2. Udositasikkhāpadavaṇṇanā
Dutiye
M0.158 niṭṭhitacīvarasmiṃ bhikkhunā tiettha purimasikkhāpade viya atthaṃ aggahetvā niṭṭhite cīvarasmiṃ bhikkhunoti evaṃ sāmivasena karaṇavacanassa attho veditabbo .Karaṇavasena hi bhikkhunā idaṃ nāma kammaṃ kātabbaṃ , taṃ natthi , sāmivasena pana bhikkhuno cīvarasmiṃ niṭṭhite kathine ca ubbhate evaṃ imehi cīvaraniṭṭhānakathinubbhārehi chinnapalibodho ekarattampi ce bhikkhu ticīvarena vippavaseyyāti evaṃ attho yujjati .
Tattha ticīvarenāti ticīvarādhiṭṭhānanayena adhiṭṭhitesu saṅghāṭiādīsu yenakenaci .
Vippavaseyyāti viyutto vaseyya ,‘‘ gāmo ekūpacāro nānūpacāro ’’ tiādinā ( pārā .477) nayena pāḷiyaṃ vuttānaṃ gāmanigamananivesanaudositaaṭṭamāḷapāsādahammiyanāvāsatthakhettadhaññakaraṇaārāmavihārarukkhamūlaajjhokāsappabhedānaṃ pannarasānaṃ nikkhepaṭṭhānānaṃ yatthakatthaci nikkhipitvā tesaṃ gāmādīnaṃ bahi hatthapāsātikkamena aruṇaṃ uṭṭhāpeyyāti ayamettha saṅkhepo , vitthāro pana samantapāsādikāyaṃ ( pārā . aṭṭha .2.473-477-8) vutto .
Aññatra bhikkhusammutiyāti yaṃ saṅgho gilānassa bhikkhuno ticīvarena avippavāsasammutiṃ deti , taṃ ṭhapetvā aladdhasammutikassa bhikkhuno ekarattampi vippavāsato vuttanayeneva nissaggiyaṃ pācittiyanti veditabbaṃ , kevalaṃ idha ‘‘ idaṃ me , bhante , cīvaraṃ rattivippavutthaṃ aññatra bhikkhusammutiyā nissaggiyan ’’ tiādinā nayena vacanabhedo hoti , ayaṃ pana viseso .
Sāvatthiyaṃ
V0.156 sambahule bhikkhū ārabbha santaruttarena janapadacārikaṃ pakkamanavatthusmiṃPaññattaṃ ,‘‘ aññatra bhikkhusammutiyā ’’ ti ayamettha anupaññatti , sādhāraṇapaññatti , anāṇattikaṃ , avippavutthe vippavutthasaññino ceva vematikassa ca dukkaṭaṃ .
Vippavutthe vippavutthasaññinopi avippavutthasaññinopi vematikassāpi nissaggiyaṃ pācittiyaṃ , tathā apaccuddhaṭaavissajjitādīsu ca paccuddhaṭavissajjitādisaññino .
Antoaruṇe paccuddhaṭe pana paṭhamakathine vuttavissajjitādibhede ca anāpatti , tathā laddhasammutikassa
P0.59 vippavāse .Ābādhe pana vūpasante paccāgantabbaṃ , tattheva vā ṭhitena paccuddharitabbaṃ , athāpissa puna so vā añño vā ābādho kuppati , laddhakappiyameva .
Adhiṭṭhitacīvaratā
M0.159 , anatthatakathinatā , aladdhasammutikatā , rattivippavāsoti imānettha cattāri aṅgāni .Samuṭṭhānādīni paṭhamakathine vuttappakārāneva .
Kevalañhi tattha anadhiṭṭhānaṃ avikappanañca akiriyā , idha appaccuddharaṇaṃ , ayaṃ visesoti .
Udositasikkhāpadavaṇṇanā niṭṭhitā .