Aṭṭhārasavattaṃ
16.‘‘ Niyassakammakatena
T1.29 , bhikkhave , bhikkhunā sammā vattitabbaṃ .Tatrāyaṃ sammāvattanā – na upasampādetabbaṃ , na nissayo dātabbo , na sāmaṇero upaṭṭhāpetabbo , na bhikkhunovādakasammuti sāditabbā , sammatenapi bhikkhuniyo na ovaditabbā .
Yāya āpattiyā
V0.19 saṅghena niyassakammaṃ kataṃ hoti sā āpatti na āpajjitabbā , aññā vā tādisikā , tato vā pāpiṭṭhatarā ;kammaṃ na garahitabbaṃ , kammikā na garahitabbā .
Na pakatattassa bhikkhuno uposatho ṭhapetabbo , na pavāraṇā ṭhapetabbā , na savacanīyaṃ kātabbaṃ , na anuvādo paṭṭhapetabbo , na okāso kārāpetabbo , na codetabbo , na sāretabbo , na bhikkhūhi sampayojetabban ’’ ti .
Niyassakamme aṭṭhārasavattaṃ niṭṭhitaṃ .
17. Atha kho saṅgho seyyasakassa bhikkhuno niyassakammaṃ akāsi – nissāya te vatthabbanti .
So saṅghena niyassakammakato kalyāṇamitte
M0.20 sevamāno bhajamāno payirupāsamāno uddisāpento paripucchanto bahussuto hoti , āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo .Sammā vattati , lomaṃ pāteti , netthāraṃ vattati , bhikkhū upasaṅkamitvā evaṃ vadeti –
‘‘ ahaṃ , āvuso , saṅghena niyassakammakato sammā vattāmi , lomaṃ pātemi , netthāraṃ vattāmi .
Kathaṃ nu kho mayā paṭipajjitabban ’’ ti ?
Bhikkhū bhagavato etamatthaṃ ārocesuṃ … pe ….
‘‘ Tena
T1.30 hi , bhikkhave , saṅgho seyyasakassa bhikkhuno niyassakammaṃ paṭippassambhetu .