6. Ubhayasuttaṃ

Author： _System_Pali_VRI_ @ Administrator

166.‘‘ CatassoP2.154 imā , bhikkhave , paṭipadā .

Katamā catasso ?

Dukkhā paṭipadā dandhābhiññā , dukkhā paṭipadā khippābhiññā , sukhā paṭipadā dandhābhiññā , sukhā paṭipadā khippābhiññā .

‘‘ TatraM1.472 , bhikkhave , yāyaṃ paṭipadā dukkhā dandhābhiññā , ayaṃ , bhikkhave , paṭipadā ubhayeneva hīnā akkhāyati .

Yampāyaṃ paṭipadā dukkhā , imināpāyaṃ hīnā akkhāyati ;

yampāyaṃ paṭipadā dandhā , imināpāyaṃ hīnā akkhāyati .

Ayaṃ , bhikkhave , paṭipadā ubhayeneva hīnā akkhāyati .

‘‘ Tatra , bhikkhave , yāyaṃ paṭipadā dukkhā khippābhiññā , ayaṃ , bhikkhave , paṭipadā dukkhattā hīnā akkhāyati .

‘‘ TatraV1.178 , bhikkhave , yāyaṃ paṭipadā sukhā dandhābhiññā , ayaṃ , bhikkhave , paṭipadā dandhattā hīnā akkhāyati .

‘‘ Tatra , bhikkhave , yāyaṃ paṭipadā sukhā khippābhiññā , ayaṃ , bhikkhave , paṭipadā ubhayeneva paṇītā akkhāyati .

Yampāyaṃ paṭipadā sukhā , imināpāyaṃ paṇītā akkhāyati ;

yampāyaṃ paṭipadā khippā , imināpāyaṃ paṇītā akkhāyati .

Ayaṃ , bhikkhave , paṭipadā ubhayeneva paṇītā akkhāyati .

Imā kho , bhikkhave , catasso paṭipadā ’’ ti .

Chaṭṭhaṃ .