855. Asabhāgavuttiniddese vippaṭikūlaggāhitāti ananulomaggāhitā . VipaccanīkasātatātiP0.478 vipaccanīkena paṭiviruddhakaraṇena sukhāyanā . Anādarabhāvo anādariyaṃ . Tathā anādariyatā . Agāravassa bhāvo agāravatā . Jeṭṭhakabhāvassa akaraṇaṃ appatissavatā . AyaṃM0.460 vuccatīti ayaṃ asabhāgavutti nāma vuccati ; visabhāgajīvikatāti attho ; yāya samannāgato puggalo mātaraṃ pitaraṃ vā gilānaṃ paṭivattitvāpi na oloketi ; pitusantakassa kāraṇā mātarā saddhiṃ , mātusantakassa kāraṇā pitarā saddhiṃ kalahaṃ karoti ; visabhāgajīvitaṃ jīvati , mātāpitūnaṃ santakassa kāraṇā jeṭṭhena vā kaniṭṭhena vā bhātarā saddhiṃ kalahaṃ karoti , nillajjavacanaṃ vadati , ācariyassa vā upajjhāyassa vā vattapaṭivattaṃ na karoti , gilānaṃ na upaṭṭhāti , buddhassa bhagavato cetiyadassanaṭṭhāne uccāraṃ vā passāvaṃ vā karoti , kheḷampiV0.452 siṅghāṇikampi chaḍḍeti , chattaṃ dhāreti , upāhanā āruyha gacchati , buddhasāvakesu na lajjati , saṅghe cittīkāraṃ na karoti , mātimattapitimattādīsu garuṭṭhānīyesu hirottappaṃ na paccupaṭṭhāpeti . Tassevaṃ pavattamānassa sabbā pesā kiriyā mātarītiādīsupi vatthūsu asabhāgavuttitā nāma hoti .