Cūḷavaggapāḷi
1. Kammakkhandhakaṃ
1. Tajjanīyakammaṃ
1. Tena
T1.1P2.1V0.1M0.1 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā , yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti –
‘‘ mā kho tumhe , āyasmanto , eso ajesi .
Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca [ alamatthatarā ca ( syā . ka .)].
Mā cassa bhāyittha .
Mayampi tumhākaṃ pakkhā bhavissāmā ’’ ti .
Tena anuppannāni ceva bhaṇḍanāni uppajjanti
V0.2 uppannāni ca bhaṇḍanāni bhiyyobhāvāya vepullāya saṃvattanti .Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā , yepi caññe bhikkhū bhaṇḍanakārakā
T1.2 kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vakkhanti –‘ mā kho tumhe , āyasmanto , eso ajesi .
Balavābalavaṃ
M0.2 paṭimantetha .Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti .
Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattantī ’’ ti .
2. Atha kho te bhikkhū bhagavato etamatthaṃ ārocesuṃ .
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi –
‘‘ saccaṃ kira , bhikkhave , paṇḍukalohitakā bhikkhū attanā
P2.2 bhaṇḍanakārakā kalahakārakā vivādakārakā bhassakārakā saṅghe adhikaraṇakārakā , yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti –‘ mā kho tumhe , āyasmanto , eso ajesi .
Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti .
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattantī ’’ ti ?
‘‘ Saccaṃ bhagavā ’’ ti .
Vigarahi
T1.3 buddho bhagavā –‘‘ ananucchavikaṃ , bhikkhave , tesaṃ moghapurisānaṃ ananulomikaṃ appatirūpaṃ assāmaṇakaṃ akappiyaṃ akaraṇīyaṃ .
Kathañhi nāma te , bhikkhave , moghapurisā attanā bhaṇḍanakārakā … pe … saṅghe adhikaraṇakārakā , yepi caññe bhikkhū bhaṇḍanakārakā … pe … saṅghe adhikaraṇakārakā te upasaṅkamitvā evaṃ vakkhanti –
‘ mā kho tumhe , āyasmanto , eso ajesi .
Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti ?
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Netaṃ , bhikkhave , appasannānaṃ vā pasādāya pasannānaṃ vā bhiyyobhāvāya .
Atha khvetaṃ , bhikkhave , appasannānañceva appasādāya pasannānañca ekaccānaṃ aññathattāyā ’’ ti .
Atha kho bhagavā te [ paṇḍukalohitake ( syā .)] bhikkhū anekapariyāyena vigarahitvā dubbharatāya dupposatāya mahicchatāya
V0.3 asantuṭṭhitāya [ asantuṭṭhatāya ( syā .), asantuṭṭhiyā ( sī .)] saṅgaṇikāya kosajjassaM0.3 avaṇṇaṃ bhāsitvā anekapariyāyena subharatāya suposatāya appicchassa santuṭṭhassa sallekhassa dhutassa pāsādikassa apacayassa vīriyārambhassa [ viriyārambhassa ( sī .), vīriyārabbhassa ( ka .)] vaṇṇaṃ bhāsitvā bhikkhūnaṃ tadanucchavikaṃ tadanulomikaṃT1.4 dhammiṃ kathaṃ katvā bhikkhū āmantesi –‘‘ tena hi , bhikkhave , saṅgho paṇḍukalohitakānaṃ bhikkhūnaṃ tajjanīyakammaṃ karotu .
Evañca pana , bhikkhave , kātabbaṃ .
Paṭhamaṃ paṇḍukalohitakā bhikkhū codetabbā , codetvā sāretabbā , sāretvā āpattiṃ [ āpatti ( sī . syā .)] āropetabbā , āpattiṃ āropetvā byattena bhikkhunā paṭibalena saṅgho ñāpetabbo –
3.‘‘ Suṇātu me , bhante , saṅgho .
Ime paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā , yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti –
‘ mā
T1.5 kho tumhe , āyasmanto , eso ajesi .Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti .
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Yadi saṅghassa pattakallaṃ , saṅgho paṇḍukalohitakānaṃ bhikkhūnaṃ tajjanīyakammaṃ kareyya .
Esā ñatti .
‘‘ Suṇātu me , bhante , saṅgho .
Ime paṇḍukalohitakā bhikkhū attanā bhaṇḍanakārakā … pe … saṅghe adhikaraṇakārakā , yepi caññe bhikkhū bhaṇḍanakārakā … pe … saṅghe adhikaraṇakārakā te upasaṅkamitvā evaṃ vadanti –
‘ mā kho tumhe , āyasmanto , eso ajesi .
Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti .
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Saṅgho paṇḍukalohitakānaṃ bhikkhūnaṃ
M0.4 tajjanīyakammaṃ karoti .Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ , so tuṇhassa ;
yassa nakkhamati , so bhāseyya .
‘‘ Dutiyampi etamatthaṃ vadāmi – suṇātu me , bhante , saṅgho .
Ime paṇḍukalohitakā bhikkhū attanā bhaṇḍanakārakā … pe … saṅghe adhikaraṇakārakā , yepi caññe bhikkhū bhaṇḍanakārakā … pe … saṅghe adhikaraṇakārakā te upasaṅkamitvā evaṃ vadanti –
‘ mā kho tumhe
V0.4 , āyasmanto , eso ajesi .Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti .
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Saṅgho paṇḍukalohitakānaṃ bhikkhūnaṃ tajjanīyakammaṃ karoti .
Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ , so tuṇhassa ;
yassa nakkhamati , so bhāseyya .
‘‘ Tatiyampi etamatthaṃ vadāmi – suṇātu me , bhante , saṅgho
T1.6 .Ime paṇḍukalohitakā bhikkhū attanā bhaṇḍanakārakā … pe … saṅghe adhikaraṇakārakā , yepi caññe bhikkhū bhaṇḍanakārakā … pe … saṅghe adhikaraṇakārakā te upasaṅkamitvā evaṃ vadanti –
‘ mā kho tumhe , āyasmanto , eso ajesi .
Balavābalavaṃ paṭimantetha .
Tumhe tena paṇḍitatarā ca byattatarā ca bahussutatarā ca alamattatarā ca .
Mā cassa bhāyittha .
Mayampi tumhākaṃ pakkhā bhavissāmā ’ ti .
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Saṅgho paṇḍukalohitakānaṃ bhikkhūnaṃ tajjanīyakammaṃ karoti .
Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ , so tuṇhassa ;
yassa nakkhamati , so bhāseyya .
‘‘ Kataṃ saṅghena paṇḍukalohitakānaṃ bhikkhūnaṃ tajjanīyakammaṃ .
Khamati saṅghassa , tasmā tuṇhī , evametaṃ dhārayāmī ’’ ti .