaṇasuttaṃ

241.‘‘‘ Idheva , bhikkhave ,( paṭhamo ) samaṇo , idha dutiyo samaṇo , idha tatiyo samaṇo , idha catuttho samaṇo ;
suññā parappavādā samaṇehi aññehī ’ ti [ samaṇehi aññeti ( sī . pī . ka .) ettha aññehīti sakāya paṭiññāya saccābhiññehīti attho veditabbo . dī . ni .2.214; ma . ni .1.140]– evametaṃ , bhikkhave , sammā sīhanādaṃ nadatha .
‘‘ Katamo ca , bhikkhave , paṭhamo samaṇo ?
Idha , bhikkhave , bhikkhu tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo .
Ayaṃ , bhikkhave , paṭhamo samaṇo .
‘‘ KatamoM1.561 ca , bhikkhave , dutiyo samaṇo ?
Idha , bhikkhave , bhikkhu tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī hoti , sakideva imaṃ lokaṃ āgantvā dukkhassantaṃ karoti .
Ayaṃ , bhikkhave , dutiyo samaṇo .
‘‘ Katamo ca , bhikkhave , tatiyo samaṇo ?
Idha , bhikkhave , bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti tattha parinibbāyī anāvattidhammo tasmā lokā .
Ayaṃ , bhikkhave , tatiyo samaṇo .
‘‘ Katamo ca , bhikkhave , catuttho samaṇo ?
IdhaT2.324 , bhikkhave , bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati .
Ayaṃ , bhikkhave , catuttho samaṇo .
‘‘‘ Idheva , bhikkhave , paṭhamo samaṇo , idha dutiyo samaṇo , idha tatiyo samaṇo , idha catutthoV1.274 samaṇo ;
suññā parappavādā samaṇebhi aññehī ’ ti – evametaṃ , bhikkhave , sammā sīhanādaṃ nadathā ’’ ti .
Dasamaṃ .

11. Sappurisānisaṃsasuttaṃ

242.‘‘ SappurisaṃP2.239 , bhikkhave , nissāya cattāro ānisaṃsā pāṭikaṅkhā .
Katame cattāro ?
Ariyena sīlena vaḍḍhati , ariyena samādhinā vaḍḍhati , ariyāya paññāya vaḍḍhati , ariyāya vimuttiyā vaḍḍhati – sappurisaṃ , bhikkhave , nissāya ime cattāro ānisaṃsā pāṭikaṅkhā ’’ ti .
Ekādasamaṃ .
Kammavaggo catuttho .
Tassuddānaṃ –
Saṃkhitta vitthāra soṇakāyana ,
Sikkhāpadaṃ ariyamaggo bojjhaṅgaṃ ;
Sāvajjañceva abyābajjhaṃ ,
Samaṇo ca sappurisānisaṃsoti .