7. Rogasuttaṃ
157.‘‘ Dveme , bhikkhave , rogā .
Katame dve ?
Kāyiko
P2.143 ca rogo cetasiko ca rogo .Dissanti , bhikkhave , sattā kāyikena rogena ekampi vassaṃ ārogyaṃ paṭijānamānā , dvepi
V1.165 vassāni ārogyaṃ paṭijānamānā , tīṇipi vassāni ārogyaṃ paṭijānamānā , cattāripi vassāni ārogyaṃ paṭijānamānā , pañcapi vassāni ārogyaṃ paṭijānamānā , dasapi vassāni ārogyaṃ paṭijānamānā , vīsatipi vassāni ārogyaṃ paṭijānamānā , tiṃsampi vassāni ārogyaṃ paṭijānamānā , cattārīsampi vassāni ārogyaṃ paṭijānamānā , paññāsampi vassāni ārogyaṃ paṭijānamānā , vassasatampi , bhiyyopi ārogyaṃ paṭijānamānāT2.192 .Te , bhikkhave , sattā sudullabhā [ dullabhā ( sī . syā . kaṃ . pī .)] lokasmiṃ ye cetasikena rogena muhuttampi ārogyaṃ paṭijānanti , aññatra khīṇāsavehi .
‘‘ Cattārome
M1.461 , bhikkhave , pabbajitassa rogā .Katame cattāro ?
Idha , bhikkhave , bhikkhu mahiccho hoti vighātavā asantuṭṭho itarītaracīvarapiṇḍapātasenāsanagilānappaccayabhesajjaparikkhārena .
So mahiccho samāno vighātavā asantuṭṭho itarītaracīvarapiṇḍapātasenāsanagilānappaccayabhesajjaparikkhārena pāpikaṃ icchaṃ paṇidahati anavaññappaṭilābhāya lābhasakkārasilokappaṭilābhāya .
So uṭṭhahati ghaṭati vāyamati anavaññappaṭilābhāya lābhasakkārasilokappaṭilābhāya .
So saṅkhāya kulāni upasaṅkamati , saṅkhāya nisīdati , saṅkhāya dhammaṃ bhāsati , saṅkhāya uccārapassāvaṃ sandhāreti .
Ime kho , bhikkhave , cattāro pabbajitassa rogā .
‘‘ Tasmātiha , bhikkhave , evaṃ sikkhitabbaṃ –
‘ na mahicchā bhavissāma vighātavanto asantuṭṭhā itarītaracīvarapiṇḍapātasenāsanagilānappaccayabhesajjaparikkhārena , na pāpikaṃ icchaṃ paṇidahissāma anavaññappaṭilābhāya lābhasakkārasilokappaṭilābhāya , na uṭṭhahissāma na ghaṭessāma na vāyamissāma anavaññappaṭilābhāya lābhasakkārasilokappaṭilābhāya , khamā bhavissāma sītassa uṇhassa jighacchāya pipāsāya ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ , uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātikā bhavissāmā ’ ti .
Evañhi vo , bhikkhave
T2.193 , sikkhitabban ’’ ti .Sattamaṃ .