10. Bhaddajisuttaṃ
170. Ekaṃ
P3.202 samayaṃ āyasmā ānando kosambiyaṃ viharati ghositārāme .Atha kho āyasmā bhaddaji yenāyasmā ānando tenupasaṅkami ;
upasaṅkamitvā āyasmatā ānandena saddhiṃ sammodi .
Sammodanīyaṃ kathaṃ sāraṇīyaṃ vītisāretvā ekamantaṃ nisīdi .
Ekamantaṃ nisinnaṃ kho āyasmantaṃ bhaddajiṃ āyasmā ānando etadavoca –
‘‘ kiṃ nu kho , āvuso bhaddaji , dassanānaṃ aggaṃ , kiṃ savanānaṃ aggaṃ , kiṃ sukhānaṃ aggaṃ , kiṃ saññānaṃ aggaṃ , kiṃ bhavānaṃ aggan ’’ ti ?
‘‘ Atthāvuso , brahmā abhibhū anabhibhūto aññadatthudaso vasavattī , yo taṃ brahmānaṃ passati , idaṃ dassanānaṃ aggaṃ .
Atthāvuso , ābhassarā nāma devā sukhena abhisannā parisannā .
Te kadāci karahaci udānaṃ udānenti –
‘ aho sukhaṃ , aho sukhan ’ ti !
Yo taṃ saddaṃ suṇāti , idaṃ savanānaṃ aggaṃ .
Atthāvuso , subhakiṇhā nāma devā .
Te santaṃyeva tusitā sukhaṃ paṭivedenti , idaṃ sukhānaṃ aggaṃ .
Atthāvuso , ākiñcaññāyatanūpagā devā , idaṃ saññānaṃ
T3.226 aggaṃ .Atthāvuso , nevasaññānāsaññāyatanūpagā devā , idaṃ bhavānaṃ aggan ’’ ti .
‘‘ Sameti kho idaṃ āyasmato bhaddajissa , yadidaṃ bahunā janenā ’’ ti ?
‘‘ Āyasmā
M2.178 kho , ānando , bahussuto .Paṭibhātu āyasmantaṃyeva ānandan ’’ ti .
‘‘ Tenahāvuso bhaddaji , suṇāhi , sādhukaṃ manasi karohi ;
bhāsissāmī ’’ ti .
‘‘ Evamāvuso ’’ ti kho āyasmā bhaddaji āyasmato ānandassa paccassosi .
Āyasmā ānando etadavoca –
‘‘ Yathā
V2.188 passato kho , āvuso , anantarā āsavānaṃ khayo hoti , idaṃ dassanānaṃ aggaṃ .Yathā suṇato anantarā āsavānaṃ khayo hoti , idaṃ savanānaṃ aggaṃ .
Yathā sukhitassa anantarā āsavānaṃ khayo hoti , idaṃ sukhānaṃ aggaṃ .
Yathā saññissa anantarā āsavānaṃ khayo hoti , idaṃ saññānaṃ aggaṃ .
Yathā bhūtassa anantarā āsavānaṃ khayo hoti , idaṃ bhavānaṃ aggan ’’ ti .
Dasamaṃ .
Āghātavaggo
P3.203 dutiyo .Tassuddānaṃ –
Dve āghātavinayā , sākacchā sājīvato pañhaṃ ;
Pucchā nirodho codanā , sīlaṃ nisanti bhaddajīti .