2. Ānaṇyasuttaṃ
62. Atha kho anāthapiṇḍiko gahapati yena bhagavā tenupasaṅkami ;
upasaṅkamitvā bhagavantaṃ abhivādetvā ekamantaṃ nisīdi .
Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca –
‘‘ Cattārimāni , gahapati , sukhāni adhigamanīyāni gihinā kāmabhoginā kālena kālaṃ samayena samayaṃ upādāya .
Katamāni cattāri ?
Atthisukhaṃ , bhogasukhaṃ , ānaṇyasukhaṃ [ aṇaṇasukhaṃ ( sī . syā . kaṃ . pī .)], anavajjasukhaṃ .
‘‘ Katamañca , gahapati , atthisukhaṃ ?
Idha , gahapati , kulaputtassa bhogā honti uṭṭhānavīriyādhigatā bāhābalaparicitā sedāvakkhittā dhammikā dhammaladdhā
M1.381 .So ‘ bhogā me atthi uṭṭhānavīriyādhigatā bāhābalaparicitā sedāvakkhittā dhammikā dhammaladdhā ’ ti adhigacchati sukhaṃ , adhigacchati somanassaṃ .
Idaṃ vuccati , gahapati , atthisukhaṃ .
‘‘ Katamañca , gahapati , bhogasukhaṃ ?
Idha , gahapati , kulaputto uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi paribhuñjati puññāni ca karoti .
So ‘ uṭṭhānavīriyādhigatehi bhogehi bāhābalaparicitehi sedāvakkhittehi dhammikehi dhammaladdhehi paribhuñjāmi puññāni ca karomī ’ ti adhigacchati sukhaṃ , adhigacchati somanassaṃ .
Idaṃ vuccati , gahapati , bhogasukhaṃ
T2.91 .‘‘ Katamañca , gahapati , ānaṇyasukhaṃ ?
Idha , gahapati , kulaputto na kassaci kiñci dhāreti appaṃ vā bahuṃ vā .
So ‘ na kassaci kiñci dhāremi [ kiñci vā deti ( ka .)] appaṃ vā bahuṃ vā ’ ti adhigacchati sukhaṃ , adhigacchati somanassaṃ .
Idaṃ vuccati , gahapati , ānaṇyasukhaṃ .
‘‘ Katamañca , gahapati , anavajjasukhaṃ ?
Idha , gahapati , ariyasāvako anavajjena kāyakammena samannāgato hoti , anavajjena vacīkammena samannāgato hoti , anavajjena manokammena
V1.81 samannāgato hoti .So ‘ anavajjenamhi
P2.70 kāyakammena samannāgato , anavajjena vacīkammena samannāgato , anavajjena manokammena samannāgato ’ ti adhigacchati sukhaṃ , adhigacchati somanassaṃ .Idaṃ vuccati , gahapati , anavajjasukhaṃ .
Imāni kho , gahapati , cattāri sukhāni adhigamanīyāni gihinā kāmabhoginā kālena kālaṃ samayena samayaṃ upādāyā ’’ ti .
‘‘ Ānaṇyasukhaṃ ñatvāna , atho atthisukhaṃ paraṃ ;
Bhuñjaṃ bhogasukhaṃ macco , tato paññā vipassati .
‘‘ Vipassamāno jānāti , ubho bhoge sumedhaso ;
Anavajjasukhassetaṃ , kalaṃ nāgghati soḷasin ’’ ti .
dutiyaṃ ;