8. Ariyavaṃsasuttaṃ
28.‘‘ Cattārome
M1.336 , bhikkhave , ariyavaṃsā aggaññā rattaññā vaṃsaññā porāṇā asaṃkiṇṇā asaṃkiṇṇapubbā , na saṃkīyanti na saṃkīyissanti , appaṭikuṭṭhā samaṇehi brāhmaṇehi viññūhi .Katame cattāro ?
Idha , bhikkhave , bhikkhu santuṭṭho hoti itarītarena cīvarena , itarītaracīvarasantuṭṭhiyā ca vaṇṇavādī , na ca cīvarahetu anesanaṃ appatirūpaṃ āpajjati , aladdhā ca cīvaraṃ na paritassati , laddhā ca cīvaraṃ agadhito [ agathito ( sī . pī .)] amucchito anajjhosanno ādīnavadassāvī nissaraṇapañño paribhuñjati ;
tāya ca pana itarītaracīvarasantuṭṭhiyā nevattānukkaṃseti , no [ na ( dī . ni .3.309)] paraṃ vambheti .
Yo hi tattha dakkho analaso sampajāno patissato , ayaṃ vuccati , bhikkhave , bhikkhu porāṇe aggaññe ariyavaṃse ṭhito .
‘‘ Puna
V1.33 caparaṃ , bhikkhave , bhikkhu santuṭṭho hoti itarītarena piṇḍapātena , itarītarapiṇḍapātasantuṭṭhiyā ca vaṇṇavādī , na ca piṇḍapātahetu anesanaṃ appatirūpaṃ āpajjati , aladdhā ca piṇḍapātaṃ na paritassati , laddhā ca piṇḍapātaṃ agadhito amucchito anajjhosanno ādīnavadassāvī nissaraṇapaññoP2.28 paribhuñjati ;tāya ca pana itarītarapiṇḍapātasantuṭṭhiyā nevattānukkaṃseti
T2.36 , no paraṃ vambheti .Yo hi tattha dakkho analaso sampajāno patissato , ayaṃ vuccati , bhikkhave , bhikkhu porāṇe aggaññe ariyavaṃse ṭhito .
‘‘ Puna caparaṃ , bhikkhave , bhikkhu santuṭṭho hoti itarītarena senāsanena , itarītarasenāsanasantuṭṭhiyā ca vaṇṇavādī , na ca senāsanahetu anesanaṃ appatirūpaṃ āpajjati , aladdhā ca senāsanaṃ na paritassati , laddhā ca senāsanaṃ agadhito amucchito anajjhosanno ādīnavadassāvī nissaraṇapañño paribhuñjati ;
tāya ca pana itarītarasenāsanasantuṭṭhiyā nevattānukkaṃseti , no paraṃ vambheti .
Yo hi tattha dakkho analaso sampajāno patissato , ayaṃ vuccati , bhikkhave , bhikkhu porāṇe aggaññe ariyavaṃse ṭhito .
‘‘ Puna caparaṃ , bhikkhave , bhikkhu bhāvanārāmo hoti bhāvanārato , pahānārāmo hoti pahānarato ;
tāya ca pana bhāvanārāmatāya bhāvanāratiyā
M1.337 pahānārāmatāya pahānaratiyā nevattānukkaṃseti , no paraṃ vambheti .Yo hi tattha dakkho analaso sampajāno patissato , ayaṃ vuccati , bhikkhave , bhikkhu porāṇe aggaññe ariyavaṃse ṭhito .
Ime kho , bhikkhave , cattāro ariyavaṃsā aggaññā rattaññā vaṃsaññā porāṇā asaṃkiṇṇā asaṃkiṇṇapubbā , na saṃkīyanti na saṃkīyissanti , appaṭikuṭṭhā samaṇehi brāhmaṇehi viññūhi .
‘‘ Imehi ca pana , bhikkhave , catūhi ariyavaṃsehi samannāgato bhikkhu puratthimāya cepi disāya viharati sveva aratiṃ sahati , na taṃ arati sahati ;
pacchimāya cepi disāya viharati
T2.37 sveva aratiṃ sahati , na taṃ arati sahati ;uttarāya cepi disāya viharati sveva aratiṃ sahati , na taṃ arati sahati ;
dakkhiṇāya cepi disāya viharati sveva aratiṃ sahati , na taṃ arati sahati .
Taṃ kissa hetu ?
Aratiratisaho hi , bhikkhave , dhīro ’’ ti .
‘‘ Nārati
V1.34 sahati dhīraṃ [ vīraṃ ( sī .)], nārati dhīraṃ sahati ;Dhīrova aratiṃ sahati , dhīro hi aratissaho .
‘‘ Sabbakammavihāyīnaṃ
P2.29 , panuṇṇaṃ [ paṇunnaṃ (?)] ko nivāraye ;Nekkhaṃ jambonadasseva , ko taṃ ninditumarahati ;
Devāpi naṃ pasaṃsanti , brahmunāpi pasaṃsito ’’ ti .
aṭṭhamaṃ ;