848. Sārambhaniddese sārambhanavasena sārambho .

Paṭippharitvā sārambho paṭisārambho . Sārambhanākāro sārambhanā . Paṭippharitvā sārambhanā paṭisārambhanā . Paṭisārambhitassa bhāvo paṭisārambhitattaṃ . Ayaṃ vuccatīti ayaṃ sārambho nāma vuccati . Svāyaṃ lakkhaṇato karaṇuttariyalakkhaṇo nāma vuccati , yena samannāgato puggalo taddiguṇaṃ taddiguṇaṃ karoti . Agāriko samāno ekenekasmiṃ gharavatthusmiṃ sajjite aparo dve vatthūni sajjeti , aparo cattāri , aparoM0.452 aṭṭha , aparo soḷasa . Anagāriko samāno ekenekasmiṃ nikāye gahite ,‘ nāhaṃ etassa heṭṭhā bhavissāmī ’ ti aparo dve gaṇhāti , aparo tayo , aparo cattāro , aparo pañca . Sārambhavasena hi gaṇhituṃ naP0.470 vaṭṭati . Akusalapakkho esa nirayagāmimaggo . Kusalapakkhavasena pana ekasmiṃ ekaṃ salākabhattaṃ dente dve dātuṃ , dve dente cattāri dātuṃ vaṭṭati . Bhikkhunāpi parena ekasmiṃ nikāye gahite ,‘ dve nikāye gahetvā sajjhāyantassa me phāsu hotī ’ ti vivaṭṭapakkhe ṭhatvā taduttari gaṇhituṃ vaṭṭati .