1. Sahadhammikasikkhāpadavaṇṇanā
Sahadhammikavaggassa paṭhame sahadhammikaṃ vuccamānoti imassattho dubbacasikkhāpade vutto .
Etasmiṃ sikkhāpadeti etasmiṃ sikkhāpade yaṃ vuttaṃ , taṃ na tāva sikkhissāmīti attho .
Pācittiyan ti ettha pana anādariyabhayā lesena evaṃ vadantassa vācāya vācāya pācittiyaṃ veditabbaṃ .
Sikkhamānenāti ovādaṃ sirasā sampaṭicchitvā sikkhitukāmeneva hutvā .
Aññātabban ti ājānitabbaṃ .
Paripucchitabban ti ‘‘ imassa ko attho ’’ ti paripucchitabbaṃ .
Paripañhitabban ti cintetabbaṃ tulayitabbaṃ .
Kosambiyaṃ channattheraṃ ārabbha evaṃ bhaṇanavatthusmiṃ paññattaṃ , sādhāraṇapaññatti , anāṇattikaṃ
V0.240 , tikapācittiyaṃ , anupasampanne tikadukkaṭaṃ , ubhohipi ‘‘ idaṃ na sallekhāyā ’’ tiādinā ( pāci .436) nayeneva appaññattena vuccamānassāpi evaṃ vadato dukkaṭameva .‘‘ Jānissāmi sikkhissāmī ’’ ti bhaṇantassa , ummattakādīnañca anāpatti .
Upasampannassa paññattena vacanaṃ , asikkhitukāmatāya evaṃ vacananti imānettha dve aṅgāni .
Samuṭṭhānādīni adinnādānasadisāni , idaṃ pana dukkhavedananti .
Sahadhammikasikkhāpadavaṇṇanā niṭṭhitā .