Ādāsādikathā
24. Ādāsādikathāyaṃ ādāso nāma maṇḍanapakatikānaṃ manussānaṃ attano mukhacchāyādassanatthaṃ kaṃsalohādīhi
M2.340 kato bhaṇḍaviseso .Udakapatto nāma udakaṭṭhapanako pātisarāvādiko bhājanaviseso .
Kaṃsapattādīnīti ādāsabhāvena akatāni parisuddhabhāvena ālokakarāni vatthūni .
Ādi -saddena suvaṇṇarajatajātiphalikādayo saṅgaṇhāti , kañjiyādīnīti ettha ādi -saddena dravajātikāni telamadhukhīrādīni .
Ābādhapaccayāti attano mukhe uppannavaṇapaccayā .
Tenāha ‘‘ sañchavi nu kho me vaṇo ’’ tiādi .
Āyuṃ saṅkharotīti āyusaṅkhāro .
Ko so ?
Attabhāvo , taṃ āyusaṅkhāraṃ , taṃ olokento kenākārena olokeyyāti pucchāyamāha ‘‘ jiṇṇo nu khomhi noti evan ’’ ti .
Tassattho – mama attabhāvo jiṇṇo nu kho vā , no jiṇṇo nu kho vāti evaṃ iminā manasikārena kammaṭṭhānasīsena oloketuṃ vaṭṭati .
‘‘ Sobhati nu kho me attabhāvo , no vā ’’ ti evaṃ pavattena attasinehavasena oloketuṃ na vaṭṭatīti .
Na mukhaṃ ālimpitabban ti vippasannachavivaṇṇakarehi mukhalepanehi na limpitabbaṃ .
Na ummadditabban ti nānāummaddanehi na ummadditabbaṃ .
Na cuṇṇetabban ti mukhacuṇṇakena na makkhetabbaṃ .
Na manosilikāya mukhaṃ lañjetabban ti manosilāya tilakādilañjanāni na kātabbāni
V2.250 .Na kevalaṃ manosilāyameva , haritālādīhipi tāni na vaṭṭantiyeva .
Aṅgarāgādayo pākaṭāyeva .