1. Sotānugatasuttaṃ

Author： _System_Pali_VRI_ @ Administrator

1. Sotānugatasuttaṃ

191.‘‘ SotānugatānaṃV1.214T2.251 , bhikkhave , dhammānaṃ , vacasā paricitānaṃ , manasānupekkhitānaṃ , diṭṭhiyā suppaṭividdhānaṃ cattāro ānisaṃsā pāṭikaṅkhā .

KatameM1.505 cattāro ?

Idha , bhikkhave , bhikkhu dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati [ muṭṭhassatī ( sī .)] kālaṃ kurumāno aññataraṃ devanikāyaṃ upapajjati .

Tassa tattha sukhino dhammapadā plavanti [ pilapanti ( sī . syā . kaṃ . pī .)].

Dandho , bhikkhave , satuppādo ;

atha so satto khippaṃyeva visesagāmī hoti .

Sotānugatānaṃ , bhikkhave , dhammānaṃ , vacasā paricitānaṃ , manasānupekkhitānaṃ , diṭṭhiyā suppaṭividdhānaṃ ayaṃ paṭhamo ānisaṃso pāṭikaṅkho .

‘‘ Puna caparaṃ , bhikkhave , bhikkhu dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati kālaṃ kurumāno aññataraṃ devanikāyaṃ upapajjati .

Tassa tattha na heva kho sukhino dhammapadā plavanti ;

apiT2.252 ca kho bhikkhu iddhimā cetovasippatto devaparisāyaṃ dhammaṃ deseti .

Tassa evaṃ hoti –

‘ ayaṃ vā so dhammavinayo , yatthāhaṃ pubbe brahmacariyaṃ acarin ’ ti .

Dandho , bhikkhave , satuppādo ;

atha so satto khippameva visesagāmī hoti .

Seyyathāpi , bhikkhave , puriso kusalo bherisaddassa .

So addhānamaggappaṭipanno bherisaddaṃ suṇeyya .

Tassa na heva kho assa kaṅkhā vā vimati vā –

‘ bherisaddo nu kho , na nu kho bherisaddo ’ ti !

Atha kho bherisaddotveva niṭṭhaṃ gaccheyya .

Evamevaṃ kho , bhikkhave , bhikkhu dhammaṃ pariyāpuṇātiP2.186 – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati kālaṃ kurumāno aññataraṃ devanikāyaṃ upapajjati .

Tassa tattha na heva kho sukhino dhammapadā plavanti ;

api caV1.215 kho bhikkhu iddhimā cetovasippatto devaparisāyaṃ dhammaṃ deseti .

Tassa evaṃ hoti –

‘ ayaṃ vā so dhammavinayo , yatthāhaṃ pubbe brahmacariyaṃ acarin ’ ti .

Dandho , bhikkhave , satuppādo ;

atha so satto khippaṃyeva visesagāmī hoti .

Sotānugatānaṃ , bhikkhave , dhammānaṃM1.506 , vacasā paricitānaṃ , manasānupekkhitānaṃ , diṭṭhiyā suppaṭividdhānaṃ ayaṃ dutiyo ānisaṃso pāṭikaṅkho .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati kālaṃ kurumāno aññataraṃ devanikāyaṃ upapajjati .

Tassa tattha na heva kho sukhino dhammapadā plavanti , napi bhikkhu iddhimā cetovasippatto devaparisāyaṃ dhammaṃ deseti ;

api ca kho devaputto devaparisāyaṃ dhammaṃ deseti .

Tassa evaṃ hoti –

‘ ayaṃ vā so dhammavinayo , yatthāhaṃ pubbe brahmacariyaṃ acarin ’ ti .

Dandho , bhikkhave , satuppādo ;

atha so satto khippaṃyeva visesagāmī hoti .

Seyyathāpi , bhikkhave , puriso kusalo saṅkhasaddassa .

So addhānamaggappaṭipanno saṅkhasaddaṃ suṇeyya .

Tassa na heva kho assa kaṅkhā vā vimatiT2.253 vā –

‘ saṅkhasaddo nu kho , na nu kho saṅkhasaddo ’ ti !

Atha kho saṅkhasaddotveva niṭṭhaṃ gaccheyya .

Evamevaṃ kho , bhikkhave , bhikkhu dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati kālaṃ kurumāno aññataraṃ devanikāyaṃ upapajjati .

Tassa tattha na heva kho sukhino dhammapadā plavanti , napi bhikkhu iddhimā cetovasippatto devaparisāyaṃ dhammaṃ deseti ;

api ca kho devaputto devaparisāyaṃ dhammaṃ deseti .

Tassa evaṃ hoti –

‘ ayaṃ vā so dhammavinayo , yatthāhaṃ pubbe brahmacariyaṃ acarin ’ ti .

Dandho , bhikkhave , satuppādo ;

atha so satto khippaṃyeva visesagāmī hoti .

Sotānugatānaṃ , bhikkhave , dhammānaṃ , vacasā paricitānaṃ , manasānupekkhitānaṃ , diṭṭhiyā suppaṭividdhānaṃ ayaṃ tatiyo ānisaṃso pāṭikaṅkho .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati kālaṃ kurumāno aññataraṃ devanikāyaṃ upapajjati .

Tassa tattha na heva kho sukhino dhammapadā plavanti , napi bhikkhu iddhimā cetovasippatto devaparisāyaṃ dhammaṃ deseti , napi devaputto devaparisāyaṃM1.507 dhammaṃ deseti ;

api ca kho opapātiko opapātikaṃ sāreti –

‘ sarasi tvaṃ , mārisa , sarasi tvaṃV1.216 , mārisa , yattha mayaṃ pubbe brahmacariyaṃ acarimhā ’ ti .

So evamāha –

‘ sarāmi , mārisa , sarāmi , mārisā ’ ti .

Dandho , bhikkhave , satuppādo ;

atha so satto khippaṃyeva visesagāmī hoti .

Seyyathāpi , bhikkhave , dve sahāyakā sahapaṃsukīḷikā [ sahapaṃsukīḷakā ( syā . kaṃ .)].

Te kadāci karahaci aññamaññaṃ samāgaccheyyuṃ .

Añño pana [ samāgaccheyyuṃ , tamenaṃ ( sī . syā . kaṃ . pī .)] sahāyako sahāyakaṃ evaṃ vadeyya –

‘ idampi , samma , sarasi , idampi , samma , sarasī ’ ti .

So evaṃ vadeyya –

‘ sarāmiP2.187 , samma , sarāmi , sammā ’ ti .

Evamevaṃ kho , bhikkhave , bhikkhu dhammaṃ pariyāpuṇāti – suttaṃ , geyyaṃ , veyyākaraṇaṃ , gāthaṃ , udānaṃ , itivuttakaṃ , jātakaṃ , abbhutadhammaṃ , vedallaṃ .

Tassa te dhammā sotānugatā honti , vacasā paricitā , manasānupekkhitā , diṭṭhiyā suppaṭividdhā .

So muṭṭhassati kālaṃ kurumāno aññataraṃ devanikāyaṃ upapajjati .

Tassa tattha na heva kho sukhino dhammapadā plavanti , napi bhikkhu iddhimā cetovasippatto devaparisāyaṃ dhammaṃ deseti , napi devaputto devaparisāyaṃ dhammaṃ deseti ;

api ca kho opapātiko opapātikaṃ sāreti –

‘ sarasi tvaṃ , mārisa , sarasi tvaṃ , mārisa , yattha mayaṃ pubbe brahmacariyaṃ acarimhā ’ ti .

So evamāha –

‘ sarāmi , mārisa , sarāmi , mārisā ’ ti .

Dandho , bhikkhave , satuppādo ;

atha kho so satto khippaṃyevaT2.254 visesagāmī hoti .

Sotānugatānaṃ , bhikkhave , dhammānaṃ , vacasā paricitānaṃ , manasānupekkhitānaṃ , diṭṭhiyā suppaṭividdhānaṃ ayaṃ catuttho ānisaṃso pāṭikaṅkho .

Sotānugatānaṃ , bhikkhave , dhammānaṃ , vacasā paricitānaṃ , manasānupekkhitānaṃ diṭṭhiyā suppaṭividdhānaṃ ime cattāro ānisaṃsā pāṭikaṅkhā ’’ ti .

Paṭhamaṃ .

Issues

Select Version

Catukkanipātapāḷi

Catukkanipātapāḷi