5. Mātāputtasuttaṃ
55. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena sāvatthiyaṃ ubho mātāputtā vassāvāsaṃ upagamiṃsu [ upasaṅkamiṃsu ( ka .)]– bhikkhu ca bhikkhunī ca .
Te aññamaññassa abhiṇhaṃ dassanakāmā ahesuṃ .
Mātāpi puttassa abhiṇhaṃ dassanakāmā ahosi ;
puttopi mātaraṃ abhiṇhaṃ dassanakāmo ahosi .
Tesaṃ abhiṇhaṃ dassanā saṃsaggo ahosi .
Saṃsagge sati vissāso ahosi .
Vissāse sati otāro ahosi .
Te otiṇṇacittā sikkhaṃ apaccakkhāya
T3.77 dubbalyaṃ anāvikatvā methunaṃ dhammaṃ paṭiseviṃsu .Atha
V2.63 kho sambahulā bhikkhū yena bhagavā tenupasaṅkamiṃsu ;upasaṅkamitvā bhagavantaṃ abhivādetvā ekamantaṃ nisīdiṃsu .
Ekamantaṃ nisinno kho te bhikkhū bhagavantaṃ etadavocuṃ –
‘‘ idha , bhante , sāvatthiyaṃ ubho mātāputtā
M2.60 vassāvāsaṃ upagamiṃsu – bhikkhu ca bhikkhunī ca , te aññamaññassa abhiṇhaṃP3.68 dassanakāmā ahesuṃ , mātāpi puttassa abhiṇhaṃ dassanakāmā ahosi , puttopi mātaraṃ abhiṇhaṃ dassanakāmo ahosi .Tesaṃ abhiṇhaṃ dassanā saṃsaggo ahosi , saṃsagge sati vissāso ahosi , vissāse sati otāro ahosi , te otiṇṇacittā sikkhaṃ apaccakkhāya dubbalyaṃ anāvikatvā methunaṃ dhammaṃ paṭiseviṃsū ’’ ti .
‘‘ Kiṃ nu so , bhikkhave , moghapuriso maññati –
‘ na mātā putte sārajjati , putto vā pana mātarī ’ ti ?
Nāhaṃ , bhikkhave , aññaṃ ekarūpampi samanupassāmi evaṃ [ yaṃ evaṃ ( sī .)] rajanīyaṃ evaṃ kamanīyaṃ evaṃ madanīyaṃ evaṃ bandhanīyaṃ evaṃ mucchanīyaṃ evaṃ antarāyakaraṃ anuttarassa yogakkhemassa adhigamāya yathayidaṃ , bhikkhave , itthirūpaṃ .
Itthirūpe , bhikkhave , sattā rattā giddhā gathitā [ gadhitā ( syā . pī . ka .)] mucchitā ajjhosannā [ ajjhopannā ( bahūsu )].
Te dīgharattaṃ socanti itthirūpavasānugā .
‘‘ Nāhaṃ , bhikkhave , aññaṃ ekasaddampi … pe … ekagandhampi … ekarasampi … ekaphoṭṭhabbampi samanupassāmi evaṃ rajanīyaṃ evaṃ kamanīyaṃ evaṃ madanīyaṃ evaṃ bandhanīyaṃ evaṃ mucchanīyaṃ evaṃ antarāyakaraṃ anuttarassa yogakkhemassa adhigamāya yathayidaṃ , bhikkhave , itthiphoṭṭhabbaṃ
T3.78 .Itthiphoṭṭhabbe , bhikkhave , sattā rattā giddhā gathitā mucchitā ajjhosannā .
Te dīgharattaṃ socanti itthiphoṭṭhabbavasānugā .
‘‘ Itthī , bhikkhave , gacchantīpi purisassa cittaṃ pariyādāya tiṭṭhati ;
ṭhitāpi … pe … nisinnāpi … sayānāpi … hasantīpi … bhaṇantīpi … gāyantīpi … rodantīpi … ugghātitāpi [ ugghānitāpi ( sī .)]… matāpi purisassa cittaṃ pariyādāya tiṭṭhati .
Yañhi taṃ , bhikkhave , sammā vadamāno vadeyya –
‘ samantapāso mārassā ’ ti mātugāmaṃyeva sammā vadamāno vadeyya –
‘ samantapāso mārassā ’’’ ti .
‘‘ Sallape
P3.69 asihatthena , pisācenāpi sallape ;Āsīvisampi āsīde [ āsadde ( syā . kaṃ .)], yena daṭṭho na jīvati .
‘‘ Natveva
V2.64 eko ekāya , mātugāmena sallape ;Muṭṭhassatiṃ
M2.61 tā bandhanti , pekkhitena sitena ca [ mhitena ca ( syā . kaṃ .)].‘‘ Athopi dunnivatthena , mañjunā bhaṇitena ca ;
Neso jano svāsīsado , api ugghātito mato .
‘‘ Pañca kāmaguṇā ete , itthirūpasmiṃ dissare ;
Rūpā saddā rasā gandhā , phoṭṭhabbā ca manoramā .
‘‘ Tesaṃ kāmoghavūḷhānaṃ , kāme aparijānataṃ ;
Kālaṃ gati [ gatiṃ ( sī . syā . kaṃ . pī .)] bhavābhavaṃ , saṃsārasmiṃ purakkhatā .
‘‘ Ye
T3.79 ca kāme pariññāya , caranti akutobhayā ;Te ve pāraṅgatā loke , ye pattā āsavakkhayan ’’ ti .
pañcamaṃ ;