10. Uposathasuttaṃ
190. Ekaṃ
M1.503 samayaṃ bhagavā sāvatthiyaṃ viharati pubbārāme migāramātupāsāde .Tena kho pana samayena bhagavā tadahuposathe bhikkhusaṅghaparivuto nisinno hoti .
Atha kho bhagavā tuṇhībhūtaṃ tuṇhībhūtaṃ bhikkhusaṅghaṃ anuviloketvā bhikkhū āmantesi –
‘‘ Apalāpāyaṃ , bhikkhave , parisā nippalāpāyaṃ , bhikkhave , parisā suddhā sāre patiṭṭhitā .
Tathārūpo ayaṃ
T2.249 , bhikkhave , bhikkhusaṅgho , tathārūpāyaṃ , bhikkhave , parisā .Yathārūpā parisā dullabhā dassanāyapi lokasmiṃ , tathārūpo ayaṃ , bhikkhave , bhikkhusaṅgho , tathārūpāyaṃ , bhikkhave , parisā .
Yathārūpā parisā āhuneyyā pāhuneyyā dakkhiṇeyyā añjalikaraṇīyā anuttaraṃ puññakkhettaṃ lokassa , tathārūpo ayaṃ , bhikkhave , bhikkhusaṅgho , tathārūpāyaṃ , bhikkhave , parisā
V1.212 .Yathārūpāya parisāya appaṃ dinnaṃ bahu hoti bahu dinnaṃ bahutaraṃ , tathārūpo ayaṃ , bhikkhave , bhikkhusaṅgho , tathārūpāyaṃ , bhikkhave , parisā .
Yathārūpaṃ parisaṃ alaṃ yojanagaṇanānipi dassanāya gantuṃ api puṭosenāpi , tathārūpo ayaṃ , bhikkhave , bhikkhusaṅgho ,( tathārūpāyaṃ , bhikkhave , parisā )[() sī . syā . kaṃ . pī . potthakesu natthi ].
‘‘ Santi
P2.184 , bhikkhave , bhikkhū imasmiṃ bhikkhusaṅghe devappattā viharanti ;santi , bhikkhave , bhikkhū imasmiṃ bhikkhusaṅghe brahmappattā viharanti ;
santi , bhikkhave , bhikkhū imasmiṃ bhikkhusaṅghe āneñjappattā viharanti ;
santi , bhikkhave , bhikkhū imasmiṃ bhikkhusaṅghe ariyappattā viharanti .
‘‘ Kathañca , bhikkhave , bhikkhu devappatto hoti ?
Idha , bhikkhave , bhikkhu vivicceva kāmehi … pe … paṭhamaṃ jhānaṃ upasampajja viharati ;
vitakkavicārānaṃ vūpasamā … pe … dutiyaṃ jhānaṃ … pe … tatiyaṃ jhānaṃ … pe … catutthaṃ jhānaṃ upasampajja viharati .
Evaṃ kho , bhikkhave , bhikkhu devappatto hoti .
‘‘ Kathañca , bhikkhave , bhikkhu brahmappatto hoti ?
Idha , bhikkhave , bhikkhu mettāsahagatena cetasā ekaṃ disaṃ pharitvā viharati , tathā
T2.250 dutiyaṃ tathā tatiyaṃ tathā catutthaṃ .Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati .
Karuṇā … muditā … upekkhāsahagatena
M1.504 cetasā ekaṃ disaṃ pharitvā viharati , tathā dutiyaṃ tathā tatiyaṃ tathā catutthaṃ .Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati .
Evaṃ kho , bhikkhave , bhikkhu brahmappatto hoti .
‘‘ Kathañca , bhikkhave , bhikkhu āneñjappatto hoti ?
Idha , bhikkhave , bhikkhu sabbaso rūpasaññānaṃ
V1.213 samatikkamā paṭighasaññānaṃ atthaṅgamā nānattasaññānaṃ amanasikārā ‘ ananto ākāso ’ ti ākāsānañcāyatanaṃ upasampajja viharati .Sabbaso ākāsānañcāyatanaṃ samatikkamma ‘ anantaṃ viññāṇan ’ ti viññāṇañcāyatanaṃ upasampajja viharati .
Sabbaso viññāṇañcāyatanaṃ samatikkamma ‘ natthi kiñcī ’ ti ākiñcaññāyatanaṃ upasampajja viharati .
Sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati .
Evaṃ kho , bhikkhave , bhikkhu āneñjappatto hoti .
‘‘ Kathañca , bhikkhave , bhikkhu ariyappatto hoti ?
Idha , bhikkhave , bhikkhu ‘ idaṃ dukkhan ’ ti yathābhūtaṃ pajānāti … pe …‘ ayaṃ dukkhanirodhagāminī paṭipadā ’ ti yathābhūtaṃ pajānāti .
Evaṃ kho , bhikkhave , bhikkhu ariyappatto hotī ’’ ti .
Dasamaṃ .
Brāhmaṇavaggo [ yodhājīvavaggo ( sī . syā . kaṃ . pī .)] catuttho .
Tassuddānaṃ
P2.185 –Yodhā pāṭibhogasutaṃ , abhayaṃ brāhmaṇasaccena pañcamaṃ ;
Ummaggavassakāro , upako sacchikiriyā ca uposathoti .