Khipitakathā
48. Khipitakathāyaṃ khipīyitthāti khipito .
Khipi abyattasaddeti dhātu .
Bhāvenabhāvalakkhaṇattā tasmiṃ khipiteti
M2.362 vibhatyantaṃ .‘‘ Yasmiṃ kismiñci puggale ’’ ti lakkhaṇavantakattā ajjhāharitabbo .
Jīvāti jīva pāṇadhāraṇeti dhātu , vibhattilopo .
Yasmiṃ kismiñci puggale khipite bhikkhunā ‘‘ jīvā ’’ ti vacanaṃ na vattabbaṃ , bhikkhusmiṃ khipite gihinā ‘‘ jīvatha bhante ’’ ti vuccamāne sati ‘‘ ciraṃ jīvā ’’ ti bhikkhunā vattuṃ vaṭṭatīti yojanā .
‘‘ Vuccamāne ’’ ti ettha pana lakkhaṇassa kammavācakattā tena samānādhikaraṇaṃ kammabhūtaṃ ‘‘ bhikkhusmin ’’ ti lakkhaṇavantakammaṃ ajjhāharitabbaṃ yathā kiṃ ‘‘ gosu duyhamānāsu puriso āgato ’’ ti
V2.267 .Apare pana ācariyā īdisesu ṭhānesu ‘‘ santesū ’’ ti padaṃ ajjhāharitvā idameva lakkhaṇapadaṃ ,‘‘ gosu duyhamānāsū ’’ ti padadvayaṃ pana ‘‘ santesū ’’ ti ettha pakativikativasena kattā evāti vadanti , vīmaṃsitvā gahetabbaṃ .