(22)2. Akkosakavaggo
1. Akkosakasuttaṃ
211.‘‘ Yo
V2.232P3.252 so , bhikkhave , bhikkhu akkosakaparibhāsako ariyūpavādī sabrahmacārīnaṃ , tassa pañca ādīnavā pāṭikaṅkhā .Katame pañca ?
Pārājiko vā hoti chinnaparipantho [ chinnaparibandho ( ka .)], aññataraṃ vā saṃkiliṭṭhaṃ āpattiṃ āpajjati , bāḷhaṃ vā rogātaṅkaṃ phusati , sammūḷho kālaṃ karoti , kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati .
Yo so , bhikkhave , bhikkhu akkosakaparibhāsako ariyūpavādī sabrahmacārīnaṃ , tassa ime pañca ādīnavā pāṭikaṅkhā ’’ ti .
Paṭhamaṃ .
2. Bhaṇḍanakārakasuttaṃ
212.‘‘ Yo so , bhikkhave , bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako , tassa pañca ādīnavā pāṭikaṅkhā .
Katame pañca ?
Anadhigataṃ nādhigacchati , adhigatā [ adhigataṃ ( sabbattha )] parihāyati , pāpako kittisaddo abbhuggacchati , sammūḷho kālaṃ karoti , kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati .
Yo so , bhikkhave , bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako , tassa ime pañca ādīnavā pāṭikaṅkhā ’’ ti .
Dutiyaṃ .
3. Sīlasuttaṃ
213.[ mahāva .209; dī . ni .3.316]‘‘ Pañcime
T3.281M2.221 , bhikkhave , ādīnavā dussīlassa sīlavipattiyā .Katame pañca ?
Idha , bhikkhave , dussīlo sīlavipanno pamādādhikaraṇaṃ mahatiṃ bhogajāniṃ nigacchati .
Ayaṃ , bhikkhave , paṭhamo ādīnavo dussīlassa sīlavipattiyā .
‘‘ Puna
V2.233 caparaṃ , bhikkhave , dussīlassa sīlavipannassa pāpako kittisaddo abbhuggacchati .Ayaṃ , bhikkhave , dutiyo ādīnavo dussīlassa sīlavipattiyā .
‘‘ Puna
P3.253 caparaṃ , bhikkhave , dussīlo sīlavipanno yaññadeva parisaṃ upasaṅkamati – yadi khattiyaparisaṃ , yadi brāhmaṇaparisaṃ , yadi gahapatiparisaṃ , yadi samaṇaparisaṃ – avisārado upasaṅkamati maṅkubhūto .Ayaṃ , bhikkhave , tatiyo ādīnavo dussīlassa sīlavipattiyā .
‘‘ Puna caparaṃ , bhikkhave , dussīlo sīlavipanno sammūḷho kālaṃ karoti .
Ayaṃ , bhikkhave , catuttho ādīnavo dussīlassa sīlavipattiyā .
‘‘ Puna caparaṃ , bhikkhave , dussīlo sīlavipanno kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati .
Ayaṃ , bhikkhave , pañcamo ādīnavo dussīlassa sīlavipattiyā .
Ime kho , bhikkhave , pañca ādīnavā dussīlassa sīlavipattiyā .
‘‘ Pañcime , bhikkhave , ānisaṃsā sīlavato sīlasampadāya .
Katame pañca ?
Idha , bhikkhave , sīlavā sīlasampanno appamādādhikaraṇaṃ mahantaṃ bhogakkhandhaṃ adhigacchati .
Ayaṃ , bhikkhave , paṭhamo ānisaṃso sīlavato sīlasampadāya .
‘‘ Puna caparaṃ , bhikkhave , sīlavato sīlasampannassa kalyāṇo kittisaddo abbhuggacchati .
Ayaṃ , bhikkhave , dutiyo ānisaṃso sīlavato sīlasampadāya .
‘‘ Puna caparaṃ , bhikkhave , sīlavā sīlasampanno yaññadeva parisaṃ upasaṅkamati – yadi khattiyaparisaṃ , yadi brāhmaṇaparisaṃ
T3.282 , yadi gahapatiparisaṃ , yadi samaṇaparisaṃ – visārado upasaṅkamati amaṅkubhūto .Ayaṃ bhikkhave , tatiyo ānisaṃso sīlavato sīlasampadāya .
‘‘ Puna
M2.222 caparaṃ , bhikkhave , sīlavā sīlasampanno asammūḷho kālaṃ karoti .Ayaṃ , bhikkhave , catuttho ānisaṃso sīlavato sīlasampadāya .
‘‘ Puna
V2.234 caparaṃ , bhikkhave , sīlavā sīlasampanno kāyassa bhedā paraṃ maraṇā sugatiṃ saggaṃ lokaṃ upapajjati .Ayaṃ , bhikkhave , pañcamo ānisaṃso sīlavato sīlasampadāya .
Ime
P3.254 kho , bhikkhave , pañca ānisaṃsā sīlavato sīlasampadāyā ’’ ti .Tatiyaṃ .
4. Bahubhāṇisuttaṃ
214.‘‘ Pañcime , bhikkhave , ādīnavā bahubhāṇismiṃ puggale .
Katame pañca ?
Musā bhaṇati , pisuṇaṃ bhaṇati , pharusaṃ bhaṇati , samphappalāpaṃ bhaṇati , kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati .
Ime kho , bhikkhave , pañca ādīnavā bahubhāṇismiṃ puggale .
‘‘ Pañcime , bhikkhave , ānisaṃsā mantabhāṇismiṃ puggale .
Katame pañca ?
Na musā bhaṇati , na pisuṇaṃ bhaṇati , na pharusaṃ bhaṇati , na samphappalāpaṃ bhaṇati , kāyassa bhedā paraṃ maraṇā sugatiṃ saggaṃ lokaṃ upapajjati .
Ime kho , bhikkhave , pañca ānisaṃsā mantabhāṇismiṃ puggale ’’ ti .
Catutthaṃ .
5. Paṭhamaakkhantisuttaṃ
215.‘‘ Pañcime , bhikkhave , ādīnavā akkhantiyā .
Katame pañca ?
Bahuno janassa appiyo hoti amanāpo , verabahulo ca hoti , vajjabahulo ca , sammūḷho kālaṃ karoti , kāyassa bhedā paraṃ maraṇā apāyaṃ
T3.283 duggatiṃ vinipātaṃ nirayaṃ upapajjati .Ime kho , bhikkhave , pañca ādīnavā akkhantiyā .
‘‘ Pañcime , bhikkhave , ānisaṃsā khantiyā .
Katame pañca ?
Bahuno janassa piyo hoti manāpo , na verabahulo hoti , na vajjabahulo , asammūḷho kālaṃ karoti , kāyassa bhedā paraṃ maraṇā sugatiṃ saggaṃ lokaṃ upapajjati .
Ime kho , bhikkhave , pañca ānisaṃsā khantiyā ’’ ti .
Pañcamaṃ .
6. Dutiyaakkhantisuttaṃ
216.‘‘ Pañcime
V2.235P3.255 , bhikkhave , ādīnavā akkhantiyā .Katame pañca ?
Bahuno janassa appiyo hoti amanāpo , luddo ca hoti , vippaṭisārī ca , sammūḷho
M2.223 kālaṃ karoti , kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati .Ime kho , bhikkhave , pañca ādīnavā akkhantiyā .
‘‘ Pañcime , bhikkhave , ānisaṃsā khantiyā .
Katame pañca ?
Bahuno janassa piyo hoti manāpo , aluddo ca hoti , avippaṭisārī ca , asammūḷho kālaṃ karoti , kāyassa bhedā paraṃ maraṇā sugatiṃ saggaṃ lokaṃ upapajjati .
Ime kho , bhikkhave , pañca ānisaṃsā khantiyā ’’ ti .
Chaṭṭhaṃ .
7. Paṭhamaapāsādikasuttaṃ
217.‘‘ Pañcime , bhikkhave , ādīnavā apāsādike .
Katame pañca ?
Attāpi attānaṃ upavadati , anuvicca viññū garahanti , pāpako kittisaddo abbhuggacchati , sammūḷho kālaṃ karoti , kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati .
Ime kho , bhikkhave , pañca ādīnavā apāsādike .
‘‘ Pañcime , bhikkhave , ānisaṃsā pāsādike
T3.284 .Katame pañca ?
Attāpi attānaṃ na upavadati , anuvicca viññū pasaṃsanti , kalyāṇo kittisaddo abbhuggacchati , asammūḷho kālaṃ karoti , kāyassa bhedā paraṃ maraṇā sugatiṃ saggaṃ lokaṃ upapajjati .
Ime kho , bhikkhave , pañca ānisaṃsā pāsādike ’’ ti .
Sattamaṃ .
8. Dutiyaapāsādikasuttaṃ
218.‘‘ Pañcime , bhikkhave , ādīnavā apāsādike .
Katame pañca ?
Appasannā
P3.256 nappasīdanti , pasannānañca ekaccānaṃ aññathattaṃ hoti , satthusāsanaṃ akataṃ [ na kataṃ ( syā . kaṃ . ka .)] hoti , pacchimā janatāV2.236 diṭṭhānugatiṃ āpajjati , cittamassa nappasīdati .Ime kho , bhikkhave , pañca ādīnavā apāsādike .
‘‘ Pañcime , bhikkhave , ānisaṃsā pāsādike .
Katame pañca ?
Appasannā pasīdanti , pasannānañca bhiyyobhāvo hoti , satthusāsanaṃ kataṃ hoti , pacchimā janatā diṭṭhānugatiṃ āpajjati , cittamassa pasīdati .
Ime kho , bhikkhave , pañca ānisaṃsā pāsādike ’’ ti .
Aṭṭhamaṃ .
9. Aggisuttaṃ
219.‘‘ Pañcime
M2.224 , bhikkhave , ādīnavā aggismiṃ .Katame pañca ?
Acakkhusso , dubbaṇṇakaraṇo , dubbalakaraṇo , saṅgaṇikāpavaḍḍhano [ saṅgaṇikāpavaddhano ( sī .), saṅgaṇikārāmabaddhano ( ka .)], tiracchānakathāpavattaniko hoti .
Ime kho , bhikkhave , pañca ādīnavā aggismin ’’ ti .
Navamaṃ .
10. Madhurāsuttaṃ
220.‘‘ Pañcime , bhikkhave , ādīnavā madhurāyaṃ .
Katame pañca ?
Visamā , bahurajā , caṇḍasunakhā , vāḷayakkhā , dullabhapiṇḍā – ime kho , bhikkhave , pañca ādīnavā madhurāyan ’’ ti .
Dasamaṃ .
Akkosakavaggo dutiyo .
Tassuddānaṃ –
Akkosabhaṇḍanasīlaṃ
T3.285P3.257 , bahubhāṇī dve akhantiyo ;Apāsādikā dve vuttā , aggismiṃ madhurena cāti .