4. Paṭiññātakaraṇaṃ

Author： _System_Pali_VRI_ @ Administrator

No version selected — showing the Pali original by default.

4. Paṭiññātakaraṇaṃ

200. Tena kho pana samayena chabbaggiyā bhikkhū appaṭiññāya bhikkhūnaṃ kammāni karontiV0.187 – tajjanīyampi , niyassampi , pabbājanīyampi , paṭisāraṇīyampi , ukkhepanīyampi .

Ye te bhikkhū appicchā … pe … te ujjhāyanti khiyyanti vipācenti –

‘‘ kathañhi nāma chabbaggiyā bhikkhū appaṭiññāya bhikkhūnaṃ kammāni karissanti – tajjanīyampi , niyassampi , pabbājanīyampi , paṭisāraṇīyampi , ukkhepanīyampī ’’ ti !

Atha khoM0.203 te bhikkhū bhagavato etamatthaṃ ārocesuṃ … pe …‘‘ saccaṃ kira , bhikkhave … pe …‘‘ saccaṃ bhagavā ’’ ti … pe … vigarahitvā … pe … dhammiṃ kathaṃ katvā bhikkhū āmantesi –

‘‘ na , bhikkhave , appaṭiññāya bhikkhūnaṃ kammaṃ kātabbaṃ – tajjanīyaṃ vā , niyassaṃ vā , pabbājanīyaṃ vā , paṭisāraṇīyaṃ vā , ukkhepanīyaṃ vā .

Yo kareyya , āpatti dukkaṭassa .

201.‘‘ Evaṃ kho , bhikkhave , adhammikaṃ hoti paṭiññātakaraṇaṃ , evaṃ dhammikaṃ .

Kathañca , bhikkhave , adhammikaṃ hoti paṭiññātakaraṇaṃ ?

‘‘ Bhikkhu pārājikaṃ ajjhāpanno hoti .

Tamenaṃ codeti saṅgho vā , sambahulā vā , ekapuggalo vā –

‘ pārājikaṃ āyasmā ajjhāpanno ’ ti ?

So evaṃ vadeti –

‘ na kho ahaṃ , āvuso , pārājikaṃ ajjhāpannoT1.322 , saṅghādisesaṃ ajjhāpanno ’ ti .

Taṃ saṅgho saṅghādisesena kāreti .

Adhammikaṃ paṭiññātakaraṇaṃ .

‘‘ Bhikkhu pārājikaṃ ajjhāpanno hoti .

Tamenaṃ codeti saṅgho vā , sambahulā vā , ekapuggalo vā –

‘ pārājikaṃ āyasmā ajjhāpanno ’ ti ?

So evaṃ vadeti –

‘ na kho ahaṃ , āvuso , pārājikaṃ ajjhāpanno , thullaccayaṃ … pe … pācittiyaṃ … pe … pāṭidesanīyaṃ … pe … dukkaṭaṃ … pe …T1.323 dubbhāsitaṃ ajjhāpanno ’ ti .

Taṃ saṅgho dubbhāsitena kāreti .

Adhammikaṃ paṭiññātakaraṇaṃ .

‘‘ Bhikkhu saṅghādisesaṃ … pe … thullaccayaṃ … pe … pācittiyaṃ … pe … pāṭidesanīyaṃ … pe … dukkaṭaṃ … pe … dubbhāsitaṃ ajjhāpanno hoti .

Tamenaṃ codeti saṅgho vā , sambahulā vā , ekapuggalo vā –

‘ dubbhāsitaṃ āyasmā ajjhāpanno ’ tiP2.84 ?

So evaṃ vadeti –

‘ na kho ahaṃ , āvuso , dubbhāsitaṃ ajjhāpanno , pārājikaṃ ajjhāpanno ’ ti .

Taṃ saṅgho pārājikena kāreti .

Adhammikaṃ paṭiññātakaraṇaṃ .

‘‘ Bhikkhu dubbhāsitaṃ ajjhāpanno hoti .

Tamenaṃ codeti saṅgho vā , sambahulā vā , ekapuggaloV0.188 vā –

‘ dubbhāsitaṃ āyasmā ajjhāpanno ’ ti ?

So evaṃ vadeti –

‘ na kho ahaṃ , āvuso , dubbhāsitaṃ ajjhāpanno , saṅghādisesaṃ … pe … thullaccayaṃ … pe … pācittiyaṃ … pe … pāṭidesanīyaṃ … pe … dukkaṭaṃ ajjhāpanno ’ ti .

Taṃ saṅgho dukkaṭena kāreti .

Adhammikaṃ paṭiññātakaraṇaṃ .

‘‘ Evaṃ kho , bhikkhave , adhammikaṃ hoti paṭiññātakaraṇaṃ .

‘‘ KathañcaM0.204 , bhikkhave , dhammikaṃ hoti paṭiññātakaraṇaṃ ?

Bhikkhu pārājikaṃ ajjhāpanno hoti .

Tamenaṃ codeti saṅgho vā , sambahulā vā , ekapuggalo vā –

‘ pārājikaṃ āyasmā ajjhāpanno ’ ti ?

SoT1.324 evaṃ vadeti –

‘ āma , āvuso , pārājikaṃ ajjhāpanno ’ ti .

Taṃ saṅgho pārājikena kāreti .

Dhammikaṃ paṭiññātakaraṇaṃ .

‘‘ Bhikkhu saṅghādisesaṃ … pe … thullaccayaṃ … pe … pācittiyaṃ … pe … pāṭidesanīyaṃ … pe … dukkaṭaṃ … pe … dubbhāsitaṃ ajjhāpanno hoti .

Tamenaṃ codeti saṅgho vā , sambahulā vā , ekapuggalo vā –

‘ dubbhāsitaṃ āyasmā ajjhāpanno ’ ti ?

So evaṃ vadeti –

‘ āma , āvuso , dubbhāsitaṃ ajjhāpanno ’ ti .

Taṃ saṅgho dubbhāsitena kāreti .

Dhammikaṃ paṭiññātakaraṇaṃ .

Evaṃ kho , bhikkhave , dhammikaṃ hoti paṭiññātakaraṇan ’’ ti .

Issues

Select Version

Cūḷavaggapāḷi

Cūḷavaggapāḷi