843-844.
Idāni yathānikkhittāya mātikāya tattha katamo jātimadotiādinā nayena āraddhe niddesavāre jātiṃ paṭiccāti jātiṃ nissāya .
Ettha ca atthipaṭiccaṃ nāma kathitaṃ , tasmā jātiyā satīti ayamettha attho .
Madanavasena mado .
Majjanākāro majjanā .
Majjitabhāvo majjitattaṃ .
Māno maññanātiādīni heṭṭhā dhammasaṅgahaṭṭhakathāyaṃ ( dha . sa . aṭṭha .1121) vuttatthāneva .
Ayaṃ vuccatīti ayaṃ evaṃ jātiyā sati taṃ jātiṃ nissāya uppanno majjanākārappavatto māno jātimadoti vuccati .
Svāyaṃ
V0.440 khattiyādīnaṃ catunnampi vaṇṇānaṃ uppajjati .
Jātisampanno hi khattiyo ‘ mādiso añño natthi .
Avasesā antarā uṭṭhāya khattiyā jātā .
Ahaṃ pana vaṃsāgatakhattiyo ’ ti mānaṃ karoti .
Brāhmaṇādīsupi eseva nayo .