(12)2. Andhakavindavaggo
1. Kulūpakasuttaṃ
111.‘‘ Pañcahi
V2.128 , bhikkhave , dhammehi samannāgato kulūpako bhikkhu kulesu appiyo ca hoti amanāpo ca agaru ca abhāvanīyo ca .Katamehi pañcahi ?
Asanthavavissāsī [ asanthutavissāsī ( sī .), asandhavavissāsī ( ka .)] ca hoti , anissaravikappī ca , vissaṭṭhupasevī [ viyatthupasevī ( sī .), byatthupasevī ( syā . kaṃ .), vyattūpasevī ( pī .)] ca , upakaṇṇakajappī ca , atiyācanako ca .
Imehi kho , bhikkhave , pañcahi dhammehi samannāgato kulūpako bhikkhu kulesu appiyo ca hoti amanāpo ca agaru ca abhāvanīyo ca .
‘‘ Pañcahi , bhikkhave , dhammehi samannāgato kulūpako bhikkhu kulesu piyo ca hoti manāpo ca garu ca bhāvanīyo ca .
Katamehi pañcahi ?
Na asanthavavissāsī ca hoti , na anissaravikappī ca , na vissaṭṭhupasevī ca , na upakaṇṇakajappī ca , na atiyācanako ca .
Imehi
P3.137 kho , bhikkhave , pañcahi dhammehi samannāgato kulūpako bhikkhu kulesu piyo ca hoti manāpo ca garu ca bhāvanīyo cā ’’ ti .Paṭhamaṃ .
2. Pacchāsamaṇasuttaṃ
112.‘‘ Pañcahi , bhikkhave , dhammehi samannāgato pacchāsamaṇo na ādātabbo .
Katamehi pañcahi ?
Atidūre vā gacchati accāsanne vā
T3.155 , na pattapariyāpannaṃM2.121 gaṇhati , āpattisāmantā bhaṇamānaṃ na nivāreti , bhaṇamānassa antarantarā kathaṃ opāteti , duppañño hoti jaḷo eḷamūgo .Imehi kho , bhikkhave , pañcahi dhammehi samannāgato pacchāsamaṇo na ādātabbo .
‘‘ Pañcahi , bhikkhave , dhammehi samannāgato pacchāsamaṇo ādātabbo .
Katamehi pañcahi ?
Nātidūre gacchati na accāsanne , pattapariyāpannaṃ gaṇhati , āpattisāmantā bhaṇamānaṃ nivāreti
V2.129 , bhaṇamānassa na antarantarā kathaṃ opāteti , paññavā hoti ajaḷo aneḷamūgo .Imehi kho , bhikkhave , pañcahi dhammehi samannāgato pacchāsamaṇo ādātabbo ’’ ti .
Dutiyaṃ .
3. Sammāsamādhisuttaṃ
113.‘‘ Pañcahi , bhikkhave , dhammehi samannāgato bhikkhu abhabbo sammāsamādhiṃ upasampajja viharituṃ .
Katamehi pañcahi ?
Idha , bhikkhave , bhikkhu akkhamo hoti rūpānaṃ , akkhamo saddānaṃ , akkhamo gandhānaṃ , akkhamo rasānaṃ , akkhamo phoṭṭhabbānaṃ .
Imehi kho , bhikkhave , pañcahi dhammehi samannāgato bhikkhu abhabbo sammāsamādhiṃ upasampajja viharituṃ .
‘‘ Pañcahi , bhikkhave , dhammehi samannāgato bhikkhu bhabbo sammāsamādhiṃ upasampajja viharituṃ .
Katamehi pañcahi ?
Idha
P3.138 , bhikkhave , bhikkhu khamo hoti rūpānaṃ , khamo saddānaṃ , khamo gandhānaṃ , khamo rasānaṃ , khamo phoṭṭhabbānaṃ .Imehi kho , bhikkhave , pañcahi dhammehi samannāgato bhikkhu bhabbo sammāsamādhiṃ upasampajja viharitun ’’ ti .
Tatiyaṃ .
4. Andhakavindasuttaṃ
114. Ekaṃ samayaṃ bhagavā magadhesu viharati andhakavinde .
Atha
T3.156 kho āyasmā ānando yena bhagavā tenupasaṅkami ;upasaṅkamitvā bhagavantaṃ abhivādetvā ekamantaṃ nisīdi .
Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘ Ye te , ānanda , bhikkhū navā acirapabbajitā adhunāgatā imaṃ dhammavinayaṃ , te vo , ānanda , bhikkhū pañcasu dhammesu samādapetabbā [ samādāpetabbā (?)] nivesetabbā patiṭṭhāpetabbā
M2.122 .Katamesu pañcasu ?
‘ Etha tumhe , āvuso , sīlavā hotha , pātimokkhasaṃvarasaṃvutā viharatha ācāragocarasampannā aṇumattesu vajjesu bhayadassāvino , samādāya sikkhatha sikkhāpadesū ’ ti – iti pātimokkhasaṃvare samādapetabbā nivesetabbā patiṭṭhāpetabbā .
‘‘‘ Etha tumhe , āvuso , indriyesu guttadvārā viharatha ārakkhasatino nipakkasatino [ nipakasatino ( sī . syā .), nepakkasatino (?)], sārakkhitamānasā
V2.130 satārakkhena cetasā samannāgatā ’ ti – iti indriyasaṃvare samādapetabbā nivesetabbā patiṭṭhāpetabbā .‘‘‘ Etha tumhe , āvuso , appabhassā hotha , bhasse pariyantakārino ’ ti – iti bhassapariyante samādapetabbā nivesetabbā patiṭṭhāpetabbā .
‘‘‘ Etha tumhe , āvuso , āraññikā hotha , araññavanapatthāni pantāni senāsanāni paṭisevathā ’ ti – iti kāyavūpakāse samādapetabbā nivesetabbā patiṭṭhāpetabbā .
‘‘‘ Etha tumhe , āvuso , sammādiṭṭhikā hotha sammādassanena samannāgatā ’ ti – iti sammādassane samādapetabbā nivesetabbā patiṭṭhāpetabbā .
Ye
P3.139 te , ānanda , bhikkhū navā acirapabbajitā adhunāgatā imaṃ dhammavinayaṃ , te vo , ānanda , bhikkhū imesu pañcasu dhammesu samādapetabbā nivesetabbā patiṭṭhāpetabbā ’’ tiT3.157 .Catutthaṃ .
5. Maccharinīsuttaṃ
115.‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ niraye .
Katamehi pañcahi ?
Āvāsamaccharinī hoti , kulamaccharinī hoti , lābhamaccharinī hoti , vaṇṇamaccharinī hoti , dhammamaccharinī hoti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ niraye .
‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ sagge .
Katamehi pañcahi ?
Na āvāsamaccharinī hoti , na kulamaccharinī hoti , na lābhamaccharinī hoti , na vaṇṇamaccharinī hoti , na dhammamaccharinī hoti
M2.123 .Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ sagge ’’ ti .
Pañcamaṃ .
6. Vaṇṇanāsuttaṃ
116.‘‘ Pañcahi
V2.131 , bhikkhave , dhammehi samannāgatā bhikkhunī yathābhataṃ nikkhittā evaṃ niraye .Katamehi pañcahi ?
Ananuvicca apariyogāhetvā avaṇṇārahassa vaṇṇaṃ bhāsati , ananuvicca apariyogāhetvā vaṇṇārahassa avaṇṇaṃ bhāsati , ananuvicca apariyogāhetvā appasādanīye ṭhāne pasādaṃ upadaṃseti , ananuvicca apariyogāhetvā pasādanīye ṭhāne appasādaṃ upadaṃseti , saddhādeyyaṃ vinipāteti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ niraye .
‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ sagge .
Katamehi pañcahi ?
Anuvicca pariyogāhetvā avaṇṇārahassa avaṇṇaṃ bhāsati , anuvicca pariyogāhetvā vaṇṇārahassa vaṇṇaṃ bhāsati , anuvicca
P3.140 pariyogāhetvāT3.158 appasādanīye ṭhāne appasādaṃ upadaṃseti , anuvicca pariyogāhetvā pasādanīye ṭhāne pasādaṃ upadaṃseti , saddhādeyyaṃ na vinipāteti .Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ sagge ’’ ti .
Chaṭṭhaṃ .
7. Issukinīsuttaṃ
117.‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ niraye .
Katamehi pañcahi ?
Ananuvicca apariyogāhetvā avaṇṇārahassa vaṇṇaṃ bhāsati , ananuvicca apariyogāhetvā vaṇṇārahassa avaṇṇaṃ bhāsati , issukinī ca hoti , maccharinī ca , saddhādeyyaṃ [ saddhādeyyañca ( syā .)] vinipāteti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ niraye .
‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ sagge .
Katamehi pañcahi ?
Anuvicca pariyogāhetvā avaṇṇārahassa avaṇṇaṃ bhāsati , anuvicca pariyogāhetvā vaṇṇārahassa vaṇṇaṃ bhāsati
M2.124 , anissukinī ca hoti , amaccharinī ca , saddhādeyyaṃV2.132 na vinipāteti .Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ sagge ’’ ti .
Sattamaṃ .
8. Micchādiṭṭhikasuttaṃ
118.‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ niraye .
Katamehi pañcahi ?
Ananuvicca apariyogāhetvā avaṇṇārahassa vaṇṇaṃ bhāsati , ananuvicca apariyogāhetvā vaṇṇārahassa avaṇṇaṃ bhāsati , micchādiṭṭhikā ca hoti , micchāsaṅkappā ca , saddhādeyyaṃ vinipāteti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ niraye .
‘‘ Pañcahi
P3.141 , bhikkhave , dhammehi samannāgatā bhikkhunī yathābhataṃ nikkhittā evaṃ saggeT3.159 .Katamehi pañcahi ?
Anuvicca pariyogāhetvā avaṇṇārahassa avaṇṇaṃ bhāsati , anuvicca pariyogāhetvā vaṇṇārahassa vaṇṇaṃ bhāsati , sammādiṭṭhikā ca , hoti , sammāsaṅkappā ca , saddhādeyyaṃ na vinipāteti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ sagge ’’ ti .
Aṭṭhamaṃ .
9. Micchāvācāsuttaṃ
119.‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ niraye .
Katamehi pañcahi ?
Ananuvicca apariyogāhetvā avaṇṇārahassa vaṇṇaṃ bhāsati , ananuvicca apariyogāhetvā vaṇṇārahassa avaṇṇaṃ bhāsati , micchāvācā ca hoti , micchākammantā ca , saddhādeyyaṃ vinipāteti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ niraye .
‘‘ Pañcahi , bhikkhave , dhammehi samannāgatā bhikkhunī yathābhataṃ nikkhittā evaṃ sagge .
Katamehi pañcahi ?
Anuvicca pariyogāhetvā avaṇṇārahassa avaṇṇaṃ bhāsati , anuvicca pariyogāhetvā vaṇṇārahassa vaṇṇaṃ bhāsati , sammāvācā ca hoti , sammākammantā ca , saddhādeyyaṃ
V2.133 na vinipāteti .Imehi kho bhikkhave , pañcahi dhammehi samannāgatā bhikkhunī yathābhataṃ nikkhittā evaṃ sagge ’’ ti .
Navamaṃ .
10. Micchāvāyāmasuttaṃ
120.‘‘ Pañcahi
M2.125 , bhikkhave , dhammehi samannāgatā bhikkhunī yathābhataṃ nikkhittā evaṃ niraye .Katamehi pañcahi ?
Ananuvicca apariyogāhetvā avaṇṇārahassa vaṇṇaṃ bhāsati , ananuvicca apariyogāhetvā vaṇṇārahassa avaṇṇaṃ bhāsati , micchāvāyāmā ca hoti , micchāsatinī ca [ micchāsati ca ( syā .)], saddhādeyyaṃ vinipāteti .
Imehi
P3.142 kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ niraye .‘‘ Pañcahi , bhikkhave , dhammehi
T3.160 samannāgatā bhikkhunī yathābhataṃ nikkhittā evaṃ sagge .Katamehi pañcahi ?
Anuvicca pariyogāhetvā avaṇṇārahassa avaṇṇaṃ bhāsati , anuvicca pariyogāhetvā vaṇṇārahassa vaṇṇaṃ bhāsati , sammāvāyāmā ca hoti , sammāsatinī ca , saddhādeyyaṃ na vinipāteti .
Imehi kho , bhikkhave , pañcahi dhammehi samannāgatā bhikkhunī yathābhataṃ nikkhittā evaṃ sagge ’’ ti .
Dasamaṃ .
Andhakavindavaggo dutiyo .
Tassuddānaṃ –
Kulūpako pacchāsamaṇo , samādhiandhakavindaṃ ;
Maccharī vaṇṇanā issā , diṭṭhivācāya vāyamāti .