5. Anāpucchāpakkamanasikkhāpadavaṇṇanā
Āsīdanti etthāti āsanan ti āha ‘‘ pallaṅkassokāsabhūte ’’ ti , ūrubaddhāsanassa okāseti attho .
Anovassakan ti nibbakokāsaṃ .
Ajjhokāse upacāran ti ajjhokāse nisīditvā dvādasahatthappamāṇaṃ padesaṃ .
Gilānāyāti yā tādisena gelaññena āpucchituṃ na sakkoti
V0.438 .Āpadāsūti ghare aggi vā uṭṭhito hoti , coro vā , evarūpe upaddave anāpucchā pakkamati , anāpatti .
Anāpucchāpakkamanasikkhāpadavaṇṇanā niṭṭhitā .