2. Āpattibhayasuttaṃ

Author： _System_Pali_VRI_ @ Administrator

2. Āpattibhayasuttaṃ

244.‘‘ Cattārimāni , bhikkhave , āpattibhayāni .

Katamāni cattāri ?

Seyyathāpi , bhikkhave , coraṃ āgucāriṃ gahetvā rañño dasseyyuṃ –

‘ ayaṃ te , deva , coro āgucārī .

Imassa devo daṇḍaṃ paṇetū ’ ti .

Tamenaṃ rājā evaṃ vadeyya –

‘ gacchathaP2.241 , bho , imaṃ purisaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindathā ’ ti .

Tamenaṃ rañño purisā daḷhāya rajjuyāT2.327 pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindeyyuṃ .

Tatraññatarassa thalaṭṭhassa purisassa evamassa –

‘ pāpakaṃ vata , bho , ayaṃ puriso kammaṃ akāsi gārayhaṃ sīsacchejjaṃ .

Yatra hi nāma rañño purisā daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇenaV1.277 dvārena nikkhāmetvā dakkhiṇato nagarassa sīsaṃ chindissantiM1.564 !

So vatassāhaṃ [ so vatassāyaṃ ( sī .)] evarūpaṃ pāpakammaṃ [ pāpaṃ kammaṃ ( sī . pī .)] na kareyyaṃ [ na kareyya ( sī .) dī . ni .1.183 pāḷiyā tadaṭṭhakathāya ca saṃsandetabbaṃ ] gārayhaṃ sīsacchejjan ’ ti .

Evamevaṃ kho , bhikkhave , yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti pārājikesu dhammesu .

Tassetaṃ pāṭikaṅkhaṃ – anāpanno vā pārājikaṃ dhammaṃ na āpajjissati , āpanno vā pārājikaṃ dhammaṃ yathādhammaṃ paṭikarissati .

‘‘ Seyyathāpi , bhikkhave , puriso kāḷavatthaṃ [ kāḷakaṃ vatthaṃ ( sī . syā . kaṃ . pī .)] paridhāya kese pakiritvā musalaṃ khandhe āropetvā mahājanakāyaṃ upasaṅkamitvā evaṃ vadeyya –

‘ ahaṃ , bhante , pāpakammaṃ akāsiṃ gārayhaṃ mosallaṃ , yena me āyasmanto attamanā honti taṃ karomī ’ ti .

Tatraññatarassa thalaṭṭhassa purisassa evamassa –

‘ pāpakaṃ vata , bho , ayaṃ puriso kammaṃ akāsi gārayhaṃ mosallaṃ .

Yatra hi nāma kāḷavatthaṃ paridhāya kese pakiritvā musalaṃ khandhe āropetvā mahājanakāyaṃ upasaṅkamitvā evaṃ vakkhati –

‘ ahaṃ , bhante , pāpakammaṃ akāsiṃ gārayhaṃ mosallaṃ , yena me āyasmantoT2.328 attamanā honti taṃ karomīti .

SoP2.242 vatassāhaṃ evarūpaṃ pāpakammaṃ na kareyyaṃ gārayhaṃ mosallan ’ ti .

Evamevaṃ kho , bhikkhave , yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti saṅghādisesesu dhammesu , tassetaṃ pāṭikaṅkhaṃ – anāpanno vā saṅghādisesaṃ dhammaṃ na āpajjissati , āpanno vā saṅghādisesaṃ dhammaṃ yathādhammaṃ paṭikarissati .

‘‘ Seyyathāpi , bhikkhave , puriso kāḷavatthaṃ paridhāya kese pakiritvā bhasmapuṭaṃ [ assapuṭaṃ ( sī . syā . kaṃ . pī .)] khandhe āropetvā mahājanakāyaṃ upasaṅkamitvā evaṃ vadeyya –

‘ ahaṃ , bhante , pāpakammaṃ akāsiṃ gārayhaṃ bhasmapuṭaṃ .

Yena me āyasmanto attamanā honti taṃ karomī ’ ti .

Tatraññatarassa thalaṭṭhassa purisassa evamassa –

‘ pāpakaṃ vata , bho , ayaṃ puriso kammaṃ akāsi gārayhaṃ bhasmapuṭaṃ .

Yatra hi nāma kāḷavatthaṃ paridhāya kese pakiritvā bhasmapuṭaṃ khandhe āropetvā mahājanakāyaṃ upasaṅkamitvā evaṃ vakkhati – ahaṃ , bhante , pāpakammaṃ akāsiṃ gārayhaṃ bhasmapuṭaṃ ;

yena me āyasmanto attamanā honti taṃ karomīti .

So vatassāhaṃ evarūpaṃ pāpakammaṃ na kareyyaṃ gārayhaṃM1.565 bhasmapuṭan ’ ti .

Evamevaṃ kho , bhikkhave , yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti pācittiyesu dhammesuV1.278 , tassetaṃ pāṭikaṅkhaṃ – anāpanno vā pācittiyaṃ dhammaṃ na āpajjissati , āpanno vā pācittiyaṃ dhammaṃ yathādhammaṃ paṭikarissati .

‘‘ Seyyathāpi , bhikkhave , purisoT2.329 kāḷavatthaṃ paridhāya kese pakiritvā mahājanakāyaṃ upasaṅkamitvā evaṃ vadeyya –

‘ ahaṃ , bhante , pāpakammaṃ akāsiṃ gārayhaṃ upavajjaṃ .

Yena me āyasmanto attamanā honti taṃ karomī ’ ti .

Tatraññatarassa thalaṭṭhassa purisassa evamassa –

‘ pāpakaṃ vata , bho , ayaṃ puriso kammaṃ akāsi gārayhaṃ upavajjaṃ .

Yatra hi nāma kāḷavatthaṃ paridhāya kese pakiritvā mahājanakāyaṃ upasaṅkamitvā evaṃP2.243 vakkhati – ahaṃ , bhante , pāpakammaṃ akāsiṃ gārayhaṃ upavajjaṃ ;

yena me āyasmanto attamanā honti taṃ karomīti .

So vatassāhaṃ evarūpaṃ pāpakammaṃ na kareyyaṃ gārayhaṃ upavajjan ’ ti .

Evamevaṃ kho , bhikkhave , yassa kassaci bhikkhussa vā bhikkhuniyā vā evaṃ tibbā bhayasaññā paccupaṭṭhitā hoti pāṭidesanīyesu dhammesu , tassetaṃ pāṭikaṅkhaṃ – anāpanno vā pāṭidesanīyaṃ dhammaṃ na āpajjissati , āpanno vā pāṭidesanīyaṃ dhammaṃ yathādhammaṃ paṭikarissati .

Imāni kho , bhikkhave , cattāri āpattibhayānī ’’ ti .

Dutiyaṃ .

Issues

Select Version

Catukkanipātapāḷi

Catukkanipātapāḷi